Read Plautdietsch (Low German) – De Bibel Daniel 9 Bible Online

Daniel 9 - Plautdietsch (Low German) – De Bibel bible

Daniel 9

¹No Kjennich Ahasveros wia sien Sän Darius, dee von de Meeda aufstaumd, Kjennich en Babel.

²En daut ieeschte Joa aus Darius Kjennich wia, sach ekj en onse Bieekja daut de HAR däm Profeet Jeremia jesajcht haud, woo lang Jerusalem venicht ligjen wudd. Daut säd doa daut wudden 70 Joa sennen.

³Ekj sad mie en Sakkjleeda un Ausch han, un funk aun to fausten un bäd iernstlich toom HARN, mienen Gott.

⁴En mien Jebäd bekjand ekj de Sinden von mien Volkj. Ekj säd: HAR, du groota un staunenswieeta Gott, dee du dienen vesproaknen Bunt helst, daut du ons truhoatich Leew bewiesen woascht, wan wie die goot sent un diene Jebooten hoolen,

⁵wie haben jesindicht. Wie sent schlajcht jewast un haben orrajcht jedonen. Wie haben diene Jebooten un Väaschreften nich jehoolen.

⁶Wie haben nich no diene Deena, de Profeeten, jehorcht, dee en dienen Nomen to onse Kjennichs, un Volkjsleida, to onse Vodasch un daut gaunze Volkj jerät haben.

⁷HAR du hast emma daut rajchte jedonen, oba wie haben Schaund opp ons jebrocht, wie, dee wie von Juda un Jerusalem un Israel komen, dee wie wiet un breet en veschiedne Lenda vestreit sent, wiels wie die nich Tru bleewen.

⁸HAR, onse Kjennichs un Volkjsleida un Vodasch haben Schaund opp ons jebrocht, doaderch daut see jäajen die jesindicht haben.

⁹Du HAR, ons Gott, hast Jnod un vejefst wan wie uk sent jäajenaun jewast.

¹⁰Wie sent die, HAR Gott, nich jehuarsom jewast, un haben nich de Jesazen jehoolen, dee du ons derch de Profeeten, diene Deena, jeefst.

¹¹Daut gaunze Israel haft sikj von dien Jesaz wajch jedreit un sikj aun die veschulcht. Nu es de Fluch, dän du met eenen Eit jedreift hast, oppjekomen, dee en dienen Deena Moses siene Jesazen jeschräwen un jedreift sent. Dit es wäajen onse Sind.

¹²Eena wudd oppe gaunze Welt nich noch emol soont finjen aus hia en Jerusalem jeworden es, oba dit es mau jrod waut du em verut to ons un onse leidende Mana jesajcht hautst,

¹³en daut Jesaz woont du Moses jeefst. Aul dis Trubbel es opp ons jekomen, doch, mien HAR, ons Gott, hab wie noch nich fa diene Jnod jebät un haben ons nich von onse Sinden loos jemoakt un ons no diene Woarheit jerecht.

¹⁴Doawäajen hast du, HAR, de Strof reed jehoolen un nu opp ons jebrocht, waut du jedreift hautst. Du brochst dän opp ons, wiels wie onjehuarsom wieren. Du wieescht gaunz em rajchten, daut du dise Strof leetst äwa ons komen.

¹⁵HAR, ons Gott, du hast diene Macht bewäsen aus du dien Volkj ut Ägipten brochst. Doaderch hast du die eenen Nomen jemoakt, dee Vondoag noch jeieet woat. Oba wie haben jesindicht. Wie haben ons vegonen.

¹⁶Wiels du emma daut rajchte deist, hia nu opp met dienen Oaja äwa Jerusalem. Daut es doch diene Staut, dien heilja Boajch. Aule Velkja runtom veachten Jerusalem un dien Volkj wäajen onse un onse Vodasch äare Sind.

¹⁷Leewa Gott, horch no dit Jebäd un no waut wie froagen. Muchst du, die to ieren, diene Gonst wiesen un dien Heilichtum, daut nu en onieren licht, noch wada oppbuen loten.

¹⁸Horch no waut wie sajen. Besee die onse Loag un kjikj no daut Wrak von eene Staut, dee dienen Nomen haft. Wie bäden wiels du soo jenstich best, un nich wiels wie daut met ons jerajcht sennen vedeent haben.

¹⁹HAR, horch. HAR vejeff ons. HAR, laj diene Haunt aun dit Woakj un lot daut nich lang dieren. Bewies diene Iea, ons Gott. Dise Staut un dit Volkj droagen dienen Nomen.

²⁰Ekj bäd soo un bekjand miene Sinden un de Sinden von mien Volkj, de Israeliten, un ekj bäd daut Gott wada wudd dän Boajch met sien Heilichtum häastalen,

²¹aus met eemol Gabriel, däm ekj ea en eenen Droom jeseenen haud, no mie jefloagen kjeem. Dit wia dicht bie de Tiet fa daut Owentopfa.

²²Hee muak mie daut dan dietlich un säd: Daniel, ekj sie jekomen die Vestentnis fa dise Profezeiunk to jäwen.

²³Aus du aunfungst to bäden, jeef Gott mie eene Auntwuat fa die, un nu sie ekj hia, die dee to sajen. Hee räakjent die väl. Nu horch no waut ekj saj un vesto de Profezeiunk.

²⁴Doa sent 70 Wäakjen von Joaren fa junt un june heilje Staut bestemt. Dan woat daut äwaträden een Enj haben un de Sind tosied jesat sennen. De Schult woat jestrikjt sennen un een eewjet jerajcht sennen woat enjefieet woaren, om daut de Profezeiunk un de Profeet woaren to äa rajcht komen, un daut de heilja Tempel fresch enjeweit woat woaren.

²⁵Paus noch wieda opp no waut ekj saj. Von daut Joa, wan daut Wuat jejäft woat, daut Jerusalem wada saul oppjebut woaren, bat Gott sien Enjesaulwda Leida kjemt, sent säwen Wäakj von Joaren. Jerusalem woat met Gaussen oppjebut woaren un woat runtom eenen Growen haben. Dit woat fa 62 Wäakj von Joa sennen un woat eene schwoare Tiet sennen.

²⁶No 62 Wäakj von Joaren woat de Enjesaulwda tosied jesat woaren un nuscht haben. De Staut un de Tempel woaren enne Grunt jebrocht woaren von daut Häa von däm Kjennich. Dit woat aula soo bosich komen un soo väl Schoden doonen aus eene Äwaschwamunk. Doa woat bat Enj too Kjrich sennen, un onen Froag väl vedorwen woaren.

²⁷De Kjennich woat met väle Lenda eenen schwoaren Bunt moaken fa eene Wäakj von Joaren. En de Medd von de Tiet woat hee daut soo rombrinjen, daut de Opfa un de Gowen em Tempel opphieren woaren, un daut oppscheiselje Bilt woat däm Tempel en onieren brinjen bat Gott sien Jerecht äwa am kjemt.