Read Plautdietsch (Low German) – De Bibel Hesekiel 4 Bible Online

Hesekiel 4 - Plautdietsch (Low German) – De Bibel bible

Hesekiel 4

¹Un de HAR säd: Menschensän, sieekj die eene Tieejel, un laj dee ver die han. Dan behak de Kaunten, soo daut dee de Staut Jerusalem väastalt.

²Un sat Dinja rom de Staut un lot de Dinja eene framde Armee väastalen. Moak daut soo daut et soo lat aus wan doa eene Armee rom de Staut es met Torms un oppjeschedde Humpels un Stukskjneppels.

³Un sat doa eene iesane Brodpaun jäajen de Staut, un sat dien Jesecht jäajen de Paun. Soont saul jäajen de Staut sennen, un du woascht jäajen de Staut sennen. Dit saul een Tieekjen sennen fa daut Volkj Israel.

⁴Dan saust du die opp diene linkje Sied lajen un Israel äare Strof opp dee droagen. Soo väl Doag aus du opp dee lichst, saust du äare Strof droagen.

⁵Ekj woa die sajen woo väl Doag du soo ligjen saust. Daut sent 390 Doag. Een Dach fa jieda Joa von äare Strof. Soo lang saust du de Strof von daut Volkj Israel droagen.

⁶Un wan daut derch es, saust du die opp diene rajchte Sied lajen, un fa 40 Doag de Schult von daut Volkj Juda droagen. Hia jäw ekj die uk eenen Dach fa een Joa.

⁷Dan stal dien Jesecht un dienen kolen Oarm jäajen Jerusalem, dee doa runtom besat es, un profezei jäajen dee Staut.

⁸Un, weetst, ekj binj Strenj om die, soo daut du die fa de gaunze Tiet nich von eene Sied no de aundre dreien kaust, bat du de Tiet von de Strof derch jemoakt hast.

⁹Ria die waut Weit, Joascht, Schaublen, Flaus, Oaften, Hieezh, un Spelz toop en een Dinkj, un moak waut Broot von daut. Daut saust du äten fa de gaunze Tiet, daut du opp diene Sied lichst, 390 Doag.

¹⁰Daut Broot saul die aufjemäten woaren. Du saust 250 Graum dän Dach kjrieen.

¹¹Un daut Wota saul uk toojemäten woaren. Du saust dree Kuffel dän Dach kjrieen.

¹²Du saust dise Brootkjes doa baken, wua aule Menschen daut seenen kjennen. Du saust dee bowa een Mestfia von Menschen Mest baken.

¹³Un de HAR säd: Soont woaren de Israeliten motten äten, wan see mank de Velkja veschlapt sent. See sellen soont Äten, waut no onse Jesazen orrein es.

¹⁴Un Hesekiel säd: Oba HAR Gott. Ekj hab noch nienich waut jedonen waut mie orrein muak. Von kjlien opp, hab ekj noch nienich Fleesch jejäten von een Tia daut von selfst doot jegonen wia, un uk nich von een Tia daut von aundre Tieren doot jemoakt wia. Ekj hab noch nienich Fleesch jejäten waut no onse Jesazen orrein es.

¹⁵Dan säd hee to mie: Na dan woa ekj die loten Mest von Vee brucken toom de Brootkjes baken enne Städ Mest von Menschen.

¹⁶Un hee säd uk noch to mie: Menschensän horch emol. Ekj woa daut soo rombrinjen daut nich mea Broot en Jerusalem nenn komen woat. Dan woaren see met beduaren äa Broot toomäten, un an woat daut too groff sennen, waut see to drinkjen kjrieen.

¹⁷Doa woat nich jenuach Broot un Wota sennen un see woaren sikj nich Rot weeten. See woaren veschmachten, wäajen de Schult dee see opp sikj jebrocht haben.