Read Plautdietsch (Low German) – De Bibel Hesekiel 11 Bible Online

Hesekiel 11 - Plautdietsch (Low German) – De Bibel bible

Hesekiel 11

¹Un de Jeist hoof mie opp, un brocht mie no däm HARN sien Hus, un doa no daut oostne Puat. Un horch emol, doa sach ekj ver mie 25 Mana bie daut Puat, un mank de Mana sach ekj Jaasanja, Assur sien Sän, un Pelatja, Benaja sien Sän.

²Un de HAR säd to mie: Menschensän, dit sent dee Mana, dee fa dise Staut Onheil plonen un schlajchten Rot jäwen.

³See sajen: “Wie haben enne latste Tiet nich Hiesa oppjebut. De Staut es een Gropen, un wie sent daut Fleesch.”

⁴Doawäajen saust du, Menschensän, jäajen an profezeien.

⁵Un de Jeist vom HARN kjeem opp mie un säd, daut ekj dit sajen sull: Dit es waut de HAR sajcht: Daut es waut jie Israeliten sajen, oba ekj weet waut jie werkjlich denkjen.

⁶Jie haben väl Menschen omjebrocht, un de Doodes ligjen aulawäajen oppe Gaussen.

⁷Doawäajen sajcht Gott de HAR: De Doodes, dee opp june Gaussen ligjen, sent daut Fleesch em Gropen, oba jie woaren ut dise Staut rutjenomen woaren.

⁸Jie ferchten junt fa daut Schwieet. Ekj woa daut Schwieet opp junt komen loten, sajcht Gott de HAR.

⁹Ekj woa junt ut de Staut rut driewen un aun framde äwajäwen. Dee woaren Jerecht äwa junt fieren,

¹⁰soo daut jie woaren vom Schwieet doljeschloagen woaren. Ekj woa junt oppe Jrens von Israel rechten, un jie woaren enseenen, daut ekj de HAR sie.

¹¹De Staut woat nich een Gropen fa junt sennen, un jie woaren nich daut Fleesch doabennen sennen. Ekj woa junt oppe Jrensen von Israel rechten.

¹²Un jie woaren enseenen, daut ekj de HAR sie. Jie haben miene Jebooten nich jehoolen, un haben junt nich no miene Väaschreften jerecht. Jie haben junt no de Väaschreften von de Velkja rom junt jerecht.

¹³Dan neem sikj daut soo rom, daut jrod aus ekj profezeien deed, storf Pelatja, Benaja sien Sän. Un ekj foll opp mien Jesecht han un schrieech lud: HAR Gott, woascht du een Enj moaken met daut äwaje von Israel?

¹⁴Un mie wort kloa, waut de HAR sajen wull. De HAR säd:

¹⁵Menschensän, de Lied dee noch en Jerusalem wonen, sajen von äare Breeda un äa Frintschoft, un aule aundre Israeliten, daut see wiet auf vom HARN sent, un daut wie, dee wie hia en Jerusalem wonen, daut Oafgoot hoolen.

¹⁶Doatoo saj nu: Gott de HAR sajcht: Jo, soogoa wan ekj an wiet mank de Velkja jeschekjt hab, un an en de Lenda vestreit hab, woa ekj an een kortet stootje en de Lenda Schutz jäwen, wua see hanjeroden sent.

¹⁷Saj an: Dit es waut Gott de HAR sajcht: Ekj well junt von mank de Velkja un von en de Lenda saumlen, wua jie nu vestreit sent, un ekj well junt daut Launt Israel jäwen.

¹⁸Un see woaren komen un een kortet Enj moaken met aul daut beese waut see doonen un dän oppscheiseljen Jettadeenst.

¹⁹Un ekj woa an een eenkjanjet Hoat, un eenen nieen Jeist jäwen. Ekj woa daut steenane Hoat von an wajchnämen, un an een fleeschnet Hoat jäwen.

²⁰Un dan woaren see no miene Väaschreften läwen un miene Jesazen hoolen, un jehuarsom sennen. Un see woaren mien Volkj sennen, un ekj woa äa Gott sennen.

²¹Oba dee, dee em Hoat wieda daut beese doonen un dän oppscheiseljen Jettadeenst biebehoolen, woaren daut opp äaren Kopp trigjkjrieen, waut see jedonen haben. Dit sajcht Gott de HAR.

²²Dan klaupten de Cheruben äare Flichten, un de Räda fluagen met an. Un de Harlichkjeit von Israel äa Gott wia bowa an.

²³Un de Harlichkjeit vom HARN hoof sikj opp von en de Medd von de Staut un stald sikj opp däm Boajch dee nom Oosten buta de Staut es.

²⁴Un de Jeist hoof mie opp un brocht mie en eene Vision derch Gott sienen Jeist no Chaldäa no de veschlapte. Un daut, waut ekj doa jeseenen haud, veschwunk.

²⁵Un ekj säd de veschlapte aules waut de HAR mie jewäsen haud.