Read Plautdietsch (Low German) – De Bibel Hesekiel 47 Bible Online

Hesekiel 47 - Plautdietsch (Low German) – De Bibel bible

Hesekiel 47

¹Un de Maun brocht mie wada no de Däa vom Tempel em Bennahoff. Un doa sach ekj waut Wota von unjare Tempelschwal ranen. Daut rand nom Oosten. De väakaunt vom Tempel es je aun de oostne Sied. Un daut Wota rand aun de siedne Kaunt vom Tempel, un aun de siedne Kaunt von däm Aultoa vebie.

²Un dan brocht hee mie derch daut Puat aun de nuadne Sied ut däm Tempelhoff rut, un rom no daut oostne Puat. Un doa rand daut Wota, von unja de siedne Waunt.

³Un de Maun leid mie nom Oosten. Hee haud eenen Motbaunt bie sikj, un hee maut 1.000 Ellen auf. Doa leid hee mie derch daut Wota derch, un mie kjeem daut bat aun de Kjnechel.

⁴Dan maut hee noch een mol 1.000 Ellen un leid mie wada derch daut Wota. Hia kjeem mie daut Wota bat aun de Kjnee. Un hee maut noch een mol 1.000 Ellen wieda, un leid mie derch daut Wota. Un hia kjeem mie daut Wota bat aun de Lint.

⁵Dan maut hee noch een mol 1.000 Ellen, un doa wia daut een Riefa, soo deep daut ekj doa nich derchgonen kunn. Daut Wota wia doa soo huach, daut eena schwamen must, eena kunn doa nich derchgonen.

⁶Un hee säd to mie: Menschensän, hast du dit beoobacht? Un hee leid mie een Enjskje trigj velenjd däm Riefa.

⁷Un aus ekj soo trigj jinkj, foll mie daut opp, daut doa väl Beem aun beid Sieden von däm Riefa wieren.

⁸Un hee säd to mie: Dit Wota rant nom Oosten han em Jordan Tol nenn, un dan en daut Solt Mäa nenn. Un wan dit Wota en daut Mäa, wua nuscht läwen kaun, nenn rant, dan woat daut Wota em Mäa jesundet Wota woaren.

⁹Aulawäajen wua de Riefa hanrant, schwoarmt dee met aules waut em Wota läft. Doa woaren väl Fesch sennen wan dit Wota doahan kjemt, un aules woat jesunt sennen un läwen wua dis Riefa hankjemt.

¹⁰Un doa woaren Menschen aun daut Mäa stonen un feschen. Daut Enj von En Gedi bat En Eglajim woaren see Nats hanspreeden toom drieejen, wiels doa woaren väl Fesch von aule Sorten sennen, soo aus en daut Meddelmäa.

¹¹Oba de sompje Städen delenjd däm Mäa woaren nich goodet Wota haben. Daut woat soo bliewen daut see doa Solt holen kjennen.

¹²Un delenjd dän Riefa woaren aun jieda Sied veschiedne Fruchtbeem waussen. De Bläda aun de Beem woaren nich vewalkjen, un doa woat emma Frucht aun de Beem sennen. Doa woat aule Moonat niee Frucht aun de Beem sennen, wiels dee Wota kjrieen, waut von de heilje Städ kjemt. De Menschen woaren de Frucht äten, un woaren met de Bläda een Jesuntheitsmeddel moaken.

¹³Dit es waut Gott de HAR sajcht: Dit sent de Jrensen von daut Launt, daut jie de twalw Stam von Israel toodeelen sellen. De Staum Josef saul twee Poat kjrieen.

¹⁴Daut saul fa eenen jiedren äwareen toojedeelt woaren. Ekj hab emol miene Haunt oppjehowen un june Vodasch vesproaken, daut ekj an dit Launt jäwen wudd, un nu saul daut junt sennen.

¹⁵Aun de nuadne Sied von jun Launt saul de Jrens von daut Meddelmäa no Hetlon gonen, un dan no Zedad,

¹⁶derch dän Hamat Stich, un no Berota un Sibrajim, oppe Jrens tweschen Damaskus un Hamat, un no Hazar Enan, waut aun de Jrens met Hauran es.

¹⁷Daut es woo de Jrens saul vom Mäa bat Hazar Enan gonen, daut tweschen Damaskus un Hamat licht. Damaskus un Hamat sellen nuaden von de Jrens sennen. Dit es dan de nuadne Jrens.

¹⁸Un dan aun de oostne Sied saul de Jrens tweschen Hauran un Damaskus sennen, un tweschen Gilead un Israel delenjd däm Jordan rauf bat daut Solt Mäa un Tamar. Daut es dan de oostne Jrens.

¹⁹Aun de siedne Kaunt rant de Jrens von Tamar bat dän bewessaden Plauz bie Kadesch, un dan delenjd dän Ägiptischen Riefa no daut Meddelmäa. Daut es dan de siedne Jrens.

²⁰Aun de wastne Sied saul daut Meddelmäa de Jrens sennen bat jäajen Hamat. Daut es dan de wastne Jrens.

²¹Jie sellen junt daut Launt mank june Stam von Israel vedeelen,

²²met een Loss. Jie sellen daut fa junt un de framde, dee mank junt wonen un Kjinja jehaut haben, vedeelen. Jie sellen de framde soo mettalen aus dee waut to jun Volkj jebuaren sent. Dee sellen met de israelitische Stam toop oawen,

²³un een Poat von daut Launt kjrieen, een jiedra von däm Staum wua hee wont, sajcht Gott de HAR.