Read Plautdietsch (Low German) – De Bibel Hesekiel 5 Bible Online

Hesekiel 5 - Plautdietsch (Low German) – De Bibel bible

Hesekiel 5

¹Un dan, Menschensän, nemm een schoapet Schwieet un schäa die dän Kopp un schäa die dän Boat auf. Wäaj de Hoa opp eene Wichtschol,

²un wan dee Tiet äwa es daut de Staut besat es, dan vebrenn een dreddel von de Hoa medden en de Staut, un vesprenj een dreddel met dien Schwieet, un vestrei een dreddel em Wint, un ekj woa daut met een Schwieet vejoagen.

³Oba du saust waut von dise Hoa hoolen, un saust die dee en eene Akj von dien Rock en een Zippelkje enbinjen.

⁴Dan nemm noch eemol von de Hoa un schmiet dee em Fia daut dee vebrennen. Von daut woat een Fia aunjestekjt woaren, daut äwa daut gaunze Volkj Israel vespreeden woat.

⁵Gott de HAR lat junt weeten: Ekj hab Jerusalem medden mank de Velkja jesat,

⁶oba see haben sikj schlajchta oppjefieet aus de aundre Velkja, un see sent dolla onjehuarsom jäajen miene Jebooten jewast aus de Lenda rom an. See haben miene Väaschreften tosied jeschmäten, un miene Jebooten nich jehoolen.

⁷Un doawäajen sajcht Gott de HAR nu: Wiels jie daut schlemma utjeeeft haben aus de Velkja runtom junt, un wiels jie miene Jebooten nich jehoolen haben, un haben nich emol soo jeläft aus de Velkja rom junt daut haben,

⁸nu sajcht Gott de HAR: ekj woa noch met junt veräakjnen, un woa een Jerecht loten äwa junt komen, daut aule Velkja seenen woaren.

⁹Ekj woa soo met junt omgonen aus ekj noch nienich ea hab, un uk nienich wada woa. Oba daut es wiels jie soon oppscheiseljet jedonen haben.

¹⁰Daut woat soo romkomen, daut de Elren äare Kjinja äten woaren, un de Kjinja äare Elren äten woaren. Un dee, dee äwabliewen, woa ekj en aule Rechtungen veschlapen, aus wan see vom Wint vestowen sent. Soo woa ekj junt bestrofen.

¹¹Un nu, soo secha aus ekj läw, sajcht Gott de HAR, wiels jie mien Heilichtum met june beese un oppscheiselje Sachen orrein jemoakt haben, woa ekj junt von jun Launt schäaren. Ekj woa wäajen kjeenem daut Uag tookjniepen, un woa met kjeemen Metleet haben.

¹²Een dreddel von junt woaren krank woaren un stoawen ooda vehungren, een dreddel woaren aulawäajen mank junt vom Schwieet omjebrocht woaren, un een dreddel woa ekj soo aus vom Wint vespreeden un an met daut Schwieet vejoagen.

¹³Soo woa ekj mien Oaja uteewen un miene Wutt äwa an komen loten bat ekj mie utjetoopt hab. Un see woaren enseenen, woo väl too groff mie daut wia, daut see mie nich tru bleewen.

¹⁴Un doatoo woa ekj uk noch june Jäajent vedoawen, un wäa doa vebie jeit, däm woat de Jäajent jäajenaun sennen.

¹⁵De Velkja rom junt woaren sikj äwa junt tieren un junt veachten. Soo aus ekj daut Uadeel opp junt brinjen woa un mien Oaja un Wutt un Schellen opp junt brinjen woa, woat an enjsten un eene Woarnunk sennen. Lot junt dit vom HARN jesajcht sennen.

¹⁶Wan ekj junt woa hungren loten soo daut junt daut en de Moag spekjt, wan ekj aules vedoawen woa en de Hungaschnoot, dee ekj brinjen woa, woa ekj uk noch junen latsten Väarot von junt wajchnämen.

¹⁷Jie woaren väl Doodes haben von de Hungaschnoot, un von wille Tieren, un von Krankheiten, von soone waut Jewault eewen, un von dän Kjrich. Lot junt dit von däm HARN jesajcht sennen.