Read Plautdietsch (Low German) – De Bibel Hesekiel 44 Bible Online

Hesekiel 44 - Plautdietsch (Low German) – De Bibel bible

Hesekiel 44

¹Dan brocht hee mie wada no daut butaschte Puat von de heilje Städ aun de oostne Sied, un daut Puat wia oba too.

²Un de HAR säd to mie: Dit Puat saul too bliewen. Daut saul nich opjemoakt woaren un doa saul kjeena derchgonen. Daut es wiels de HAR, dee Israel äa Gott es, doa derchjekomen es. Doawäajen saul daut nu too bliewen.

³Bloos de Volkjsleida doaf doa en de Väastow nengonen. Hee doaf doa nengonen un daut Opfamol ver däm HARN äten, wiels hee es een Volkjsleida. Hee saul dan derch de Väastow en daut Puat nenn, un uk rut gonen.

⁴Dan brocht hee mie no daut nuadne Puat, daut ver däm HARN sien Hus es. Un aus ekj doa soo kjikjt, sach ekj, daut de Tempel voll wia von däm HARN siene Harlichkjeit. Un ekj foll han opp mien Jesecht.

⁵Un de HAR säd to mie: Menschensän, paus sea opp; kjikj waut ekj doo un horch no waut ekj saj. Ekj woa die aul de Väaschreften un Jesazen jäwen, waut fa däm HARN sien Hus sent, un woo aules jedonen saul. Un paus opp wäa em Heilichtum nengonen doaf, un wäa nich em HARN sien Hus nengonen doaf.

⁶Un saj to de Israeliten, daut stieekopje Volkj: Dit es waut Gott de HAR sajcht: Daut es aul emol jenuach met de oppscheiselje Dinja dee jie Israeliten doonen.

⁷Jie haben framde Menschen, dee sikj nich von Hoaten haben däm HARN äwajäft, un dee onjehuarsom jäajen mie sent, en mien Heilichtum nenn jeloten. Jie haben eene Schaund jemoakt von mien Hus aus jie Broot, Fat un Bloot opfaden. Un soo hab jie met june oppscheiselje Dinja mien Bunt jebroaken.

⁸Jie haben nich selfst daut jedonen waut jie sullen met de heilje Sachen, oba haben de framde doatoo aunjestalt.

⁹Doawäajen sajcht Gott de HAR: Kjeen framda, dee mank de Israeliten wont, dee mie nich von Hoaten deent un nich beschnäden es, doaf en mien Heilichtum komen.

¹⁰Oba de Leviten, dee mie veleeten aus Israel sikj vejinkj, un de Jetta nojinkj, dee woaren äare Strof kjrieen.

¹¹See derwen Deena en mien Heilichtum sennen un bie de Tempelpuaten Oppsechta sennen un em Jebied deenen. See sellen daut Brauntopfa un Dankopfa fa daut Volkj schlachten un de Menschen doa biestonen un bedeenen.

¹²Wiels see daut Volkj deenden bie de Jettaopfa un soo fa de Israeliten sent em Stich jewast, soo daut see sikj vesindicht haben, doawäajen woa ekj noch met an veräakjnen, sajcht Gott de HAR, un see woaren äare Strof kjrieen.

¹³See sellen nich dicht bie mie komen toom eenen Priesta Deenst uttofieren, un nich bat aun de heilje Sachen, ooda daut waut mie aum heilichsten es, komen. See sellen äare Schaund droagen fa de oppscheiselje Dinja, waut see jedonen haben.

¹⁴Daut es wuarom ekj an nu aun daut Jebied aunstal, daut see doa deenen sellen en de veschiedenste Oabeiten, waut doa fälen.

¹⁵Bloos de levitische Priesta, dee Zadok siene Nokomen sent un dee de Oabeit em Heilichtum deeden aus de Israeliten von mie auffollen, sellen ver mie komen om mie to deenen. Dee sellen ver mie stonen un daut Fat un daut Bloot biem Opfa aun Haunt haben, sajcht Gott de HAR.

¹⁶See sellen en mien Heilichtum nengonen un aun mienen Desch komen mie doa to deenen. See sellen mie soo deenen aus daut velangt es.

¹⁷See sellen, wan see derch daut Puat en dän bennaschten Hoff gonen, lienzeichne Kjleeda aunhaben un nuscht von Woll aunhaben fa de Tiet dee see bie de benna Puaten un em Bennahoff sent un doa deenen.

¹⁸See sellen lienzeichne Koppbinjen droagen, un lienzeichne Bekjsen. See sellen sikj nich met soont auntrakjen von waut see schweeten woaren.

¹⁹Un ea see en dän Väahoff gonen, wua daut Volkj es, sellen see de Kjleeda, en dee see jedeent haben, auftrakjen, un dee en de Stowen em Heilichtum lajen. See sellen sikj aundre Kjleeda auntrakjen, soo daut de Menschen nich derch de Priesta Kjleeda daut aunschieren waut heilich es, un doaderch nich jemeene Oabeit doonen kjennen.

²⁰De Priesta sellen sikj nich dän Kopp kol schäaren, un nich äare Hoa lank waussen loten. See sellen dee runtom aufschnieden.

²¹De Priesta sellen kjeen Wien drinkjen ea see em Bennahoff nengonen.

²²See derwen sikj nich met eene Wätfru ooda met eene jeschiedne Fru befrieen. See sellen sikj met eene reine israelitische Mejal, ooda met eene Wätfru dee eenen Priesta siene Fru jewast es, befrieen.

²³See sellen mien Volkj unjarechten, daut see weeten, waut heilich es un waut jemeen es, un daut see weeten, waut rein es un waut orrein es.

²⁴Wan eene Sach to schlichten fält, sellen de Priesta doano seenen daut daut rajchte jedonen woat, un sikj doano rechten aus ekj väajeschräwen hab. See sellen de Heljedoag soo hoolen aus miene Jebooten un Väaschreften daut velangen un dän Sabat heilich hoolen.

²⁵See sellen nich aun eenen Jestorwnen naun gonen un sikj orrein moaken, buta wan daut eena von siene Elren es, ooda eent von siene Kjinja, ooda een Brooda ooda eene Sesta, dee noch eene Mejal es.

²⁶Un wan hee sikj dan haft rein jemoakt, saul hee säwen Doag wachten ea hee em Tempel jeit.

²⁷Un wan hee dan em Tempel jeit un well em Bennahoff un em Heilichtum deenen, saul hee daut ieeschte een Sindopfa fa sikj moaken, sajcht Gott de HAR.

²⁸Un dit es waut de Priesta sellen aus äa Oafgoot haben; ekj sie äa Oafgoot. See sellen kjeen Launt en Israel haben; see haben mie.

²⁹See woaren daut Speisopfa, daut Sindopfa un daut Schultopfa kjrieen toom äten; see sellen aul daut kjrieen waut de Israeliten fa mie jeweit haben.

³⁰Daut baste Poat von de gaunze ieeschte Arnt, un aul daut waut aufjejäft woat von aul daut von waut jie aula waut aufjäwen, jehieet de Priesta. Jie sellen de Priesta uk daut ieeschte Poat von junen Dieech jäwen, soo daut een Säajen en jun Hus bliewen kaun.

³¹De Priesta sellen nich Fleesch von Väajel ooda Vee äten, wua daut Tia verakjt ooda von aundre Tieren omjebrocht es.