Read Plautdietsch (Low German) – De Bibel Hesekiel 31 Bible Online

Hesekiel 31 - Plautdietsch (Low German) – De Bibel bible

Hesekiel 31

¹Aun dän 1. Dach von de 3. Moonat en daut 11. Joa, wort mie kloa, waut de HAR to sajen haud. Hee säd:

²Menschensän, saj emol to däm Kjennich von Ägipten un to sien grootet Volkj: Wäa wia noch soo groot un stoakj aus du?

³Horch emol no waut ekj saj: Die jeit daut aus een Boom en Libanon, dee straum voll Asta stunt un dicht met Loof bewossen wia, un huach no de Wolkjen rieekjt.

⁴Dee woss soo steil un groot, wiels deepet Wota kjwald runtom en Streem vebie, un wessad wieda oppe Stap uk aundre Beem.

⁵Soo woss dee jrata aus sest Beem opp jane Stap; de Asta wieren lank un stoakj un dikj belooft, vom Wota en de Grunt.

⁶De Väajel saden sikj en Nasta opp jieda Aust, un Tieren trocken junge opp em Schauten von däm Boom. Un jieda grootet Volkj wond unja disen Boom.

⁷De Boom wia groot un schmock, haud lange Asta rut; de Wartlen jinjen rauf wua scheenet Wota lach.

⁸Kjeene Zeeda, waut doa noch en Gott sien Goaden wieren, leeten krakjt soo schmock aus dee. Kjeen Fichtenboom sien Aust wia met disen Boom to vejlikjen. Platanen Asta sent aus nuscht biesied dit hia. En Gott sien Goaden wia nich noch een Boom, dee doa soo schmock jewossen wia.

⁹De HAR muak dän soo schmock voll straumet schmocket Loof, daut jieda Boom dän Gott en Eden haud jesat, aufjenstich von dit wieren.

¹⁰Un nu sajcht Gott de HAR: Wiels hee soo groot wort un siene Asta bat enne Wolkjen nenn rieekjten, un sikj dan groot deed, daut hee soo huach jewossen wia,

¹¹leet ekj de Macht von daut stoakjste von de Velkja opp am komen, daut dee äwa an häajinjen un an bestroften fa daut beese, waut see jedonen hauden. Un ekj vedreef an.

¹²Soone framde, dee daut jewaultmässichste von de Lenda sent, schmeeten an om un leeten an ligjen. Siene Asta follen oppe Boaj un enne Täla, un sien Struck wia fien vebroaken en aule Läachten em Launt. Aul de Velkja oppe Ieed, dee äaren Schauten doa jekjräajen hauden, musten aundatwäajes hangonen.

¹³De Väajel kjeemen un saden sikj opp däm jefolnen Boomstaum, un de wille Tieren läden sikj oppe Asta dol.

¹⁴Aul dit passieet, soo daut kjeen Boom, waut goot jewessat es, woat soo groot waussen un siene Spetz bat enne Wolkjen rieekjen, un soo huach oppjehowen woaren. Soo aus jieda Boom, dee biem Wota to stonen kjemt, omfaulen un vekomen woat, soo woat de Macht von jieda Volkj tofaul komen un vefulen, soo aus uk aule Menschen. Een jiedra mott emol stoawen un rauf jelajcht enne Ieed, soo jeit daut met aule Menschen, soo haft Gott daut enjefieet.

¹⁵Dit es waut Gott de HAR sajcht: Aun dän Dach wan de Boom stoaft un deep enne Ieed to ligjen kjemt, woa ekj daut Gruntwota loten äwa am truaren un de Riefasch woaren opphieren met ranen, soo daut väle groote Wotasch vegonen. De Libanon Woolt woat sea truaren äwa am, un aule Beem oppe Stap woaren vedrieejen.

¹⁶Aule Velkja woaren sikj schudren wan see hieren woo dee felt, un daut hee jestorwen un begroft es. Un unjare Ieed, treesten sikj aule Beem von Eden, un uk aul de schmokste un de baste von Libanon, dee bie een Wota jestonen hauden.

¹⁷Aule Kjennichs woaren äwareen em Doot nengonen, soo aus dee waut em Kjrich follen; un dee, dee sikj met Ägipten hilden, woaren krakjt soo stoawen.

¹⁸Wia doa en Eden wua een Boom, dee soo groot un soo stoakj wia? Oba du woascht met de Beem von Eden toop begroft woaren, un met dee toop to ligjen komen, dee nich beschnäden sent ooda dee em Kjrich omkomen. Daut es woo däm ägiptischen Kjennich un sien stoltet Volkj daut gonen woat, sajcht Gott de HAR.