Read Plautdietsch (Low German) – De Bibel Hesekiel 25 Bible Online

Hesekiel 25 - Plautdietsch (Low German) – De Bibel bible

Hesekiel 25

¹Un mie wort wada kloa waut de HAR to sajen haud. Hee säd:

²Menschensän, kjikj emol no Amon opptoo, un profezei äwa an.

³Saj to de Amonita: Horcht emol no waut Gott de HAR sajcht: Dit es waut Gott de HAR sajcht: Wiels jie junt freiden aus mien Heilichtum toschaund jemoakt wort, un aus Israel venicht wort, un aus Juda veschlapt wort,

⁴doawäajen woa ekj die enne Macht von daut Volkj em Oosten äwajäwen. Dee woaren äare Zelten mank junt oppstalen un mank junt wonen. Dee woaren june Arnten äten un june Malkj drinkjen.

⁵Un ekj woa Raba to eene Weid fa Kameelen moaken, un en Amon woaren de Schop grosen, un jie woaren enseenen, daut ekj de HAR sie.

⁶Dit es waut Gott de HAR sajcht: Wiels du diene Henj klautschen deetst, un diene Feet traumplen deetst äwa Israel, un du die soo sea freien deetst äwa äaren Schoden,

⁷doawäajen woa ekj miene Macht jäajen die brinjen un de Velkja loten die bestälen. Du woascht mank de Velkja utjerot woaren un von mank de Lenda een Enj haben. Du woascht gaunz venicht woaren, daut du woascht enseenen, daut ekj de HAR sie.

⁸Dit es waut Gott de HAR sajcht: Moab un Seir sajen, daut daut judsche Volkj nuscht veschieden es von aule aundre Velkja.

⁹Oba nu horcht, ekj woa daut groote Eewa en Moab aufriemen, bat aul de Städa en dee gaunze Jäajent venicht sent. Soogoa de aunjeseene Städa, Bet Jeschimot, Baal Meon, un Kirjatajim.

¹⁰Daut Volkj vom Oosten woat junt, toop met de Amonita, opp emma ennämen, un ekj woa daut soo romkomen loten, daut jie nich mea woaren aus een Volkj aunjeseenen woaren.

¹¹Ekj woa daut Jerecht loten äwa Moab komen, un see woaren enseenen, daut ekj de HAR sie.

¹²Dit es waut Gott de HAR sajcht: Wiels Edom Rach jeeeft haft aun Juda un sikj met daut sea veschulcht haft,

¹³woa ekj miene Macht jäajen Edom komen loten un äare Menschen un äa Vee utroden, soo daut aules vedorwen es von Teman bat Dedan. Dee woaren unja daut Schwieet faulen. Soo sajcht Gott de HAR.

¹⁴Un ekj woa mie derch mien Volkj Israel aun Edom rajchen, un dee woaren met Edom omhäa gonen, doano aus see mie enjeoajat un veläajen jemoakt haben. Soo woaren see to feelen kjrieen, woo ekj trigjtol, sajcht Gott de HAR.

¹⁵Dit es waut Gott de HAR sajcht: Wiels de Filista aun mien Volkj äare Rach jeeeft haben un mien Volkj soo onen Jewessen venicht haben,

¹⁶doawäajen sajcht Gott de HAR: Horcht, ekj woa miene Macht jäajen de Filista komen loten, un woa de Kreeta utroden, un de latste, waut aum Mäa äwabliewen, ombrinjen.

¹⁷Ekj woa mie aun an rajchen un an groff bestrofen, un see woaren enseenen, daut ekj de HAR sie, wan ekj an trigjtol.