Read Plautdietsch (Low German) – De Bibel Hesekiel 3 Bible Online

Hesekiel 3 - Plautdietsch (Low German) – De Bibel bible

Hesekiel 3

¹Un hee säd to mie: Menschensän, at waut du ver die hast. At dise Schreftroll, waut hia ver die es, un dan go un räd to de Israeliten.

²Un ekj muak mien Mul op un eet de Roll dee hee mie jeef.

³Un hee säd to mie: Menschensän, du saust dise Schreftroll, dee ekj die jäw, oppäten, un dien Buck doamet fellen. Un ekj eet dee, un mie schmakjt dee soo seet aus Honnich.

⁴Un hee säd to mie: Menschensän, go no de Israeliten un lot an weeten, waut miene Wieed sent.

⁵Ekj schekj die nich no een Volkj waut eene framde Sproak haft. Ekj schekjt die no de Israeliten.

⁶Ekj schekj die nich no soone Velkja, dee eene framde Sproak ooda met schwoare Wieed räden, soone aus du nich vestonen wurscht. Wan ekj daut deed, wudden see no die horchen.

⁷Oba de Israeliten wellen nich no die horchen, wiels see wellen mie nich hieren. Daut gaunze Volkj es heltablessich un ieejenkoppich.

⁸Oba ekj woa dien Jesecht soo stiew moaken aus äat es, un dien Stiern soo hoat aus äara es.

⁹Ekj hab dienen Stiern soo hoat aus een Diamaunt jemoakt, dee doch hoada aus een Fiasteen es. Nu brukst du die nich enjsten, un die daut nich aunjriepen loten, wäajen waut see doonen. See sent een stieekopjet Volkj.

¹⁰Un hee säd to mie: Menschensän, horch no aules waut ekj die saj, un nemm daut to Hoat.

¹¹Un go no de veschlapte von dien Volkj un räd to an. Saj an: “Dit es waut Gott de HAR sajcht”, eendoont auf see doano horchen ooda nich.

¹²Un aus däm HARN siene Harlichkjeit von doa opphoof, hoof de Jeist mie opp. Un ekj hieed hinja mie een grootet Jetees, soo aus een Ieedbäben.

¹³Daut ruzhen kjeem von de Flichten von de vea, dee eena aum aundren schluagen, un uk daut Jelud von de Räda, waut biesied an wieren. Aules toop wia daut een Jetees aus bie een grootet Ieedbäben.

¹⁴De Krauft vom HARN kjeem stoakj opp mie, un sien Jeist hoof mie opp un neem mie wajch. En mie wia ekj betta un vestieet.

¹⁵Un ekj kjeem no de Grupp von veschlapte, waut en Tel Abib bie däm Kebar Riefa wonden. Fa säwen Doag saut ekj doa veduzt von aules, waut ekj jeseenen haud.

¹⁶Aus dee säwen Doag om wieren, wort mie wada kloa waut de HAR von mie wull:

¹⁷Menschensän, ekj hab die aunjestalt daut du saust een Wajchta sennen fa de Israeliten, un du saust an en mienen Nomen woarnen, jiedatsmol wan du een Wuat von mien Mul hieescht.

¹⁸Wan ekj äwa eenem, dee nich aun mie jleeft, saj, dee woat stoawen, un du sajchst am daut nich un woarnst am nich, daut dee met siene Sind opphieet un dän Wajch läwen kaun, dan woat dee waut nich aun mie jleeft en siene Sind stoawen, un du woascht schuldich sennen ver mie, daut dee soo jestorwen es.

¹⁹Oba wan du däm Sinda woarnst, un dee nich opphieet met de Sinden en sien Läwen, woat dee en de Sind stoawen, oba du woascht dien Läwen jerat haben.

²⁰Ooda, wan een jerajchta Mensch von sien jerajchtet Läwen wajchdreit, un orrajcht deit, dan woa ekj am tofaul brinjen un dee woat stoawen. Hee woat en siene Sind stoawen un sien jerajchtet Läwen woat am nich toojeräakjent sennen; un wiels du am nich jewoarnt hast, woascht du veauntwuatlich sennen fa sien Doot.

²¹Oba wan du däm jerajchten woarnst daut hee nich Sind begonen saul, un hee deit nich sindjen, dan woat hee läwen. Soona haft sikj woarnen loten un du hast dien Läwen jerat.

²²Un dan kjeem daut, daut de Krauft vom HARN stoakj opp mie kjeem, un hee säd to mie: Sto opp un go oppe Stap. Doa woa ekj to die räden.

²³Un ekj stunt opp un jinkj oppe Stap nopp; un weetst waut, doa stunt däm HARN siene Harlichkjeit, soo aus ekj dee biem Kebar Riefa jeseenen haud. Un ekj foll oppem Jesecht han.

²⁴Un de Jeist fua en mie nenn, un stald mie opp miene Feet. Un hee säd to mie: Go emol un schlut die en, en dien Hus.

²⁵Un Menschensän, see woaren Strenj aun die brucken un die faustbinjen, soo daut du nich mank de Lied gonen kaust.

²⁶Ekj woa die diene Tung aum Bän von dien Mul aunbaken loten, soo daut du nuscht sajen kaust un an nich mea dän rajchten Wajch wiesen kaust. Dit es wiels dee soon stieekopjet Volkj sent.

²⁷Dan oba wan ekj met die räden woa, dan woa ekj dien Mul opmoaken, daut du an wada sajen kaust: “Dit es waut Gott de HAR sajcht.” Un wäa doano horchen well, däm lot horchen, un wäa doa nich no horchen woat, däm lot toch. Wiels dit es een stieekopjet Volkj.