Read Plautdietsch (Low German) – De Bibel Hesekiel 13 Bible Online

Hesekiel 13 - Plautdietsch (Low German) – De Bibel bible

Hesekiel 13

¹Un mie wort noch wada kloa, waut de HAR to sajen haud. Hee säd:

²Menschensän, profezei äwa de Profeeten en Israel. Saj waut to dee, dee ut sikj selfst profezeien un sajen: “Dit es waut de HAR sajcht.”

³Dit es waut Gott de HAR sajcht: Woo woat de Profeeten, dee soo schoslich räden, daut doch gonen? Dee räden ut äaren ieejnen Jeist, un haben kjeene Erfoarunk jehaut.

⁴Oo Israel, june Profeeten sent aus Fas en eene Staut dee doljebroaken es.

⁵See sent nich doa jegonen, wua de Mia vebrockeld, un dee stoakja jemoakt, soo daut Israel aun däm HARN sien Dach en dän Kaumf bestonen wudd.

⁶Waut see enjeseenen haben, helt nuscht en, un waut see woasajen, sent Läajes. See sajen: “De HAR sajcht,” wan de HAR an nich jeschekjt haft, un dan luaren see daut äa Wuat en Erfellunk jeit.

⁷Es daut nich soo daut jie kjeene Openboarunk jehaut haben, un daut jun Woasajen Läajes sent? Un dan säd jie noch: “Dit sajcht de HAR”, wan ekj nuscht jesajcht haud.

⁸Un doawäajen sajcht Gott de HAR nu: Wiels jie de Lied soont jelieet haben, waut nuscht enhelt, un lieejen wan jie woasajen, woa ekj noch met junt veräakjnen, sajcht Gott de HAR.

⁹Ekj woa dee Profeeten, dee junt waut väamuaken waut nuscht enhilt, un junt väaluagen en äa Woasajen, bestrofen. See woaren nich en däm Rot von mien Volkj bliewen; un see woaren nich oppe List komen en daut Buak wua de Israeliten enjefieet woaren, un see woaren nich en daut Launt Israel nengonen. Dan woa jie enseenen, daut ekj Gott de HAR sie.

¹⁰Krakjt doawäajen, wiels see daut Volkj veleiden un sajen: “Aules es goot”, wan nich aules goot es. Un wan de Lied een Schetsel oppstalen, gonen see un beschmäaren daut met Kaulkj.

¹¹Saj to dee waut gonen un Kaulkj schmäaren, daut dee Waunt omfaulen woat. Daut woat eemol met eenen wuchtjen Wint goot plenjren, un met groote Stekja hoaglen,

¹²un dan woat de Waunt toopfaulen. Un de Lied woaren junt froagen, waut de Kaulkj jeholpen haft.

¹³Un doawäajen sajcht Gott de HAR: Ekj sie soo veläajen, daut ekj eenen wuchtjen Wint loos bräakjen woa, un ut Oaja daut sea plenjren loten. Ekj woa daut ut ojjedult met groote Hoagelstekja hoaglen loten un de Waunt dolbräakjen.

¹⁴Soo woa ekj de Waunt, dee jie met Kaulkj beschmäat haben, tweibräakjen un dolrieten, bat de Gruntsteena väaschienen. Wan dee felt, woa jie doabie omkomen. Un jie woaren enseenen, daut ekj de HAR sie.

¹⁵Wan ekj mienen Oaja aun dee utjeeeft hab, aun de Waunt un aun dee waut dee jekaulkjt haben, dan woa ekj junt sajen: De Waunt un de Kaulkja sent wajch,

¹⁶un doamet meen ekj de Profeeten en Israel, dee doa säden, daut aules goot wia, aus daut sea wiet von goot wia, sajcht Gott de HAR.

¹⁷Un de HAR säd: Menschensän, saj emol wäajen de Frues mank june Lied, dee sikj ut sikj selfst oppstalen aus wan see profeetisch räden kjennen. Du saust wäajen dee sajen:

¹⁸Dit es waut Gott de HAR sajcht: Woo saul daut met junt gonen, dee jie fa eenen jiedren sien Hauntjelenkj eene Binj neien, un fa kjliene un groote, eenen jiedren eene Metz moaken, soo daut jie dee doamet fausthoolen kjennen. Woa jie jun Läwen behoolen, wan jie de Menschen en mien Volkj daut Läwen nämen?

¹⁹Met june Läajes, no dee see soo jieren horchen, brinj jie Menschen om dee läwen sullen, un loten dee aum Läwen dee stoawen sullen. Dit doo jie fa eene Hauntvoll Joascht ooda fa een Stekj Broot. Met dit näm jie miene Iea wajch ver daut Volkj.

²⁰Doawäajen sajcht Gott de HAR: Ekj woa met junt veräakjnen, wiels jie de Binjen brucken toom Menschen enne Akj joagen, soo aus eena Väajel jript; un ekj woa junt dee vonne Oarms rieten un woa de Menschen, dee jie fausthoolen, frie loten aus Väajel.

²¹Un ekj woa junt june Metzen wajchrieten un mien Volkj ut june Henj raden, daut jie dee nich wieda woaren, meist soo aus Tieren, fausthoolen kjennen. Un jie woaren enseenen, daut ekj de HAR sie.

²²Wiels jie dee, dee jerajcht sent bedrekjt haben, dee ekj nich unjadrekjen wull, un wiels jie de Sinda Moot jemoakt haben, soo daut see sikj nich omkjieren deeden un sikj nich äa Läwen raden wudden,

²³woa jie nich mea sajen, daut junt waut kloa jeworden es, wan daut nuscht enhelt, un nich mea woasajen, waut jeloagen es. Ekj woa mien Volkj ut june Macht raden, un jie woaren enseenen, daut ekj de Har sie.