Read Plautdietsch (Low German) – De Bibel Daniel 11 Bible Online

Daniel 11 - Plautdietsch (Low German) – De Bibel bible

Daniel 11

¹En Darius, von Medien sien ieeschtet Joa, stunt ekj, Gabriel, däm bie un holp am.

²Ekj woa die nu de Woarheit sajen. Kjikj emol, doa woaren noch dree persische Kjennichs komen, un de vieeda woat rikj sennen, noch rikja aus dee ver am. Un wan hee to groote Macht kjemt derch sien Rikjtum, woat hee aules aunsaten jäajen daut griechische Rikj.

³Dan woat een majchtja Kjennich komen. Dee woat met sea groote Krauft omgonen un krakjt daut doonen waut am jankat.

⁴No am woat daut Rikj oppjebroaken woaren, un no de vea Wintrechtungen vedeelt woaren. Dee woaren nich von siene Nokomen rejieet woaren un woaren uk nich soo groosoatich sennen. Aundre woaren daut Rikj nämen no am.

⁵De Kjennich vom Sieden woat stoakj sennen oba eena von siene Volkjsleida woat noch stoakja sennen un woat sien ieejnet Rikj met väl Krauft rejieren.

⁶No een poa Joa woaren dee beid sikj eenjen, un de Dochta vom Kjennich vom Sieden woat däm Kjennich vom Nuaden siene Fru woaren, om Fräd to moaken. See woat oba nich äare Macht behoolen, un hee un siene Nokomen woaren äare Macht velieren. See woat met äaren Maun, un äa Kjint un äare Deena, oppjejäft woaren.

⁷Dan woat een aundra von äare Famielje Kjennich em Sieden woaren en äaren Voda siene Städ. Dee woat jäajen de Armee von däm Kjennich vom Nuaden kjriejen un en siene Hauptstaut nengonen un äwa dän jewennen.

⁸Hee woat dän äare Jetta un jegotne Aufjetta trigj no Ägipten nämen, toop met daut goldne un daut selwane Teetich. Dan woat miere Joa Fräd sennen.

⁹Dan woat de Kjennich vom Nuaden noch eemol däm Kjennich vom Sieden aunjriepen, un dan oba trigj trakjen en sien ieejnet Launt.

¹⁰Dan woaren de Säns vom Kjennich vom Sieden een grootet Häa toop ropen, un aus eene Äwaschwamunk nenjriepen bat aun de Hauptstaut.

¹¹Doamet woat de Kjennich vom Sieden doll woaren un woat met däm Kjennich vom Nuaden un sien grootet Häa kjriejen un en siene Macht jejäft woaren.

¹²Wan hee äwa daut Häa jewennen woat, woat hee en sikj stolt woaren. Hee woat miere 10.000 ombrinjen, oba hee woat nich de Äwamacht hoolen.

¹³De Kjennich vom Nuaden woat dan noch eemol een Häa reed moaken, jrata aus daut väaje mol, un wan de Tiet ieescht reed es, woat hee met eene groote Armee komen, dee väl Jereetschoft haft.

¹⁴Dan woaren en dee Tiet väle sikj oppmoaken un sikj jäajen däm Kjennich vom Sieden oppstalen. Doa woaren uk Mana von dien Volkj, soone waut met Jewault omgonen, sikj doatoo hanjäwen en de Meeninj, daut äa Droom fa äa Launt utkomen woat, oba dee woat daut nich jlekjen.

¹⁵De Kjennich vom Nuaden woat komen eenen Wajch moaken bat oppe Stautswaunt un de vesechade Städ ennämen. De Soldoten vom Sieden woaren de Staut nich hoolen kjennen, nich emol äare baste Soldoten woaren opp de lenjd stonen bliewen.

¹⁶Oba de Aunjriepa woat sienen Wellen haben, kjeena woat am opphoolen. Hee woat sikj en daut prachtvolle Launt tus moaken un met eene stoakje Haunt rejieren.

¹⁷Hee woat sikj väanämen, daut hee met de Macht von sien gaunzet Rikj, waut hee haft, aunkomen woat, un hee woat Frädens Bedinjungen brinjen un dee enfieren. Hee woat am eene Mejal to Fru jäwen om daut Rikj entonämen. Oba de Plon woat nich goot fa am utkomen ooda am halpen.

¹⁸Dan woat hee nom Mäa opptoo gonen un väl Launt ennämen. Oba een Kommandaunt woat een Enj moaken met sien trotzen, un am trigj trotzen.

¹⁹Dan woat hee trigj no de Hauptstaut en sien ieejnet Launt gonen, oba hinjawäajes woat hee tofaul komen, un woat selfst nich bat doa komen.

²⁰Dee waut no am Kjennich woat sennen, woat eenen Kollakjta schekjen om Taks to kollakjten von daut scheene Rikj, oba en een poa Doag woat sien Enj sennen un nich derch Oaja ooda Jestried.

²¹Dee waut siene Städ dan ennemt, woat veacht woaren un kjeena woat am daut Kjennichsrajcht jäwen. Hee woat met Lest un onen Jäajenstaunt daut Kjennichrikj äwanämen.

²²Armeeen woaren von am flichten un vedorwen woaren un de Leida vom Bunt uk.

²³Soo schwind aus hee sikj met am eenich woat, woat hee hinjalestich met däm haundlen, un hee woat Macht kjrieen äwa een kjlienet Volkj.

²⁴Hee woat onen Woarnunk en de rikjste Prowins nengonen, soo aus kjeena von siene Staumvodasch jedonen haud. Hee woat siene Mana veschiedenstet jäwen von daut waut hee jeplindat un jestolen haft. Hee woat eenen Plon moaken, stoakje Städa entonämen, oba mau fa eene jewesse Tiet.

²⁵Hee woat siene Macht oppbuen un sienen Moot oppreizen un met eene groote Armee jäajen däm Kjennich vom Sieden komen. De Kjennich vom Sieden woat met eene sea groote Armee jäajen am komen, oba woat nich jewennen, wäajen de Lest dee jäajen am jeplont woat.

²⁶Soogoa dee, dee hee met sien rikjet Äten vesorcht haft, woaren am enne Grunt brinjen. Siene Armee woat sikj vestreien un väle Doodes haben.

²⁷De twee Kjennichs woaren beid met eene beese Enstalunk eena toom aundren räden. Oba daut woat nuscht doarut jäwen, wiels de bestemde Tiet fa daut Enj es noch nich.

²⁸De Kjennich vom Nuaden woat sea rikj sennen un trigj no sien Launt gonen, oba em Hoat woat hee jäajen däm heiljen Bunt sennen. Hee woat uk fa eene Tiet jäajen däm Bunt oabeiden un dan trigj no sien Launt gonen.

²⁹Om de jesade Tiet woat hee noch eemol em Sieden nenn trakjen. Daut woat ditmol nich soo sennen aus daut väaje mol.

³⁰Ditmol woaren see en Schäp von Kittim jäajen am komen, un am woat daut soo väl enjsten, daut hee trigjtrakjen woat. Dan woat hee sienen Oaja opp däm heiljen Bunt komen loten. Doa jeef hee Acht opp dee, dee dän heiljen Bunt veloten haben.

³¹Siene Armee woat daut Heilichtum un de huage Mia toschaund moaken un een Enj moaken von daut däachelje Opfa. Dee woaren uk daut oppscheiselje Bilt oppstalen un dän Tempel en onieren brinjen.

³²Dee, dee dän Bunt äwaträden, woat hee schmeichlen un veleiden, oba de Menschen, dee Gott kjanen, dee woaren am Jäajenstaunt jäwen.

³³Dee, dee Weisheit haben, woaren väle to een Vestentnis brinjen, wan see uk fa eene Tiet daut Schwieet un daut Fia lieden motten, ooda uk em Jefenkjnis setten ooda bestolen woaren.

³⁴Wan see faulen, woat an mau weinich Help jewäsen woaren. Dee, dee sikj an aunschluten, woaren daut hinjalestich doonen.

³⁵Eenje von dee waut weis sent, woaren en de Vefoljunk faulen, daut see kjennen rein un ajcht un witt sennen bat daut Enj, wiels de bestemde Tiet es noch nich.

³⁶De Kjennich woat doonen, krakjt waut hee well. Hee woat sikj huach opphäwen un sikj Iea jäwen hecha aus irjent eenen Aufgott. Äwa däm Gott, dee äwa de Jetta es, woat hee onerhieedet sajen. Hee woat sienen Wajch haben bat hee jenuach Schoden aunjerecht haft, soo aus daut bestemt es.

³⁷De Kjennich woat sikj nich kjemren om de Jetta, dee siene Väavodasch jedeent haben, ooda om däm, dän de Frues mäajen. Hee woat no kjeen Gott horchen un bloos sikj selfst huach häwen.

³⁸Enne Städ von dise Jetta woat hee eenen Aufgott fa Städa met Mieren un Jewäa ieren, dän siene Väavodasch nich kjanden. Hee woat däm Golt, Selwa, diere Steena un diere Jeschenkja jäwen.

³⁹Hee woat met dee stoakjste Städa kjriejen, met de Help von eenen framden Aufgott. Soone waut am Aunerkjanunk jäwen, woat hee ieren un Veauntwuatunk äwa väle jäwen. Hee woat daut Launt aus Loon jäwen.

⁴⁰Wan daut Enj kjemt, woat de Kjennich vom Sieden jäajen am kjriejen. De Kjennich vom Nuaden woat dan met Pieed un Woages un väl Schäp aunjriepen, un derch veschiedne Lenda gonen aus eene Äwaschwamunk.

⁴¹Wan hee met siene Armee en daut straume Launt nenn trakjt, woaren väle dusende omkomen. De Edomita, Moabita, un daut jratste Poat von de Amonita oba woaren veschoont bliewen.

⁴²Hee woat met siene Macht jäajen de Lenda gonen. Soogoa Ägipten woat nich jeschoont bliewen, wan hee soo de Lenda bestälen woat.

⁴³Hee woat aul daut Golt un Selwa un aul de wieetvolle Sachen en Ägipten en siene Macht kjrieen, un Libien un Kusch woaren am unjadon sennen.

⁴⁴Oba dan woat Norecht vom Oosten un Nuaden komen, dee am sea enjsten woat, un hee woat schrakjlich omhäa gonen un grooten Schoden un väle Doodes veuasoaken.

⁴⁵Hee woat sien Kjennichszelt tweschen daut Mäa un däm schmocken heiljen Boajch oppstalen. Doch woat sien Enj komen un kjeena woat am halpen.