Read Plautdietsch (Low German) – De Bibel Hesekiel 8 Bible Online

Hesekiel 8 - Plautdietsch (Low German) – De Bibel bible

Hesekiel 8

¹En daut 6. Joa, aun däm 5. Dach von de 6. Moonat, saut ekj met de judsche Leidasch toop en mien Hus, aus Gott däm HARN siene Haunt stoakj opp mie kjeem.

²Un weetst, ekj sach de Form von eenen Mensch, un daut waut no siene Hoft leet un rauf, leet no Fia, un bowa siene Hoft leet daut no jlieejendet Iesa.

³Un dee strakjt siene Haunt ut no mie un kjrieech mie bie de Hoa to hoolen. Dan hoof de Jeist mie opp, tweschen Himmel un Ieed, un brocht mie en eene Openboarunk von Gott no Jerusalem. Hee brocht mie no daut bennaschte Puat aun de nuadne Kaunt, wua doa een Aufgott wia, woont de HAR nich vedroagen kaun.

⁴Un Gott siene Harlichkjeit wees sikj mie doa, krakjt soo aus daut en daut Tol vom Kebar Riefa haud.

⁵Un Gott säd to mie: Menschensän, kjikj emol nom Nuaden. Un aus ekj nom Nuaden kjikjt, sach ekj bie däm Aultoa, dee bie daut Puat steit, dän Aufgott, dän de HAR nich vedroagen kaun.

⁶Un hee säd to mie: Menschensän, kaust du seenen waut dise doonen? Dit es oppscheislich, waut de Israeliten hia doonen. Daut woat mie wiet von dit Heilichtum vejoagen. Oba du woascht noch schlemret seenen.

⁷Un hee brocht mie no de Däa em Väahoff, un doa sach ekj een Loch enne Waunt.

⁸Un hee säd to mie: Menschensän, bräakj een Loch en de Waunt. Un aus ekj doa een Loch derch de Waunt jebroaken haud, sach ekj doa eene Däa.

⁹Un hee säd to mie: Go nenn, un besee die de oppscheiselje Dinja, dee hia jedräwen woaren.

¹⁰Un aus ekj nenn kjeem un kjikjt, sach ekj daut doa väl Bilda von Warm un äakjelje Tieren un aul de Jetta von de Israeliten enne Waunt nenn jekrauzt wieren.

¹¹Un ver de Bilda stunden 70 Leidasch von de Israeliten, un Jaasanja, Schafan sien Sän, wia mank dee. Een jiedra haud een Ruakbehelta enne Haunt un doa wia eene Wolkj von Weiruak bowa an.

¹²Un hee säd to mie: Menschensän, sitst du waut de Leidasch von Israel bie diesta doonen. Een jiedra es en sien Stofkje met de Bilda. See meenen, daut de HAR an nich sitt, wiels de HAR daut Launt veloten haft.

¹³Un hee säd to mie: Du woascht noch oajre Dinja aus dit to seenen kjrieen.

¹⁴Un hee brocht mie no daut nuadne Puat von däm HARN sien Hus, un doa biem Engank sauten Frues un hielden äwa Tamus.

¹⁵Un hee säd to mie: Menschensän, sitst du daut? Du woascht noch schlemret seenen aus dit.

¹⁶Un hee brocht mie en dän Bennahoff von däm HARN sien Hus, un, kaust daut jleewen, verem Engank nom HARN sien Tempel, tweschen daut Väatus un dän Aultoa, stunden soo bie 25 Mana met äare Rigjes nom HARN sien Tempel, un äare Jesechta nom Oosten jedreit. Un dee kjneeden sikj ver de Sonn em Oosten.

¹⁷Un hee säd to mie: Menschensän, sitst du daut? Es de Juden daut nich jenuach, daut see aul dit oppscheiselje hia doonen, oba nu bräakjen see daut Jesaz aulawäajen en daut Launt. See reizen mie emma wada. Un nu noch, hoolen see sikj de Rank unja de Näs.

¹⁸Doawäajen woaren see mienen vollen Oaja to feelen kjrieen. Ekj woa kjeen Metlieden äwa an haben, wan ekj an äwakjikj, un ekj woa nuscht veschoonen. Uk wan see mie lud enne Uaren schrieen, woa ekj nich no an horchen.