Read Plautdietsch (Low German) – De Bibel Hesekiel 27 Bible Online

Hesekiel 27 - Plautdietsch (Low German) – De Bibel bible

Hesekiel 27

¹Un mie wort noch wada kloa, waut de HAR to sajen haud. Hee säd:

²Menschensän, fang emol aun dit Trualeet äwa Tierus to sinjen.

³Saj to de Staut aum Mäa, dee met de Velkja oppe Inseln haundelt: Dit sajcht Gott de HAR: Tierus, dee du von die sajchst, du best de schmokste Staut,

⁴un strakjst die wiet bat opp daut Mäa. Du best soo aus daut schmokste Schepp waut Bumeista wua buen;

⁵de Bräda sent von Taunenholt, de Schepspost Zeedaholt von Libanon un Senir jeholt,

⁶de Roodeln sent von Ieekjenholt von Baschan häa jeholt, de Fluaren sent von Taunenholt vom Launt von de Kittäa met Aulfenbeen vezieet.

⁷Daut Säajel von Ägipten es von utjeneidet Lienzeich, un deent aus diene Flag. Un bleiwe un bleiwroode Dakjen sent von daut Elischa Volkj.

⁸Toom roodlen wieren stoakje Mana, von Sidon un Arwad, oba de kluaka aun daut Stia wia doch von Tierus selfst.

⁹Jewizte Mana von Gebal veschmäaden june Schäp; de Schäp von väle Lenda kjeemen un koften von jun Woa.

¹⁰Von Persien, Liedia un von Libien kjeemen stoakje Soldoten un deenden en diene Armee. Een jiedra honk sien Schilt un Hoot en june Staut un jeef junt groote Aunerkjanunk.

¹¹De Wajchta oppe Torms, dee wieren von Helek un Arwad, un wäaden jäajen jieda Fient. De Waunt, dee honk voll Schilten, soo straum leet kjeene aundre Staut.

¹²Jie kunnen Haundel driewen met Tarsis wiels jie soo rikj wieren. Jie hauden Selwa, Iesa, Zink, un Blie toom Haundel.

¹³Jawan, Tubal un Meschech haundelden met junt fa Sklowen un koppane Sachen.

¹⁴Jie haundelden june Sachen met Togarma un jie koften junt Mulasch von an un Pieed, waut jie toom Kjrich un uk fa jeweenelje Oabeit brukten.

¹⁵De Lied von Rodos un aundre Inseln haundelden met junt, un doaderch kjrieej jie Aulfenbeen un schwoatet Holt von Afrika.

¹⁶De Edomita haben väl von junt jekoft, un brochten junt kostboare Turkis Steena, bleiwet Zeich, utjeneide Sachen, feinet Lienzeich, Korralen un Rubinen.

¹⁷Juda un Israel vehaundelden Weit, Oliewen, Fiejen, Honnich, Eelj un Kjeen fa june Sachen.

¹⁸Damaskus haft välet jekoft von aul daut veschiedne waut jie häastalden, un brocht junt Wien von de Helbon Jäajent un Woll von Zahar.

¹⁹Wedan un Jawan haben die straume iesane Sachen, Kerneel un stoakjet Baunt von Usal jebrocht.

²⁰Von Dedan kofst du die Pieets Dakjen fa de Rittasch.

²¹Von de Araba un von de Leidasch von Kedar kofst du de baste Schop un Kosen, wan see kjeepen kjeemen.

²²De Haundelslied von Saba un Ragma kjeemen met däm basten Balsam, met veschiedne kostboare Steena, un met goldne Sachen un haundelden opp junen Moakjt.

²³Doa wieren uk Haundelsmana von Haran, Kane un Eden, un soogoa von Assur un Medien.

²⁴Von doa kofst du äare baste Kjleeda, dee von bleiwet Zeich jemoakt wieren un dan noch utjeneit un bunte Fluadakjen un Strank un Benja, dee jie opp jun Moakjt vekoften.

²⁵De Tarsis Schäp fuaren rom no de Sachen waut jie haundelden. Bat wiet oppem Mäa rieekjt dien Rikjtum.

²⁶De Seemana fuaren met die opp daut Mäa bat een Oostwint oppkjeem un wiet opp daut Mäa die veschluach.

²⁷De Sachen, de Woa un daut Straums, met Seemana un Stieemana toop, un Bumeista un Hendla von Woa, un aul de Soldoten bie junt, un Häaden von Menschen bie junt vesinkjen doa wiet opp daut Mäa, aum Dach wan jun Enj opp junt kjemt.

²⁸De Seemana schrieen soo lud, daut daut Launt aun daut Mäa zetren deit.

²⁹De Roodla un Stieemana met aul de Scheppmana, dee stieen fuaz auf un stonen opp daut Launt,

³⁰un schrieen un hielen äwa die. See streien sikj Ieed opp däm Kopp un setten en Schaund enne Ausch.

³¹See schnieden de Hoa von de Kjap un trakjen daut Sakkjleet sikj aun, em Trua fa die, un see schrieen un hielen bloos bettalich lud.

³²Em Trua woat een Leet aunjestemt un Tronen jewescht äwa die; es jeemols eene Staut soo aus jie, soo stell jemoakt wiet opp daut Mäa?

³³Diene Woa von daut Mäa freid soo väl, un Kjennichs, dee worden dan rikj, vom haundlen met Sachen von die.

³⁴Nu es nuscht von de Staut hia jebläwen, dee es en daut Mäa nenjerutscht, de Woa un de Menschen tojlikj sent wajch, un nu es aules to nuscht.

³⁵De Lied opp daut Launt un aum Mäa, dee stuzt daut, woo die daut nu jeit; de Kjennichs vetrakjt daut Jesecht, soo jrämen un enjsten see sikj.

³⁶De Haundelsmana wiet rom de Welt, dee zetren un tieren sikj nu; soo groff un soo schwind best veschwungen, un kaust nich mea oppstonen.