Read Plautdietsch (Low German) – De Bibel Hesekiel 29 Bible Online

Hesekiel 29 - Plautdietsch (Low German) – De Bibel bible

Hesekiel 29

¹Aun däm 12. Dach von de 10. Moonat, en daut 10. Joa, wort mie kloa waut de HAR to sajen haud. Hee säd:

²Menschensän, recht die emol no Ägipten opptoo, un profezei äwa däm ägiptischen Kjennich un daut gaunze Launt.

³Saj to an: Dit es waut Gott de HAR sajcht: Horcht no waut ekj saj: Ekj mott met die veräakjnen, du Kjennich von Ägipten. Du groota Krokodiel em Niel, du lichst doa bloos un jleefst daut de Riefa die jehieet, daut du die dän jemoakt hast.

⁴Oba ekj woa een Hoaken en dien Mul nenn moaken un loten de Fesch von däm Riefa aun diene Scheepen naun henjen. Un ekj woa die ut daut Wota rutschlapen, met aul de Fesch von däm Riefa noch faust aun diene Scheepen.

⁵Ekj woa die un diene Fesch von däm Riefa siene Oarms enne Wiltnis schmieten. Du woascht oppe Ieed faulen, un kjeena woat die opphäwen, kjeena die begrowen. Ekj woa de wille Tieren un de Väajel loten komen un fräten die opp.

⁶Un aul de Lied en Ägipten woaren enseenen, daut ekj de HAR sie. Du best fa Israel een holla Stock jewast;

⁷wan see met de Haunt no die graupsten, bruakst du twei un stuakst an en beid Schulren; un wan see sikj opp die länden, bruakst du twei un jieda Foot stolpad.

⁸Un nu sajcht Gott de HAR wäajen die: Horch emol, ekj woa daut Schwieet loten äwa die komen, daut Menschen un Vee stoawen motten.

⁹Un Ägipten woat eene vedorwne Wiltnis un een Ollaunt sennen, un dan woaren see enseenen daut ekj de HAR sie. Wiels du jleefst, daut de Riefa diena es, un daut du dän jemoakt hast,

¹⁰woa ekj met die un met diene Riefasch noch veräakjnen. Ekj woa daut Launt to eene vedorwne Wiltnis un Ollaunt moaken von Migdol bat Sieen un bat aun de Jrens von Kusch.

¹¹Doa woat kjeen Mensch ooda Tia derch dien Launt gonen; fa 40 Joa woat doa kjeena wonen.

¹²Ekj woa Ägipten to eene Wiltnis enne Medd von velotne Jäajenden moaken, un äare Städa to Steenahupes moaken mank vedorwne Städa. Fa 40 Joa woa ekj de Ägipta mank de Velkja vestreien un en de Lenda vejoagen.

¹³Dit es waut Gott de HAR sajcht: Wan de 40 Joa ieescht äwa sent, woa ekj de Ägipta wada toopsaumlen von mank de Velkja wua dee vestreit woaren sennen.

¹⁴Un ekj woa de Ägipta äa Toostaunt wada bäta moaken un an loten en Patros wonen, von wua see emol kjeemen, un doa een kjlienet Kjennichrikj sennen.

¹⁵See woaren kjlanda sennen aus aundre Lenda un sikj nich mea äwa aundre Lenda häwen. See woaren eent von de kjlanste Lenda sennen un nich äwa aundre Velkja jebeeden.

¹⁶Wan Israel doaraun denkjen woat, daut see sikj emol opp an veloten haben, dan woaren see sikj bloos schämen. Un see woaren enseenen, daut ekj Gott de HAR sie.

¹⁷Un dan aun dän 1. Dach von de 1. Moonat en daut 27. Joa, wort mie kloa, waut de HAR to sajen haud. Hee säd:

¹⁸Menschensän, de babelonischa Kjennich Nebukadnezar haft siene Armee sea schwoa loten jäajen Tierus schaufen. See haben sikj de Kjap kol jeschieet un de Schulren derchjeräwen met aul de Oabeit. Oba aul daut aunstrenjen jäajen Tierus haft sikj nich betolt; nich fa däm Kjennich, un nich fa siene Armee.

¹⁹Un nu sajcht Gott de HAR: Horch emol. Ekj woa däm babelonischen Kjennich Nebukadnezar loten Ägipten ennämen. Dee woaren dee bestälen un beplindren un äare wieetvolle Sachen wajchdroagen, un soo woat de Armee äa Loon kjrieen.

²⁰Doafäa daut see sikj fa mie jäajen Tierus bemieejden, woa ekj an loten Ägipten ennämen. See haben fa mie jeschauft, sajcht Gott de HAR.

²¹Un wan daut ieescht kjemt, dan woa ekj de Israeliten wada äare Macht jäwen, un du woascht räden un aunjeseenen sennen, un see woaren enseenen daut ekj de HAR sie.