Read Plautdietsch (Low German) – De Bibel Hesekiel 32 Bible Online

Hesekiel 32 - Plautdietsch (Low German) – De Bibel bible

Hesekiel 32

¹Dan aun dän 1. Dach von de 12. Moonat en daut 12. Joa, wort mie kloa, waut de HAR to sajen haud. Hee säd:

²Menschensän, stemm een Trualeet aun äwa däm ägiptischen Kjennich. Saj to am: Du groota Leiw mank de Lenda, diene Tiet es vebie. Du wieescht aus een Krokodiel em Mäa, aus du en de Riefasch schnaksen deetst, un daut Wota soo opprieezhd met diene Feet. Du muakst daut Wota gaunz dunkel.

³Dit es waut Gott de HAR sajcht: Ekj woa mien Nat äwa die schmieten wan väl Velkja toopkomen, un du woascht met Strenj tosied jeschlapt woaren.

⁴Ekj woa die oppem Launt nopp schlapen, un die oppe Stap schmieten, soo daut aule Väajel enne Loft opp die setten woaren, un aule Tieren von oppe Ieed sikj aun die saut fräten.

⁵Ekj woa dien Fleesch oppe Boaj schmieten un de Täla met dien Aufgank oppfellen.

⁶Ekj woa daut Launt bat aun de Boaj loten voltrakjen von dien Bloot, un de Läachten loten met dien Aufgank schälen.

⁷Un wan ekj die utroden woa, woa ekj dän Himmel dunkel moaken un de Stierns bedakjen; ekj woa Wolkjen ver de Sonn trakjen un de Mon nich schienen loten.

⁸Aul de kloare Lichta, dee enne Loft schienen, woa ekj doff moaken, un daut woat diesta woaren en dien Launt, sajcht Gott de HAR.

⁹Daut woat väle Velkja veschrakjen, soo aus jie woaren faustjenomen woaren un ekj junt mank de Lenda vestrei, dee du nich kjanst.

¹⁰Väle Velkja woaren sikj tieren äwa die, un äare Kjennichs woat daut äwa junt schudren, wan see mien Schwieet seenen woaren. Kjeena woat sikj sien Läwen secha sennen aun dän Dach wan jie faulen woaren.

¹¹Dit es waut Gott de HAR sajcht: De Kjennich von Babel woat met sien Schwieet opp junt komen.

¹²Ekj woa jun Volkj venichten met daut Schwieet von stoakje Mana, von de hunjschste Lenda. Dee woaren aul daut groosoatje en Ägipten vedoawen, un june väle Menschen ombrinjen.

¹³Un ekj woa aul äare Tieren ombrinjen, von biesied de groote Riefasch; kjeen Mensch woat doa mea nenstaupen un kjeen Vee dän Blott opprieren.

¹⁴Dan woa ekj dee äare Wota kloa moaken, un de Riefasch woaren ranen aus Eelj, sajcht Gott de HAR.

¹⁵Wan ekj Ägipten woa to eene Wiltnis moaken, un daut gaunze Launt ladich strikjen, un aul de Menschen doa woa ombrinjen, woaren see enseenen, daut ekj de HAR sie.

¹⁶Dit es een Trualeet daut see sinjen woaren, un de Frues enne Lenda woaren daut sinjen, äwa Ägipten un daut stoakje Volkj, sajcht Gott de HAR.

¹⁷Dan aum 15. Dach von de Moonat, en daut 12. Joa, wort mie kloa, waut de Har to sajen haud. Hee säd:

¹⁸Menschensän, drekj dienen Trua ut äwa daut groote ägiptische Volkj, un schekj an met de aundre Velkja von de groote Lenda, deep enne Ieed nenn, bat wua dee begroft sent.

¹⁹Best du noch emma schmocka aus aundre? Rauf met die un lot die doa hanlajen, wua de onbeschnädne, dee Gott sienen Wajch nich kjanen, sent.

²⁰De Ägipta woaren mank dee to ligjen komen, dee met daut Schwieet omkomen. Daut Schwieet es rutjetrocken. Daut Volkj un aul äare Menschen woaren wajchjeschlapt woaren.

²¹De stoakje Mana mank dee waut jestorwen sent, woaren von an sajen: Dee sent raufjekomen un nu ligjen de onbeschnädne, un dee waut vom Schwieet omjekomen sent, doa.

²²Assur licht doa met äa gaunzet Volkj, un äare Jräwa sent doa runtom. Dee sent aula vom Schwieet omjebrocht.

²³Dee haben äare Jräwa gaunz aun de butakaunt von wua de Doodes ligjen, un daut Volkj licht doa runtom. Aule, dee emol soone Angst en de Velkja aunräajden, sent von daut Schwieet omjebrocht.

²⁴Un doa licht uk Elam, un runtom en äare Jräwa daut gaunze groote Volkj. Dee sent aula met daut Schwieet omjekomen un sent onbeschnäden rauf jegonen un begroft. To eene Tiet enjst een jiedra sikj fa an, oba nu motten see äare Schaund met dee toop droagen, dee vestat sent.

²⁵Elam es doa hanjelajcht, wua dee, dee omjebrocht wieren, sent, un sien gaunzet grootet Volkj haft äare Jräwa doa runtom. Nu sent daut aules soone aus dee waut onbeschnäden ooda met daut Schwieet omjebrocht sent, wua dee doch emol aule Menschen enjsten deeden. Nu motten see äare Schaund droagen, krakjt soo aus dee waut vestat sent un waut em Kjrich omjebrocht sent.

²⁶Meschech un Tubal sent doa, un de Jräwa von dee waut to an jehieeden, sent doa runtom an, aula soo aus dee waut onbeschnäden sent un dee waut met daut Schwieet omjebrocht wieren, fa dee sikj doch ieescht aule Menschen enjsten.

²⁷Dee ligjen nich met de stoakja Mana von jane Tiet aus dee met äa Jewäa toop begroft worden; dee hauden daut Schwieet unjarem Kopp un äa Schilt äwa äare Knoakes. Daut wieren stoakja Mana, dee aule Menschen Angst enjuagen.

²⁸Un uk jie Ägipta woaren mank de onbeschnädne ligjen, un bie dee waut von daut Schwieet omjebrocht woaren.

²⁹Un doa licht Edom met siene Kjennichs un aul siene Leida, dee waut soo stoakj wieren, oba nu met dee sent, waut vom Schwieet omjebrocht sent. Nu ligjen see met dee, dee onbeschnäden begroft sent.

³⁰Un doa sent uk aul dee Leida vom Nuaden un aul dee von Sidon, dee vom Schwieet omjebrocht sent. Äare groote Macht es to nuscht jeworden, un see motten met de onbeschnädne ligjen un met dee waut vom Schwieet omjebrocht sent. Nu motten see de Schaund opp sikj nämen, krakjt soo aus dee, dee vestat sent.

³¹Wan de Kjennich von Ägipten dee seenen woat, woat am daut treesten wäajen sien grootet Volkj. De Kjennich von Ägipten un siene gaunze Armee sent von daut Schwieet omjebrocht, sajcht Gott de HAR.

³²Ekj leet däm ägiptischen Kjennich aule Menschen veenjsten, oba nu licht hee met sien grootet Volkj toop met dee waut onbeschnäden un waut von daut Schwieet omjebrocht sent, sajcht Gott de HAR.