Read Plautdietsch (Low German) – De Bibel Daniel 3 Bible Online

Daniel 3 - Plautdietsch (Low German) – De Bibel bible

Daniel 3

¹Daut neem sikj emol soo rom, daut Nebukadnezar eenen goldnen Aufgott leet moaken. Daut wia eene Jestault dee 30 Meeta huach un 3 Meeta breet wia, un wort en de Prowins Babel opp de Dura Stapen oppjestalt.

²Dan leet de Kjennich de Prinsen, de Volkjsleida von de Prowinsen, de Vewaulta, de Kaussenfiera, de Rechta un de Frädens Rechta, un de veschiedne aunjestalde en de Prowinsen aula toopkroagen, daut dee sullen doabie sennen wan de Jestault enjeweit wort.

³Aus aul dise Beaumte dan toop kjeemen, stunden see ver de Jestault.

⁴Dan wort lud bekaunt jejäft: Aul jie Veträda von de veschiedne Velkja, Lenda un veschiedne Sproaken, horcht emol häa.

⁵Soo schwind aus jie de Musikj hieren von de Trompeeten, Fleeten, Hoapen, Zitta un veschiedne aundre Instrumenten, sell jie aula hanfaulen un dän goldnen Aufgott, dän Nebukadnezar oppjestalt haft, aunbäden.

⁶Wan irjent wäa nich hanfelt däm auntobäden, dämjanjen woat fuaz en eenen jlieejent heeten Hettowen nenjeschmäten woaren.

⁷Un aus de Menschen von aul de veschiedne Velkja, Lenda, un Sproaken de Musikj opp aul de veschiedne Instrumenten spälen hieeden, follen see han un bäden de goldne Jestault aun, dee Kjennich Nebukadnezar haud oppstalen loten.

⁸Eenje von de babelonische Menschen sagen daut aus eene Jeläajenheit de Juden to vekloagen.

⁹See säden to Kjennich Nebukadnezar: Ons Kjennich, mucht dien Rikj kjeen Enj haben.

¹⁰Du hast doch een Jesaz jemoakt, daut een jiedra dee de Musikj von de Instrumenten hieet, saul sikj deep kjneeen un de goldne Jestault aunbäden,

¹¹un wan irjentwäa daut nich deit, saul dee en eenen jlieejent heeten Hettowen nenn jeschmäten woaren.

¹²Doa sent oba waut Juden, Schadrach, Meschach un Abed Nego, dee du en de Prowins Babel aunjestalt hast, dee nich no dien Befäl horchen. Dee deenen dienen Aufgott nich un dee kjneeen sikj nich ver de goldne Jestault, dee du hast loten oppstalen.

¹³Aus Nebukadnezar daut hieed, wort hee sea doll un leet dee dree komen, daut hee met an räden kunn.

¹⁴Hee säd to an: Es daut soo, Schadrach, Meschach un Abed Nego, daut jie mienen Aufgott nich deenen, un daut jie junt nich ver de goldne Jestault kjneeen?

¹⁵Wan jie dan, wan jie de Trompeet un de Fleeten un de Hoapen un Zitta spälen hieren, hanfaulen un dän Aufgott aunbäden, dan es aules goot. Oba wan jie daut nich doonen woaren, schmiet wie junt fuaz en eenen jlieejent heeten Hettowen nenn. Dan woa wie seenen auf doa een Gott es dee junt raden kaun ut miene Macht.

¹⁶Un Schadrach, Meschach un Abed Nego säden: Wie brucken die en dise Sach nich jehorchen.

¹⁷Wan du deist waut du jesajcht hast, dan kaun ons Gott, däm wie deenen, ons von däm heeten Hettowen un von diene Macht raden, un hee woat daut uk.

¹⁸Un wan hee daut nich deit, doawäajen saust du, ons Kjennich, weeten, daut wie nich woaren dienen Aufgott deenen ooda de goldne Jestault aunbäden.

¹⁹Dan stieech Nebukadnezar siene Wutt ut un hee wort gaunz root em Jesecht. Oppe Städ säd hee, daut de Hettowen sull säwenmol soo heet aus jeweenlich aunjehett.

²⁰Hee leet de stoakjste Soldoten ut siene Armee komen, daut dee Schadrach, Meschach un Abed Nego sullen de Henj un Feet toop binjen un dan soo en dän jlieejent heeten Hettowen nenn schmieten.

²¹De dree Mana worden dan met Kjleeda toop, en äare Mauntel, Rakj un Koppbinjen, faustjebungen un soo en dän jlieejenden Hettowen nenn jeschmäten.

²²Wiels de Owen opp däm Kjennich sien Befäl soo utnoms heet aunjehett wia, wieren de Flaumen soo heet, daut de Soldoten dee Schadrach, Meschach un Abed Nego nopp neemen, doavon storwen.

²³Un dise dree Mana, Schadrach, Meschach un Abed Nego follen en dän jlieejent heeten Hettowen nenn, noch emma jebungen.

²⁴Oba met eemol hupst Nebukadnezar ut Vewundrunk opp un säd to siene Rotjäwa: Bung wie nich dree Mana un schmeeten dee en daut Fia? Dee säden: Jo wie deeden, mien Kjennich.

²⁵Oba doa sent nu vea, säd hee. Ekj kaun dee seenen. Dee gonen doa em Fia rom un an es nuscht jeworden. Äare Strenj sent wajch un dee gonen doa jrodsoo rom! Dän vieeden lat äwahaupt no eenen Gott sien Sän.

²⁶Dan jinkj Nebukadnezar no de Däa opptoo von däm jlieejent heeten Hettowen un roopt: Schadrach, Meschach un Abed Nego, dee jie dän hechsten Gott deenen, komt rut, un komt häa. Un Schadrach, Meschach un Abed Nego kjeemen ut daut Fia rut.

²⁷Doamet kjeemen dee veschiedne Rejierungs Beaumte dicht bie un sagen selfst, daut daut Fia an nuscht jedonen haud. Äare Hoa wieren nich vesenjt, äare Kjleeda wieren nich veschrieecht un dee rikjten nich emol heet ooda ruakich.

²⁸Un Nebukadnezar säd: Ekj preis dän Gott dän Schadrach, Meschach un Abed Nego deenen. Dee haft sienen Enjel jeschekjt un an jerat. See jleewden am un horchten nich no mie, äaren Kjennich, un saden äa ieejnet Läwen opp Spell en däm daut see kjeenen aundren Gott aunbäden aus äaren ieejnen.

²⁹Un nu horcht: Wan irjentwäa von irjent een Volkj, ooda Launt ooda Sproak, irjentwaut sajcht wuamet dee Schadrach, Meschach un Abed Nego äaren Gott siene Iea wajchnemt, dämjanjen woat en Stekja jehakt woaren un sien Hus woat doljeräten woaren. Doa es sest noanich een Gott dee soo raden kaun.

³⁰Dan jeef de Kjennich Schadrach, Meschach un Abed Nego noch een hechret Aumt en Babel.

³¹De Kjennich Nebukadnezar schekjt eenen Breef aun de Menschen von de veschiedne Velkja un Lenda un Sproaken oppe gaunze Ieed un säd: Mucht junt daut sea goot gonen.

³²Ekj well dise Jeläajenheit nämen junt to berechten von de Tieekjens un Wunda, dee de hechsta Gott mie jewäsen haft.

³³Siene Tieekjens sent groosoatich. Siene Wunda sent toom staunen. Sien Rikj es een eewjet Rikj. Siene Harschoft es äwa Kjinja un Grootkjinja un haft kjeen Enj.