Read Plautdietsch (Low German) – De Bibel Hesekiel 19 Bible Online

Hesekiel 19 - Plautdietsch (Low German) – De Bibel bible

Hesekiel 19

¹Un dan wull de HAR haben daut ekj dit Trualeet aunstemmen sull, wiels daut soo schlemm met de Leidasch en Israel wia.

²Diene Mutta wia eene Utnom von een Leiw. See läd sikj mank de Leiws dol, un brocht äare kjliene mank de Tieren opp.

³Eent von de kjliene, dee see opptrock, wort een groota Leiw. Dee lieed sikj aundre Tieren jriepen, un dee freet Menschen opp.

⁴De Velkja hieeden woo jefäadlich dee wort, un see kjrieejen am en een Loch faust, un neemen am met Hoakes no Ägipten.

⁵Aus de Muttaleiw dan oppjäwen must, met däm fa wäm see soo väl Hopninj haud, trock see noch een kjlienet opp, daut et een groota Leiw wort.

⁶Dee lieed sikj met de aundre Leiws ranen, un lieed sikj aundre Tieren jriepen, un freet uk Menschen.

⁷Hee muak sikj bie daut tus, waut däm väajen Kjennich sient jewast wia un vestieed gaunze Städa. Aule Lied runtom enjsten sikj, wan hee breld.

⁸Dan muaken aul de Lenda rom am sikj reed un stalden äare Nats opp un kjrieejen am en een Loch faust.

⁹See neemen am faust met eenen iesanen Rinkj rom dän Hauls un brochten am no Babel, nom Kjennich. See bemuaken am un bewoakten am, soo daut sien brellen nich mea manke Boaj en Israel to hieren wia.

¹⁰Diene Mutta wia eene Wienrank en een Wiengoaden, dicht biem Wota jeplaunt. See haud väl Asta un Frucht, wiels daut soo goot jewessat wia.

¹¹De Asta worden studich un stoakj, aus fa een Kjennich sien Stock, un wossen huach enne Hecht, un wieren oppfaulent fa woo huach un dicht dee bewossen wia.

¹²Oba dee wort en Oaja utjeräten un veschmäten, daut see vom Oostwint oppe Ieed vedrieejd. De Frucht foll auf un de dikja Staum vedrieejd, un aules wort em Fia jeschmäten.

¹³Nu es dee enne Wiltnis vesat en een drieejet onjewessadet Launt.

¹⁴Doa kjeem een Fia von bie däm Staum, un vebrend beides Asta un Frucht. Nu es de Staum soo vedorwen, daut et kjeen Kjennichs Stock jäwen kaun. Dit truaje Leet es een bekaundet Trualeet jeworden.