Read Plautdietsch (Low German) – De Bibel Hesekiel 9 Bible Online

Hesekiel 9 - Plautdietsch (Low German) – De Bibel bible

Hesekiel 9

¹Un ekj hieed am lud roopen: Jie Mana, dee jie Jerusalem vestieren sellen, komt häa. Brinjt jieda jun Jereetschoft toom dee schlonen.

²Un dan kjeemen sas Mana von de Rechtunk, wua daut bowaschte Puat es, un een jiedra haud en siene Haunt daut Jereetschoft toom de Staut schlonen. Doa wia eena mank an, dee haud een wittet lienzeichnet Kjleet aun, un hee hilt een Dooskje met Tint un Schriewa. Dee kjeemen un stalden sikj biesied dän bronsnen Aultoa.

³De Harlichkjeit von Israel äa Gott hoof sikj von de Cheruben, wua daut jewast wia, un wia oppe Schwal vom Tempel. Un de HAR roopt däm, dee daut lienzeichne Kjleet un daut Dooskje met Tint un Schriewa haud.

⁴Un hee säd to am: Go derch de Staut Jerusalem un moak een Tieekjen aum Stiern von de Lied, waut sikj tieren un waut äwa aul daut oppscheiselje stänen, waut doabennen passieet.

⁵Un to de aundre Mana säd hee, soo daut ekj daut hieed: Got hinja am derch de Staut, un schlot loos. Wiest kjeen Metlieden, un veschoont kjeenem.

⁶Schlot de oole, de Junge, de Mejales, de Kjinja, un de Frues aula doot. Bloos dee waut een Tieekjen haben, sell jie nuscht doonen. Fangt en mien Heilichtum aun. Un see fungen aun bie de Leidasch dee ver däm Tempel wieren.

⁷Un hee säd to an: Moakt dän Tempel orrein. Felt dän Väahoff voll met dee waut omjebrocht sent. Dan got rut. Un see jinjen rut un schluagen de Lied enne Staut.

⁸Un aus see dee jeschloagen hauden, wia ekj auleen jebläwen, un ekj schmeet mie opp mien Jesecht un schrieech: Oba HAR Gott, woascht du aul daut äwaje von Israel veschlonen, wiels du soon Oaja äwa Jerusalem hast?

⁹Un hee säd to mie: De Schult von de Israeliten un Juden es sea groot. Aulawäajen em Launt haben see Menschen omjebrocht, un en Jerusalem es väl vebräakjen. See sajen: De HAR haft daut Launt veloten, un soo kaun hee ons nich seenen.

¹⁰Doawäajen woa ekj kjeen Metlieden wiesen met an, un ekj woa an kjeene Jnod wiesen. Ekj woa daut, waut see jedonen haben, loten trigj opp äare Kjap komen.

¹¹Un dan kjeem de Maun, dee daut witte lienzeichne Kjleet aun haud un daut Dooskje met Tint un Schriewa druach, un säd: Ekj sie foadich met daut, waut du mie oppjeefst.