Read Plautdietsch (Low German) – De Bibel Hesekiel 41 Bible Online

Hesekiel 41 - Plautdietsch (Low German) – De Bibel bible

Hesekiel 41

¹Un hee brocht mie en de heilje Stow nenn, un hee maut de Past. Dee wieren 6 Ellen breet aun jieda Sied.

²Un de Däa wia 10 Ellen breet, un de Wenj aun jieda Sied von de Däa wieren 5 Ellen breet. Un hee maut de heilje Stow, un dee wia 40 Ellen bie 20 Ellen.

³Dan jinkj hee wieda nenn, un maut de Past aun de Däa; un dee wieren 2 Ellen. Un de Däa wia 6 Ellen breet, un aun jieda Sied Däa wia daut 7 Ellen.

⁴Un hee maut de Stow; un dee wia 20 Ellen, krakjt soo breet aus de heilje Stow, bie 20 Ellen. Un hee säd to mie: Dit es daut Aulaheilichste.

⁵Hee maut de Waunt von däm Tempel un dee wia 6 Ellen dikj. Un rom däm Tempel wieren Stowen aunjebut, un dee wieren 4 Ellen breet.

⁶Dise Stowen aun de butakaunt vom Tempel wieren dree stockich un doa wieren 30 Stowen opp jieda Stock. Dit wia soo jebut daut sikj daut selfst druach; de Stowen hilden sikj nich aun de Tempel Waunt.

⁷De Stowen, waut doa aun de butakaunt vom Tempel wieren, worden runtom opp jieda Stock een bät breeda, doano aus de Waunt dee jieda Stock druach denna wort. Un de Trap jinkj no daut ieeschte un dan no daut tweede Stock.

⁸De Foot von de Stowen runtom daut Jebied wia 6 Ellen, ooda de Lenjd von een Motstock, hecha aus de Hoff.

⁹Un de Butawaunt aun de Stowen aun de butakaunt vom Tempel wia 5 Ellen breet; un de opna Plauz von aun de Stowen aum Tempel,

¹⁰bat aun de Priesta äare Stowen, wia 20 Ellen rom dän gaunzen Tempel.

¹¹Doa wieren twee Däaren, dee von dän opnen Plauz no de Stowen aun butakaunt vom Tempel jinjen, eene aun de nuadne Sied, un eene aun de siedne Sied. Gaunz aun de Stowen aun de butakaunt vom Tempel wia een Stich, 5 Ellen breet.

¹²Daut Jebied, daut opp däm Hoff nom Wasten vom Tempel stunt, wia 70 bie 90 Ellen, un de Waunt wia runtom 5 Ellen dikj.

¹³De Tempel wia 100 Ellen lank, aus hee dän maut, un de Väahoff met Jebieda un Mieren wia uk 100 Ellen.

¹⁴Un de Hoff nom Oosten maut 100 Ellen met de väakaunt vom Tempel toop.

¹⁵Un hee maut daut Jebied opp däm Hoff, nom Wasten vom Tempel, un met Wenj toop wia daut 100 Ellen. Un de Väastow vom Tempel un de heilje Stow un de Aulaheilichste Stow

¹⁶wieren aula met Holt beschloagen. Un de dree Stowen hauden aula Fenstren un Fensta Rämes. Von de Schwal un wieda wia aules met Holt beschloagen. Un de Fenstren wieren toojehongen.

¹⁷Bat aun de bowakaunt von de Däaren, runtom un uk en daut Aulaheilichste, wia de Waunt utjeschnizt.

¹⁸Doa wieren Cheruben un Paulmbeem to seenen, emma een Paulmboom un dan een Cherub. De Cheruben hauden emma twee Jesechta.

¹⁹Daut Jesecht no dän eenen Paulmboom wia een Jesecht von een Mensch, un daut Jesecht no dän aundren Paulmboom wia een Jesecht von eenen jungen Leiw. Soo wia daut runtom em Tempel.

²⁰Dise Cheruben un Paulmbeem wieren en de Waunt jeschnizt von de Flua bat de bowakaunt von de Däa.

²¹Un de Däarenpast vom Tempel wieren to Winkjel. Un ver daut Aulaheilichste wia waut, daut leet no

²²een heltana Aultoa. Dee wia 3 Ellen huach un 2 Ellen bie 2 Ellen em veakaunt. Un de Akjen un de Foot un de Wenj wieren von Holt. Un hee säd to mie: Dit es de Desch dee ver däm HARN steit.

²³De heilje Stow un daut Aulaheilichste hauden jieda dobbelde Däaren.

²⁴Un jieda Däa haud twee Deelen, dee jieda oppoat opp Jehenjen wieren.

²⁵Un aun de Däa en de Väastow nenn, wieren uk Cheruben un Paulmbeem jeschnizt, soo aus aun de Wenj. Un doa wia een kjlienet heltanet Dak von buten äwa de Däa no de Väastow.

²⁶Un doa wieren Fenstren aun jieda Sied von de Väastow, un de Rämes wieren utjeschnizt met een Mosta von Paulmbeem.