Read Plautdietsch (Low German) – De Bibel Kloagleeda 5 Bible Online

Kloagleeda 5 - Plautdietsch (Low German) – De Bibel bible

Kloagleeda 5

¹Vejat nich woo ons daut jeit, HAR, Kjikj doch waut fa eene Schaund opp ons jekomen es.

²Waut ons Oafgoot wia, haben framde en äare Macht; onse Hiesa jehieren de Utlenda.

³Wie haben nich mea onse Vodasch; onse Mitta sent Wätfrues.

⁴Wie motten fa ons Drinkjeswota betolen, un ons Holt mott wie ons kjeepen.

⁵Wie woaren em Jenekj jeschowen, un derwen nich noloten wan wie meed sent.

⁶Wie musten ons Ägipten hanjäwen, un to Assur, daut wie to äten hauden.

⁷Onse vestorwne Elren deeden en äare Tiet waut orrajcht wia, un nu mott wie dee äare Strof uthoolen.

⁸Daut sent Sklowen, dee ons nu väasajen, un von dee äare Macht kaun ons kjeena friemoaken.

⁹Wie sent en Doodesjefoa, wan wie onse Arnt holen, wäajen de Baunden von enne Wiltnis.

¹⁰Wäajen dise schlemme Hungaschnoot es onse Hut gaunz veschrieecht.

¹¹Met onse Frues en Zion, un de Mejales en de Städa en Juda, es Schaund jedräwen worden.

¹²Onse Leida haben see jehongen, un de Leidasch haben see nich jeieet.

¹³Junge Mana musten dän Molsteen dreien, un junge Junges Holt droagen bat see stolpaden.

¹⁴De leidende Mana jäwen nich mea Rot, un de junge Mana spälen nich mea Instrumenten.

¹⁵Doa es kjeene Freid mea em Läwen, un wua wie daunzten, trua wie nu.

¹⁶Doa es nuscht waut ons schmock moakt aus Volkj. Daut es schlemm met ons wäajen onse Sind.

¹⁷Wäajen dit sent wie ennalich nich koasch, wäajen dise Sachen vejeit ons daut Uagenlicht.

¹⁸Daut es wäajen däm Zion Boajch, dee nu soo vestimmelt licht, daut de Fas doa romranen.

¹⁹Oba du, HAR, blifst opp emma de Kjennich; dien Troon blift opp aule Tieden.

²⁰Wuarom hast du ons gaunz vejäten? Wuarom bliew wie läweslank onen die?

²¹HAR, brinj ons doch wada trigj no die, daut wie kjennen oppjerecht sennen. Moak ons Läwen wada soo aus ieeschtemma.

²²Ooda hast du ons bat opp daut latste veschmäten, un haft dien Oaja kjeen Enj?