Read Plautdietsch (Low German) – De Bibel Hesekiel 35 Bible Online

Hesekiel 35 - Plautdietsch (Low German) – De Bibel bible

Hesekiel 35

¹Un mie wort wada kloa, waut de HAR to sajen haud. Hee säd:

²Menschensän, kjikj emol no de Seir Boaj un profezei äwa Edom.

³Saj an: Dit es waut Gott de HAR sajcht: Horcht emol, ekj mott noch met junt, Seir Boaj, veräakjnen. Ekj woa miene Macht jäajen junt utstrakjen un woa jun Launt to een vewoaloosdet un ladjet Launt moaken.

⁴Ekj woa june Städa vedoawen, un kjeena woat en jun Launt wonen. Un jie woaren enseenen, daut ekj de HAR sie.

⁵Wiels jie emma wajch june Fientschoft met Israel fläajden, un an met daut Schwieet ombrochten, to dee Tiet aus an aules toopbruak, un to dee Tiet aus äare latste Strof opp an kjeem,

⁶saj ekj, Gott de HAR, gaunz kloa, daut jie woaren bleeden motten. Jie woaren nich onen dän Doot doavon komen. Jie sent schuldich von Läwen nämen, un jun Läwen woat jefoddat woaren.

⁷Ekj woa de Seir Boaj to eene Wiltnis moaken un ladich loten. Ekj woa doa aulem utroden, wäa doa noch han un trigj trakjt.

⁸Ekj woa june Boaj met Doodes bedakjen; opp june läaje Boaj, en de Täla, un delenjd de Riefasch woaren aulawäajen dee ligjen, dee omjebrocht sent.

⁹Ekj woa daut opp emma ladich loten, un kjeena woat mea en de Städa wonen. Un jie woaren enseenen, daut ekj de HAR sie.

¹⁰Wiels du sätst, daut dise beid Lenda, Israel un Juda, met äare twee Velkja sullen diene sennen, un daut du dee ennämen wurscht, wan de HAR doa uk wond,

¹¹doawäajen sajcht Gott de HAR nu gaunz kloa, hee woat met krakjt soonen Oaja un soonen Iewa opp junt komen, aus jie en june Wutt opp an eewden. Un jie woaren mie kjanen lieren, wan ekj rechten woa.

¹²Un jie woaren weeten daut ekj, de HAR, aul jun Jelasta äwa de israelitische Boaj hieed, aus jie säden daut et ut met an wia un jie junt doa nu sautfräten kunnen.

¹³Soo hab jie junt groot jedonen, un haben frajch äwa mie jerät. Ekj hab daut jehieet.

¹⁴Dit es waut Gott de HAR sajcht: Ekj woa diene Jäajent soo vedoawen, daut aule Lenda sikj soo freien woaren,

¹⁵aus du die äwa daut Oafgoot von Israel freidsd, aus dee venicht worden. Dit es waut ekj met die doonen woa. Ekj woa aules opp de Seir Boaj un daut gaunze Edom gaunz venichten, un see woaren enseenen, daut ekj de HAR sie.