Read Plautdietsch (Low German) – De Bibel Hesekiel 45 Bible Online

Hesekiel 45 - Plautdietsch (Low German) – De Bibel bible

Hesekiel 45

¹Wan jie met daut Loss daut Launt endeelen fa daut Volkj, sell jie waut Launt tosied saten, waut heilich fa däm HARN es. Daut Poat saul 25.000 Ellen lank un 20.000 Ellen breet sennen, un von eene Akj bat de aundre saul daut heiljet Launt sennen.

²Opp dit Launt saul een Hoff, 500 Ellen bie 500 Ellen em veakaunt, fa de heilje Städ sennen. Doa saul nuscht benna 50 Ellen von disen Hoff jebut woaren.

³Opp dit heilje Launt sell jie een Poat aufmäten opp woont daut Heilichtum, daut Aulaheilichste, stonen woat. Dit Poat saul 25.000 Ellen bie 10.000 Ellen mäten,

⁴un es heilich em Launt. Dit Poat es fa de Hiesa fa de Priesta dee em Heilichtum deenen un ver däm HARN komen am to deenen, un fa daut Heilichtum; dit es heilich.

⁵Un dan saul noch een Poat, waut uk 25.000 Ellen bie 10.000 Ellen mat, fa de Leviten, dee em Tempel deenen, sennen. Dee sellen doa en äare Städa wonen.

⁶Un daut äwaje Poat, waut 25.000 Ellen bie 5.000 Ellen mat un aun de aundre Sied von daut heilje Launt es, saul fa de Staut sennen. Daut saul aule Israeliten jehieren.

⁷Un de Volkjsleida saul aun jieda Sied von daut heilje Launt, soo breet aus daut Poat fa de Priesta un de Leviten un daut Volkj, Launt haben bat de oostne un bat de wastne Jrens von daut Launt. Daut es een Poat soo aus daut Poat waut een Staum kjricht.

⁸Daut saul sennen waut de Volkjsleida kjricht. De Leida sellen nich mea daut von mien Volkj nämen, waut daut Volkj jehieet. Daut äwaje Launt saul fa aul de Stam von de Israeliten sennen.

⁹Dit es waut Gott de HAR sajcht: Daut es aul emol jenuach, waut jie Volkjsleida en Israel velangen. Hieet opp met Macht eewen un Menschen utnutzen, un seet doano daut daut orrajchte unjasocht un bestroft woat, un daut daut rajchte jedonen woat.

¹⁰Siet opprechtich biem aufwäajen un aufmäten.

¹¹Een Efa, met waut jie drieeje Mot mäten, un een Bat, met waut jie flissendje Mot mäten sent jlikje groot. Un dee sent beid een Tieendel von een Homer. De Homer es de Mot no waut de Efa un de Bat jerecht sellen.

¹²Een Lot saul 20 Gera wäajen, un 20 Lot, 25 Lot un 15 Lot sellen een Mina sennen.

¹³Jie sellen aus een Opfa, daut saste Poat von een Efa fa jieda Homer von Weit aufjäwen, un krakjt soo von Joascht.

¹⁴Jie sellen daut tieende Poat von een Bat fa jieda Kor Eelj aus een Opfa aufjäwen. Een Kor un een Homer haben jieda tieen Bat.

¹⁵Un jie sellen een Laum fa jieda 200 Schop von june Häaden en Israel fa daut Speisopfa, daut Brauntopfa un daut Dankopfa aufjäwen. Dit es toom junt veseenen, sajcht Gott de HAR.

¹⁶Dit es waut aule Lied aun däm Volkjsleida en Israel aufjäwen sellen.

¹⁷De Leida saul aun de Heljedoag, aun de Niemonen un aum Sabat daut Brauntopfa, daut Speisopfa un daut Drinkjopfa stalen; un hee saul uk daut Sindopfa, daut Speisopfa, daut Brauntopfa un daut Dankopfa stalen om de Israeliten to veseenen.

¹⁸Dit es waut Gott de HAR sajcht: Aun dän 1. Dach von de 1. Moonat sell jie eenen Boll, dee kjeen Fäla haft, opfren un doamet daut Heilichtum enweien.

¹⁹De Priesta saul waut Bloot von daut Sindopfa nämen un daut aun de Däarenpast vom Tempel schmäaren, un aun de vea Akjen von dän Aultoa, un aun de Past von daut Puat aum Bennahoff.

²⁰Aum säwenden Dach von de Moonat saust du daut wada krakjt soo doonen, om dän Tempel to veseenen, em Faul daut wäa derch een Fäla ooda onweetent jesindicht haft.

²¹Aun dän 14. Dach von de 1. Moonat sell jie daut Passafast fieren. Daut sell jie säwen Doag fieren un onjesuadet Broot äten.

²²Aun dän ieeschten Dach von daut Fast, saul de Volkjsleida met eenen jungen Boll een Sindopfa moaken fa sikj un fa daut gaunze Volkj.

²³Un fa de säwen Doag von daut Fast saul hee jieda Dach säwen Bolles un säwen Schopsbakj, aun dee kjeen Fäla es, fa daut Brauntopfa stalen. Dit saul aule Dach woaren, un aule Dach saul hee uk eenen Kosenbock fa daut Sindopfa stalen.

²⁴Hee saul een Efa Jeträajd fa jieda Boll un uk een Efa fa jieda Bock stalen. Un uk een Hin Eelj fa jieda Efa Jeträajd.

²⁵Un dan fa daut Fast aun dän 15. Dach en de 7. Moonat saul hee fa dee säwen Doag jieda Dach krakjt soo daut Sindopfa, Brauntopfa, Speisopfa un Eelj stalen.