Read Plautdietsch (Low German) – De Bibel Hesekiel 2 Bible Online

Hesekiel 2 - Plautdietsch (Low German) – De Bibel bible

Hesekiel 2

¹Un hee säd to mie: Menschensän, sto opp. Ekj well met die räden.

²Un aus hee soo to mie räd, kjeem de Jeist en mie un recht mie opp. Un ekj horcht no waut hee to mie säd.

³Hee säd: Menschensän, ekj well haben, daut du saust no de Israeliten gonen. Daut es een Volkj waut jäajenaun es; un dee sent mie jäajenaun jeworden. De Menschen sent vondoag krakjt soo aus äare Elren ver an jewast sent; dee sent mie jäajenaun.

⁴Dee sent stieekoppich. Daut sent Heltablessen. Un ekj well haben, daut du no an jeist un to an sajchst: “Dit es waut Gott de HAR sajcht.”

⁵Eendoont auf daut stieekopje Volkj nu horcht ooda nich, see sellen nu weeten, daut doa een Profeet mank an es.

⁶Un, Menschensän, du saust die nich ver an ooda von daut waut see sajen enjsten loten. Daut woat sennen aus wan du mank Kaktus un Spekjakrut schaufst, ooda uk soo aus mank Skorpionen. Oba enjst die nich fa daut waut see sajen woaren, un lot die daut nich aunjriepen woo see die aunkjikjen. See sent een stieekopjet Volkj.

⁷Du saust an miene Wieed jäwen, auf see doano horchen ooda nich. See sent een stieekopjet Volkj.

⁸Oba Menschensän, horch du no waut ekj die sajen woa. Sie du nich krakjt soo stieekoppich aus daut äwaje Volkj. Moak dien Mul op, un at waut ekj die jäw.

⁹Un weetst, dan sach ekj doa eene Haunt ver mie hanjestrakjt, un en de Haunt wia eene Schreftroll.

¹⁰Hee rold dee op ver mie, un ekj sach daut dee von beid Sieden beschräwen wia. Un daut waut doa jeschräwen wia, wieren een kloagen un jaumren un truaren.