Read Plautdietsch (Low German) – De Bibel Hesekiel 7 Bible Online

Hesekiel 7 - Plautdietsch (Low German) – De Bibel bible

Hesekiel 7

¹Un mie wort kloa waut de HAR to sajen haud. Hee säd:

²Menschensän, dit es waut Gott de HAR äwa daut Launt Israel sajcht: Daut Enj kjemt. Daut Enj woat bat opp aule Akjen von daut Launt komen.

³Jun Enj kjemt nu, un ekj woa mienen Oaja äwa junt brinjen. Ekj woa junt verem Jerecht holen, fa daut waut jie jedonen haben, un ekj woa aul de oppscheiselje Dinja bestrofen, dee jie jedonen haben.

⁴Ekj woa mie wäajen nuscht de Uagen toohoolen, un woa kjeen Metlieden met junt haben. Ekj woa junt bestrofen fa daut waut jie vedeent haben, un fa de oppscheiselje Dinja, dee jie jedonen haben. Dan woa jie enseenen, daut ekj de HAR sie.

⁵Lot junt dit von Gott däm HARN jesajcht sennen: Doa woat een Schoden nom aundren komen.

⁶Daut Enj kjemt! Nu es daut bat doa! Nu haft daut aunjefongen! Kjikj emol, doa es daut!

⁷Daut haft aunjefongen, un kjemt nu äwa junt, dee jie em Launt wonen. Nu es daut bat doa, daut kjeena oppe Boaj fa Freid schrieen woat, bloos ut Angst.

⁸Nu woascht du miene Wutt to feelen kjrieen, un mien Oaja woat sikj utspaunen. Ekj woa junt doano rechten aus jie vedeent haben, un junt trigj tolen fa daut oppscheiselje, waut jie jedonen haben.

⁹Ekj woa nich miene Uagen toohoolen, un woa kjeen Metlieden met junt haben. Ekj woa junt jäwen, waut jie vedeent haben, un trigj tolen fa daut oppscheiselje, waut jie jedonen haben. Dan woa jie enseenen, daut ekj de HAR sie, dee junt stroft.

¹⁰Nu es daut soo wiet! Nu es daut soo wiet romjekomen! De Stock kjemt äwadäl; un de onveschämda vestakjt sikj nich;

¹¹dee waut Jewault eeft steit steil. Oba see woaren nich bestonen, nich äa Jelt, nich äa Straums, un nich woo see nu aunjeseenen sent.

¹²De Tiet es doa, un de Dach nodat. Lot däm wäa doa kjaft sikj nich freien, un däm wäa doa vekjaft sikj nich jrämen, wiels de Strof woat opp eenen krakjt soo komen aus opp däm aundren.

¹³Wan hee daut uk noch äwaläft, woat dee wäa waut vekjaft nich trigj gonen no waut hee vekjeepen deed. De Strof es fa jieda eenen, un woat nich noloten. Kjeena woat sikj sien Läwen sechren, wiels see aula orrajcht jedonen haben.

¹⁴See blosen met de Posaun, un moaken sikj aula reed, oba kjeena woat em Kjrich gonen, wiels mien Oaja es opp daut gaunze Volkj jezielt.

¹⁵Buta de Staut rejieet de Armee; un enne Staut Krankheit un Hunga. Wäa oppe Stap es, woat vom Schwieet stoawen, un wäa enne Staut es, woat von Krankheit un Hunga vefräten.

¹⁶Dee waut doavon komen un enne Boaj ranen, woaren enne Schluchten setten un gurren aus de Duwen, wiels see uk schuldich sent.

¹⁷Aule Henj woaren schwak woaren, un aule Kjneeen woaren aus Wota sennen.

¹⁸See woaren sikj Sakkjleeda äwatrakjen, un unja väl Angst lieden. Jieda Jesecht schämt sikj, un jieda Kopp woat kol jeschoaren woaren.

¹⁹See woaren äa Selwa oppe Gaussen schmieten, un woaren äa Golt aus schwiensch aunseenen. Dän Dach, wan däm HARN sien Oaja kjemt, woaren Selwa un Golt kjeenem raden. See kjennen sikj doamet nich saut äten, ooda äare Moag doamet vollstoppen. Oba daut wia daut, waut an enne Sind fieed.

²⁰See haben von äare wieetvolle Sachen, dee an soo väl wieet wieren, Jetta un Tieren jemoakt. Nu woa ekj an daut aula loten aunbrennen.

²¹Ekj woa daut mäajlich moaken, daut framde Menschen daut stälen woaren, un daut dee, dee schlajcht sent, sikj daut tooieejnen woaren, un doavon waut oppscheiseljet moaken.

²²Ekj woa an nich halpen wan de Tempel schentlich jebrukt woat. Doa woaren Reibasch komen un em Tempel schaund driewen.

²³Moakt de Kjäden reed, wiels en daut Launt woaren Menschen aulawäajen omjebrocht, un enne Staut sent aulawäajen Vebräakja.

²⁴Doawäajen woa ekj de schlemste Velkja jäajen junt brinjen, daut see june Hiesa ennämen. Ekj woa een Enj moaken von daut wuatoo de rikje sikj freien, un woa Schaund opp äare heilje Städa brinjen.

²⁵See woaren sikj sea enjsten, bat see no Fräd kjikjen. Oba see woaren kjeene Help finjen.

²⁶Een Schoden woat äwa däm aundren komen, un eene schlajchte Norecht no de aundre. Emsonst woa jie de Profeeten froagen, waut an es kloa jeworden, un de Priesta woaren nich daut Jesaz utlajen, un de Leidasch woaren kjeen Rot haben.

²⁷De Kjennich woat truaren, un siene stoakje Mana woaren sikj nich weeten. De Lied äare Henj woaren tekjren. Ekj woa an jäwen waut see vedeent haben, un an strofen, doano aus see jeläft haben. Dan woaren see enseenen, daut ekj de HAR sie.