Read Plautdietsch (Low German) – De Bibel Hesekiel 46 Bible Online

Hesekiel 46 - Plautdietsch (Low German) – De Bibel bible

Hesekiel 46

¹Dit es waut Gott de HAR sajcht: Daut Puat fa dän Bennahoff aun de oostne Sied saul de sas Oabeits Doag enne Wäakj too sennen. Oba aum Sabat un aum Niemon saul daut op sennen.

²Un de Volkjsleida saul von buten en de Väastow von daut Puat nennkomen, un bie dän Post von daut Puat stonen. Dan woaren de Priesta sien Brauntopfa un Dankopfa moaken, un de Leida woat doa von de Schwal von daut Puat aunbäden. Un dan wan hee rut jeit, saul daut Puat nom Bennahoff op bliewen bat Owent.

³Daut Volkj saul aum Sabat un aum Niemon bat ver daut Puat komen un däm HARN aunbäden.

⁴Aum Sabat saul de Leida een Brauntopfa fa däm HARN moaken, von sas Lama, dee kjeen Fäla haben, un een Schopsbock, dee kjeen Fäla haft,

⁵un een Speisopfa von een Efa Jeträajd fa jieda Schopsbock un soo väl aus hee well fa jieda Laum. Doa saul uk een Hin Eelj fa jieda Efa Jeträajd sennen.

⁶Aum Niemon saul hee een Opfa von eenen jungen Boll, dee kjeen Fäla haft, moaken, un von sas Lama un eenen Schopsbock, dee uk kjeen Fäla haben,

⁷un een Speisopfa von eenen Efa Jeträajd fa jieda Boll un fa jieda Schopsbock. Oba fa de Lama saul hee soo väl Jeträajd jäwen aus hee well. Hee saul emma een Hin Eelj stalen fa jieda Efa Jeträajd.

⁸Wan de Leida nenn kjemt, saul hee derch de Väastow vom Puat komen, un dän selwjen Wajch rutgonen.

⁹Oba wan daut Volkj aun de Heljedoag ver däm HARN kjemt toom aunbäden, dan sellen dee waut derch daut nuadne Puat nenn komen derch daut siedne Puat rutgonen, un dee waut derch daut siedne Puat nengonen sellen derch daut nuadne Puat rutgonen. See sellen verwoats rutgonen, un nich to daut selwje Puat rutgonen wua see nenn kjeemen.

¹⁰De Volkjsleida saul nengonen wan daut Volkj nenn jeit un rutgonen wan daut Volkj rut jeit.

¹¹Opp aule Heljedoag un Fastdoag sellen emma een Efa Jeträajd aus een Speisopfa met jieda Boll un jieda Bock fa daut Opfa jestalt woaren, un fa een Laum soo väl aus deejanja jäwen well. Un fa jieda Efa Jeträajd saul een Hin Eelj jestalt woaren.

¹²Wan de Leida een Brauntopfa ooda Dankopfa stalen well, aus een frieweljet Opfa fa däm HARN, saul am daut oostne Puat op jemoakt woaren, soo aus wan hee aum Sabat daut Opfa stalt. Un wan hee dan wada rut jeit, saul daut Puat no am too jemoakt woaren.

¹³Hee saul jieda Dach een Brauntopfa fa däm HARN stalen met een eenjoaschet Schop, daut kjeen Fäla haft. Dit Opfa saul aule Morjen jemoakt woaren.

¹⁴Un jieda Morjen saul hee een Speisopfa moaken von daut saste Poat von een Efa Jeträajd. Daut Jeträajd saul met daut dredde Poat von een Hin von Eelj enjerieet sennen, fa daut Speisopfa fa däm HARN. Dit sell jie emma soo biebehoolen.

¹⁵Soo saul emma aule Morjen een Laum met daut Jeträajd un Eelj jeopfat woaren.

¹⁶Dit es waut Gott de HAR sajcht: Wan de Volkjsleida waut von daut Launt, waut hee jeorwen haft, eenen von siene Säns tookomen lat, saul daut en däm Sän siene Famielje aus Oafgoot bliewen.

¹⁷Oba wan de Leida von sien jeorwnet Launt aun eenen von siene aunjestalde vemoakt, saul dee daut bat daut Joa toom trigjstalen hoolen, un dan däm Leida daut wada loten tookomen. Bloos daut Launt, woont hee siene Säns jeft, woat nich en daut Joa toom trigjstalen trigjjejäft woaren.

¹⁸De Leida saul kjeen Launt nämen, daut wäa em Volkj jeorwen haft, un an von daut wajchjoagen, waut äat es. Siene Säns sellen von daut oawen waut sient jewast es. Hee doaf kjeenem von mien Volkj von sien jeorwnet Launt raufsteeten.

¹⁹Un de Maun brocht mie no eenen Engank biesied daut Puat, daut no de heilje Stowen aun de nuadne Sied fa de Priesta jeit. Doa wees hee mie eene Stow gaunz opp daut wastne Enj.

²⁰Un hee säd to mie: Dit es de Städ wua de Priesta daut Schultopfa un daut Sindopfa koaken sellen, un wua see daut Broot baken sellen fa daut Jeträajdopfa. Dan brucken see daut nich opp dän Väahoff brinjen un daut Volkj loten toopkomen met daut waut heilich es, un doaderch nich jemeene Oabeit doonen kjennen.

²¹Un dan brocht hee mie bat opp dän Väahoff un wees mie aule vea Akjen. Un doa wieren en jieda Akj von dän Hoff noch een Rum.

²²De Riem en de Akjen vom Hoff wieren aula äwareen. Dee wieren aula 40 Ellen lank un 30 Ellen breet.

²³Jieda Rum haud eene Mia von Steena runtom, un doa wieren runtom Hieets nenn jemieet.

²⁴Un hee säd to mie: Dit sent de Kjäakjen wua de Deena em Tempel sellen daut Volkj äa Schlachtopfa koaken.