Read Plautdietsch (Low German) – De Bibel Hesekiel 6 Bible Online

Hesekiel 6 - Plautdietsch (Low German) – De Bibel bible

Hesekiel 6

¹Un mie wort kloa waut de HAR to sajen haud. Hee säd:

²Menschensän, kjikj emol no de Boaj en Israel, un profezei äwa dee:

³Jie Boaj en Israel, horcht waut Gott de HAR sajcht. Dit es waut Gott de HAR to de Boaj un Humpels un to de Jladen un Täla to sajen haft: Horcht emol, ekj woa eenen Kjrich äwa junt komen loten un woa june huage Opfastäden dolbräakjen.

⁴June Aultoaren woaren doljeräten woaren, un aule Ruakopfa Aultoaren woaren tweijeschloagen woaren. Ekj woa june Doodes ver june Jetta schmieten.

⁵Ekj woa de Doodes ver de Jetta hanschmieten, un woa june Knoakes bie de Aultoaren vestreien.

⁶June Städa, wua jie wonen, woaren aula enne Grunt jebrocht woaren, un june huage Opfastäden woaren Schunthupes sennen. June Aultoaren woaren Schunthupes sennen, un june Jetta woaren tweijebroaken un vedorwen woaren. June Ruakopfa Aultoaren woaren tweijeschloagen woaren, un waut jie oppjestalt haben, woat wajchjeriemt woaren.

⁷Aulawäajen mank junt woaren Menschen stoawen, un junt woat daut kloa woaren daut ekj de HAR sie.

⁸Ekj woa eenje von junt, dee waut sikj derch däm Kjrich brinjen, un sikj mank de Velkja vestreien, äwaloten.

⁹Dise waut sikj dan haben wajchjebrocht, woaren, wan see mank de Velkja sent, aun mie denkjen.

¹⁰Dan woaren see weeten, daut ekj de HAR sie, un daut ekj nich fa nuscht säd, doa wudden schlemme Tieden komen.

¹¹Dit es waut Gott de HAR sajcht: Klautsch diene Henj; traumpel met diene Feet un saj: Doch nich! wäajen daut oppscheiselje waut de Israeliten väahaben. Dee woaren em Kjrich, enne Hungaschnoot, un von Krankheiten lieden.

¹²Dee waut wiet auf sent, woaren von Krankheiten stoawen; dee waut dicht bie sent, woaren em Kjrich stoawen; un dee waut dit äwaläwen, woaren von Hunga stoawen.

¹³Wan jie de Doodes bie june Jetta un äare Aultoaren seenen, un opp jieda Humpel un Boajch, unja jieda jreena Boom un jieda beloofta Ieekjenboom, un opp jieda Städ, wua jie june Jetta een scheenrikjendet Opfajeroch brochten, dan woa jie enseenen daut ekj de HAR sie.

¹⁴Ekj woa en aule Siedlungen miene Macht jäajen an komen loten. Von gaunz em Sieden Kanaan bat Ribla woa ekj daut Launt vedoawen un ladich loten. Dan woaren see enseenen, daut ekj de HAR sie.