Read Plautdietsch (Low German) – De Bibel Daniel 12 Bible Online

Daniel 12 - Plautdietsch (Low German) – De Bibel bible

Daniel 12

¹En dee Tiet woat Michael, de groota Schutzenjel, dee äwa dien Volkj steit, sikj bewiesen. Doa woat eene Noot to dee Tiet sennen aus noch nienich ea, von dan aus Velkja un Lenda aunfungen bat dee Tiet. Oba to dee Tiet woat dien Volkj jerat woaren, een jiedra wäm sien Nomen em Buak jefungen woat.

²Väle von dee, dee en Jräwa schlopen, woaren dan oppwakjen, eenje to eewjet Läwen, aundre toschaund un eewjet veachten.

³Dee waut weis sent, woaren dachen aus de kloara Himmel, un dee, dee aundre dän rajchten Wajch wiesen, aus Stierns fa emma un eewichlich.

⁴Un du, Daniel, saust dise Wieed vestäakjen, un daut Buak met een Stampel vesechren, bat de Doag, dee nom Enj gonen. Väle woaren han un häa ranen un sea väl weeten.

⁵Un weetst uk waut, dan sach ekj, Daniel, twee aundre ver mie stonen, eena hia aun dise Kaunt, un eena dort opp jane Sied vom Riefa.

⁶Un eena von de Mana fruagen däm dee de lienzeichne Kjleeda druach un bowa daut Wota vom Riefa wia: Woo lang woat daut nämen bat dise wundaboare Dinja woaren to Enj komen?

⁷De Maun met de lienzeichne Kjleeda, dee bowa daut Wota vom Riefa stunt, hoof beid Henj opp nom Himmel. Un ekj hieed am met eenen Eit, bie däm dee doa eewich läft, sajen, daut et eene Tiet, twee Tieden, un eene haulwe Tiet sennen woat, un daut wan daut lieden von de heilje Menschen een Enj haben woat, dan woat daut Kuffel voll sennen von dise Dinja.

⁸Ekj hieed, oba vestunt am nich, un ekj fruach: Mien Har, waut woat daut dan jäwen?

⁹Un hee säd: Daniel, nu go. De Wieed sent veschloten un vesäajelt, bat de Doag, dee nom Enj gonen.

¹⁰Väle Menschen woaren jereinicht un witt jemoakt sennen un onen Plaken jemoakt sennen. Dee woaren sikj ajcht bewiesen. De beese oba woaren bees sennen; dee woaren nich vestonen, oba de Weise woaren vestonen.

¹¹Von däm Dach, wua de däachelje Opfa to een Enj jebrocht woaren, bat daut sea Jreselje oppjestalt woat, un dän Tempel en onieren brinjt, sent 1.290 Doag.

¹²Seelich sent dee dee doa wachten bat de 1.335 Doag komen.

¹³Un du, bliew bestendich bat aum Enj. Dan woascht du reiwen, un du woascht oppstonen en de Städ dee fa die es, aum Enj von de Doag.