Read Plautdietsch (Low German) – De Bibel Hesekiel 28 Bible Online

Hesekiel 28 - Plautdietsch (Low German) – De Bibel bible

Hesekiel 28

¹Un mie wort wada kloa, waut de HAR to sajen haud. Hee säd:

²Menschensän, go un saj däm Leida en Tierus: Dit es waut Gott de HAR sajcht: Wiels du soo prauzich worscht un dochst: “Ekj sie nu Gott; ekj hab nu eene Städ aus een Gott oppem Mäa.” Oba du best je bloos een Mensch un nich Gott, uk wan du die en dien Hoat jleefst, daut du met een Gott sust jlikj jetrocken woaren.

³Du jleefst du best kjlieekja aus Daniel, daut doa nuscht es waut du nich aul weetst,

⁴un du jleefst daut de Weisheit auleen, die haft Krauft opp jebut, daut du nu, aul daut Selwa un Golt en die hast.

⁵Un du jleefst die em Haundlen soo weis, un vedeensd soo väl Jelt en dee Tiet, daut du stolt best jeworden en die, un jleefst, daut bloos du hast soone Krauft.

⁶Dit es waut Gott de HAR nu sajcht, wiels du die en dien Hoat met eenen Gott jlikjtrakjen deetst:

⁷Horch waut ekj saj: Ekj woa Fiend opp die schekjen, dee ruchloos un stoakj met die omgonen woaren. Un äa Schwieet woat de Weisheit mank junt gaunz venichten, un Straums von de Staut gaunz vedoawen.

⁸Du woascht rauf jeschupst en daut Loch, un em Mäa deep em Wota, dän Doot un daut Enj von dien Läwen, toobrinjen.

⁹Un nu saj, woascht du doa bie dien Doot uk noch sajen, du best doch een Gott, wan du ensitst de Macht äwa die, un du bloos een Mensch best un kjeen Gott?

¹⁰Derch de Macht von de framde kjemst om, un du stoafst aus een onbeschnädna, dit lot jesajcht sennen von Gott däm HARN.

¹¹Mie wort wada kloa, waut de HAR to sajen haud. Hee säd:

¹²Menschensän, sinj emol dit Trualeet äwa däm Kjennich von Tierus. Gott de HAR sajcht: Du wieescht soo straum aus irjentwäa, soo kluak un bloos soo schmock,

¹³du wieescht em Goaden Eden dan, von Gott soo straum jekjleet, met Sarder, Topas, Diamaunt, un Turkis, Onniks noch, un Jaspies, Safier, Malachit, un Smaracht, diere Steen en Golt jesat un schmock jewoakjt, aum Dach aus du mol kjeemst.

¹⁴Du wieescht een Cherub dän ekj aunstald, Wajchta opp dän heiljen Gottesboajch to sennen; un jinjst opp fieeje Steena.

¹⁵Gaunz onen Schult wieescht du von dan, aus du noch gaunz kjlien wieescht, bat eemol beeset jefungen wort en woo du läwen deetst.

¹⁶Du haundelsd don met soo väl Woa, de Macht wort die to Sind, dan must ekj die, du Wajchta Cherub, vom Gottesboajch vesteeten, von mank dee fieeje Steen veschmieten.

¹⁷Du leetst soo schmock un worscht uk stolt, de Weisheit dee du hautst, vedreidsd du, om dien Straums to hoolen; ekj klunjd dien Stolt dol bat em Blott un leet die een Spikjtoakel woaren,

¹⁸Du brochst eene Schaund opp dien Heilichtum derch onopprechtjet Haundlen un dee väle Sinden doa; daut ekj een Fia en diene Medd woa loten aules vebrennen, bat du ver aulem wäa doa kjikjt bloos Ausch best oppe Ieed.

¹⁹Du best soo schrakjlich hanjerecht. Een jiedra dee die kjant, däm schudat daut un es vestalt. Noch eemol kaust nich opp.

²⁰Un mie wort wada kloa, waut de HAR to sajen haud. Hee säd:

²¹Menschensän, kjikj emol no Sidon un profezei äwa dee Staut:

²²Dit es waut Gott de HAR sajcht: Du Sidon, nu horch häa, veräakjent mott met die. Ekj woa en diene Medd nu miene Harlichkjeit bewiesen, daut du sitst, daut ekj de HAR sie. De Staut mott ver Jerecht, un seenen hia un nu, daut ekj de Heilja sie.

²³Ekj schekj eene Krankheit han, dee väle nich bestonen, un oppe Gaussen woat daut Schwieet soo väle schlonen, daut jie daut dan woaren seenen, de HAR haft daut jedonen.

²⁴Doa woat dan kjeent von de Nobasch rom Israel, dee an veacht haben, noch lenja een Stachel fa an sennen, dee an spekjt ooda wee deit.

²⁵Dit es waut Gott de HAR sajcht: Wan ekj wada de Israeliten von mank de Velkja, wua ekj dee nu vestreit hab, vesaumlen woa, dan woa ekj mie ver aule Velkja derch an wiesen, daut ekj heilich sie. Un see woaren en äa Launt wonen, daut ekj Jakob, dee mie deend, jejäft hab.

²⁶See woaren doa en Fräd läwen un sikj äare Hiesa buen un Wiengoades aunplaunten. See woaren onvestieet wonen wan ekj ieescht äare Nobasch, dee an veachten deeden, ver Jerecht jenomen hab. Dan woaren see weeten daut ekj de HAR, äa Gott sie.