Read Plautdietsch (Low German) – De Bibel Hesekiel 1 Bible Online

Hesekiel 1 - Plautdietsch (Low German) – De Bibel bible

Hesekiel 1

¹Lot mie junt emol von eene besondre Erfoarunk vetalen, dee mie passieed aus ekj en Babel mank de veschlapte Juden wia. Ekj weet noch, daut wia aum 5. Dach von de 4. Moonat en daut 30. Joa. Ekj stunt doa aum Kebar Riefa, un met eemol muak de Himmel sikj op, un Gott wees mie eene Openboarunk.

²Dit wia daut fefte Joa daut de Kjennich Jojachin faustjenomen wia. Dan aum feften Dach von de Moonat

³wort mie kloa, waut de HAR to sajen haud. Ekj sie Hesekiel, Busi sien Sän. Dort en Babel wist ekj met eemol, daut däm HARN siene Haunt äwa mie wia.

⁴Aus ekj doa soo oppkjikjt, sach ekj eenen stoakjen Wint vom Nuaden oppkomen. Doa wia eene groote Wolkj. En de Medd leet daut no rootheetet Iesa, un een grootet Fia, woont wiet runtom dacht.

⁵Un doa en de Medd sach ekj vea läwendje, ekj weet nich krakjt waut, oba dee leet daut no Menschen.

⁶Doch haud jieda eent von dee vea Jesechta un vea Flichten.

⁷Äare Been stunden jlikj, un dee äare Feet leeten no de Heefta von een Kaulf. De Feet blenkjaden aus jeräwnet Koppa.

⁸Unja äare Flichten hauden dee Henj, soo aus Menschen. Dee hauden äare Jesechta un äare Flichten aun vea Sieden.

⁹Äare Flichten schieeden toop, un wan see jinjen, brukten see sikj nich dreien, wiels see jinjen emma en de Rechtunk von eent von de Jesechta.

¹⁰Jieda eena von dee vea haud von väaren daut Jesecht von eenen Mensch, von de rajchte Sied daut Jesecht von eenen Leiw, von de linkje Sied daut Jesecht von eenen Oss, un von hinjen daut Jesecht von eenen Odla.

¹¹Äare Flichten strakjten enne Hecht. Twee schieeden emma aun de Flichten von däm näakjsten, un met twee bedakjten see äa Kjarpa.

¹²Dee jinjen emma en de Rechtunk von eent von äare Jesechta, emma doahan wua de Jeist an leid. Krakjt eendoont wua see hanjinjen, see brukten sikj nich doahan dreien.

¹³Un enne Medd tweschen de vea, leet daut no jlieejendet Gloot, un no Fiastakja, waut han un häa tweschen de vea fuaren. Daut wia een dachet Fia, un daut blizt emma von en daut Fia.

¹⁴Un de vea flizten han un häa aus de Blitz.

¹⁵Un aus ekj soo no de vea kjikjt, sach ekj, daut biesied jieda eent von dee wia een Raut, woont de Ieed aunschieed.

¹⁶De vea Räda leeten un schauften aula krakjt äwareen. Dee leet daut no kostboara Steen, un dreiden aus een Raut en daut aundre.

¹⁷Dee kunnen no aule vea Sieden kjikjen, un brukten sikj biem gonen nich omdreien.

¹⁸Un runtom aun de Kaunt von jieda eent von de vea Räda wieren Uagen. Daut wia sondaboa un furchtboa.

¹⁹Un wan de vea sikj rieeden, dan jinjen de Räda emma met an met, un wan de vea sikj enne Hecht hoowen, dan hoowen de Räda sikj uk enne Hecht.

²⁰Emma soo aus de Jeist an leid, soo jinjen de vea, un de Räda met an met, krakjt soo aus de Jeist an leid, wiels de Jeist von de vea wia uk en de Räda.

²¹Wan dee wuahan jinjen, dan jinjen dise uk doahan; wan dee stelhilden, dan hilden dise uk stell; un wan dee sikj enne Hecht hoowen, dan hoowen dise sikj uk enne Hecht. De Räda deeden emma krakjt soo aus de vea, wiels de Jeist von de vea wia uk en de Räda.

²²Oba dan noch, bowa de Kjap von de vea, wia waut, soo aus een groota blanka Bän, soo aus een Kristal. Daut leet furchtboa äwa äare Kjap.

²³Unja disen Bän haud jieda eena von dee twee Flichten utjestrakjt, eena nom aundren opptoo, un twee Flichten met dee see sikj dän Kjarpa bedakjten.

²⁴Un wan see wuahan jinjen, dan kunn ekj äare Flichten hieren. Daut hieed sikj no daut ruzhen von een grootet Wota, no de Stemm von däm, dee aule Macht haft, no een Jetees aus en een Soldotenloaga. Oba wan see stelhilden, dan leeten see äare Flichten rauf.

²⁵Un von bowa dän Bän, dee äwa an wia, hieed ekj eene Stemm aus see stelhilden un äare Flichten raufhenjen leeten.

²⁶Bowa dän Bän äwa de vea wia, waut no een Troon leet, oba von Safier jeschnäden; un opp daut waut no een Troon leet, saut wäa, ekj saj daut soo goot aus ekj kaun, dee eene Form von een Mensch haud.

²⁷Un von daut waut no siene Hoft leet, von doa nopp, sach ekj, waut no jlieejendet Iesa leet, soo heet aus Fia. Un von daut, waut no siene Hoft leet un rauf, leet daut no Fia. Daut wia runtom däm sea dach.

²⁸Daut jlenzt doa runtom am aus een Räajenboagen enne Wolkjen, wan daut räajent. Soo leet daut, waut soo harlich lat aus de HAR. Un aus ekj daut sach, foll ekj dol, plaut opp mien Jesecht, un ekj hieed wäm räden.