Read Plautdietsch (Low German) – De Bibel Hesekiel 10 Bible Online

Hesekiel 10 - Plautdietsch (Low German) – De Bibel bible

Hesekiel 10

¹Dan sach ekj, horcht emol, bowa dän Bän waut äwa de Cheruben wia, sach ekj waut no een Safiersteen leet, oba en de Form von eenen Troon.

²Un dee säd to däm Maun, dee daut lienzeichne Kjleet aun haud: Go emol nenn, doa en daut Rädawoakj unja de Cheruben, un nemm eene Japsvoll von daut jlieejende Gloot, waut tweschen de Cheruben es, un strei daut äwa de Staut. Un ekj sach daut hee doa nenn jinkj.

³De Cheruben stunden aun de rajchte Sied en däm HARN sien Hus, aus de Maun doa nenn jinkj. Un de Bennahoff wia aules eene Ruak.

⁴Dan hoof sikj däm HARN siene Harlichkjeit von de Schwal vom Hus, un daut gaunze Hus wort voll von de Wolkj, un de Väahoff wia gaunz oppjedacht von däm HARN siene Harlichkjeit.

⁵De Flichten von de Cheruben muaken een Jeruzh, soo lud aus de Stemm von Gott, dee aule Macht haft. Daut wia bat däm butaschten Väahoff to hieren.

⁶De Maun met daut lienzeichne Kjleet, to däm hee jesajcht haud, daut hee sull Fia von tweschen de Räda tweschen de Cheruben nämen, jinkj un stunt biesied een Raut.

⁷Un de Cherub strakjt siene Haunt no daut Fia waut tweschen an wia, un neem waut doavon, un jeef däm Maun daut, dee daut lienzeichne Kjleet aun haud. Dee neem daut en siene Henj un jinkj rut.

⁸Unja de Flichten hauden de Cheruben, waut no Menschen Henj leet.

⁹Un dan sach ekj doa wieren vea Räda bie de Cheruben, een Raut bie jieda Cherub. De Räda leet daut no Turkis,

¹⁰un aule vea leeten äwareen. Daut wia aus wan een Raut en daut aundre wia.

¹¹Wan dee wuahan wullen, kunnen dee en irjent eene Rechtunk gonen onen daut dee sikj dreiden. Wua de eena han jinkj, doa jinjen see aula han, onen daut see sikj doahan dreien brukten.

¹²Dee äa gaunza Kjarpa, de Rigjen, de Henj, un de Flichten, un uk aule vea Räda wieren runtom voll Uagen.

¹³Un ekj hieed daut de Räda, “Daut Rädawoakj”, jenant worden.

¹⁴Dee hauden jieda vea Jesechta. Daut ieeschte wia daut Jesecht von een Cherub, daut tweede wia daut Jesecht von een Mensch, daut dredde wia von een Leiw, un daut vieede von een Odla.

¹⁵Dit wieren de selwje vea, dee ekj biem Kebar Riefa jeseenen haud. Un de Cheruben hoowen sikj opp,

¹⁶un de Räda bleewen krakjt met an. Un wan de Cheruben met äare Flichten schluagen, soo daut see von de Ieed looshoowen, dan jinjen de Räda nich wajch von biesied an.

¹⁷Wan jane stell hilden, dan hilden dise uk stell. Un wan jane sikj opphoowen, dan hoowen dise sikj uk. De Jeist von de vea wia en an.

¹⁸Dan jinkj däm HARN siene Harlichkjeit von de Tempelschwal un stald sikj äwa de Cheruben.

¹⁹Un ekj sach woo de Cheruben äare Flichten schluagen un oppfluagen, von oppe Ieed, un de Räda met an. Un see hilden biem Engank von daut oostne Puat von däm HARN sien Hus stell, un de Harlichkjeit von Israel äa Gott stunt bowa an.

²⁰Dit wieren de Vea, dee ekj aum Kebar Riefa haud unja Israel äa Gott jeseenen. Nu wist ekj, daut wieren Cheruben.

²¹Jieda eena von dee haud vea Flichten un waut, waut no Menschen Henj leet, unjare Flichten.

²²Un ekj sach fuaz, äare Jesechta wieren krakjt dee, dee ekj biem Kebar Riefa jeseenen haud. Un dee jinjen emma en de Rechtunk von eent von de Jesechta.