Read Plautdietsch (Low German) – De Bibel Daniel 8 Bible Online

Daniel 8 - Plautdietsch (Low German) – De Bibel bible

Daniel 8

¹En Belsazar sien dreddet Joa aus Kjennich haud ekj, Daniel, eenen tweeden Droom.

²Dit mol wia daut aus wan ekj en Susa, de Hauptstaut en de Prowins von Elam wia. Ekj wia doa biem Ulai Kanol.

³Doa biem Kanol sach ekj een Bock met twee groote Hieena. De een Huarn wia jrata aus de aundra un wia oba lota oppjekomen.

⁴Aus ekj doa soo kjikjt, rand hee met siene Hieena nom Wasten, un nom Nuaden, un nom Sieden, un kjeen Tia kunn sikj fa am wäaren. Doa wia kjeena dee aundre von däm raden kunn. Hee deed krakjt waut hee wull, un hee veharlicht sikj selfst.

⁵Aus ekj wundat waut dit bedied, kjeem doa een Kosenbock vom Wasten. Dee haud eenen grooten Huarn tweschen siene Uagen un rand soo äwa de Ieed, daut siene Feet meist nich oppe Ieed oppkjeemen.

⁶Aus hee däm twee huarnjen Bock biem Kanol sach, fluach hee däm aun met groote Wutt.

⁷Ekj sach woo hee no däm Bock kjeem un sea doll däm toofua. Hee troff däm Bock un bruak däm siene twee Hieena auf. De Bock kunn sikj bloos nich wäaren, un hee schmeet am opp de Ieed un traumpeld opp däm rom. Un kjeena kunn am halpen.

⁸De Kosenbock wort sea stoakj. Doch aus hee aum stoakjsten wia, bruak am sien groota Huarn auf. Un en de Städ von dän eenen, kjeemen vea stoakje Hieena opp, een jiedra en eene veschiedne Rechtunk.

⁹Ut eent von de Hieena kjeem een kjliena Huarn. Un siene Macht strakjt nom Sieden un nom Oosten un no daut scheene Launt.

¹⁰Dee woss en de Hecht bat aum Himmel un schmeet eenje Stierns rauf un traumpeld opp dee rom.

¹¹Hee hoof sikj jäajen däm Prins von de himlische Deena. Hee sad sikj jäajen däm Prins, en däm daut hee een Enj muak met de Opfa, dee aule Dach jebrocht worden un brocht daut Heilichtum en onieren.

¹²De Menschen sindijden doa, enne Städ daut see daut däachelje Opfa brochten. De Woarheit wort aun de Ieed jeschmäten. De Huarn haud Jlekj en waut hee deed.

¹³Un ekj hieed een Enjel däm aundren froagen: Woo lang woat daut soo bliewen aus de Droom daut doa wiest? Woo lang woaren doa kjeene däachelje Opfa sennen, ooda de Tempel en onieren stonen wäajen de growe Sind? Woo lang woat de Kosenbock kjennen de himlische Macht trotzen?

¹⁴Un dee säd to mie: Doa woaren 2.300 Owent un Morjen Opfa utbliewen bat de Tempel wada to sien rajcht komen woat.

¹⁵Un ekj docht doa noch eegol äwa no, aus doa met eemol een Maun ver mie stunt.

¹⁶Un een aundra Maun von biem Kanol säd: Gabriel, saj disem, waut de Droom meent.

¹⁷Un Gabriel kjeem no mie un ekj enjst mie soo sea, daut ekj han foll. Un hee säd: Waut du, Mensch, jeseenen hast, haft met de Tiet verem Enj to doonen.

¹⁸Aus hee räd, lach ekj met daut Jesecht opp de Ieed aus wan ekj beschwiemt wia. Oba de Enjel neem miene Haunt un recht mie opp.

¹⁹Un hee säd: Ekj woa die wiesen, waut doa komen saul, wan Gott sien Strofjerecht werkjlich verendach komen woat. Waut du jeseenen hast, haundelt sikj om de Tiet, dee fa daut Enj jeplont es.

²⁰De twee Hieena opp dän ieeschten Bock sent de Kjennichs von Medien un Persien.

²¹De zoddaja Kosenbock es de griechischa Kjennich. De groota Huarn tweschen siene Uagen es de ieeschta Kjennich.

²²Daut dee een Huarn aufbrakjt un dan vea aundre rut waussen, bediet daut vea Kjennichrikjs ut sien Rikj komen woaren.

²³Wan dise vea äare Tiet om es, un de Mot von daut beese waut see doonen voll es, kjemt een stieekopja Kjennich, dee butajeweenlich hinjalestich es.

²⁴Dee woat sea stoakj woaren, wan uk nich derch siene ieejne Macht. Menschen woaren eefach staunen äwa daut vedoawen waut dee aula uteewen woat, oba uk äwa waut dee aula foadich brinjen woat. Hee woat nich bloos stoakje Mana oba uk daut heilje Volkj tosied saten.

²⁵Derch sien hinjarigjschet woat hee sikj väl aunrieten un woat uk sea prauzich sennen. Dee woat väl Menschen ombrinjen onen Schomp. Oba wiels hee sikj jäajen däm hechsten HARN oppstalt, woat hee sien vedoawen seenen, onen daut Menschen doamet halpen.

²⁶Daut, waut du sachst äwa de Owent un Morjenopfa, woat aula soo utkomen. Oba hool daut jeheem. Daut haundelt sikj om eene Tiet waut noch lang nich hia es.

²⁷Ekj Daniel wia gaunz vebrukt un lach miere Doag em Bad ea ekj wada trigj no miene Oabeit ver däm Kjennich jinkj. Ekj wia bloos jestuzt un kunn daut nich bejriepen.