Read Plautdietsch (Low German) – De Bibel Hosea 1 Bible Online

Hosea 1 - Plautdietsch (Low German) – De Bibel bible

Hosea 1

¹Hia es de Norecht, dee Beeri sien Sän Hosea von däm HARN kjrieech. Dit wort en de Joaren aus Usija, Jotam, Ahas, un Hiskia Kjennichs en Juda wieren, ooda uk en de Joaren aus Joasch sien Sän Jerobeam de Kjennich en Israel wia.

²Aus de HAR daut ieeschte mol to Hosea räd, säd hee: Go un frie die eene Fru, dee eene Hua es. Du saust uk met ar Kjinja haben. Dit es wäajen de Israeliten sent vom HARN wajch jerant, soo aus eene Hua von äaren Maun rant.

³Un Hosea jinkj un befried sikj met Diblajim siene Dochta, Gomer. Un dan kjeem daut, daut see eenen Sän hauden.

⁴Un de HAR säd to Hosea: Jeff am dän Nomen, Jesreel. Doo daut, wiels ekj nich lang wachten woa, bat ekj däm Kjennich Jehu trigjtolen woa, fa de Menschen, dee hee en Jesreel ombrocht. Un ekj woa daut israelitische Kjennichrikj to Enj komen loten.

⁵Wan ekj dit doonen woa, woa ekj Israel aule Macht wajchnämen. Dit woa ekj em Jesreel Tol doonen.

⁶Un Hosea un Gomer hauden noch een Kjint, un daut wia eene Dochta. Un de HAR säd to Hosea: Jeff ar dän Nomen Lo Ruhama, [1] un doo daut, wiels ekj woa mie nich mea äwa Israel erboarmen, un woa an nuscht mea vejäwen.

⁷Oba ekj woa mie äwa Juda erboarmen, un woa an derch däm HARN, dee äa Gott es, halpen. Ekj woa an nich met dän Boagen, daut Schwieet, daut Kjrich Jereetschoft ooda Pieed un Woages halpen.

⁸Aus Gomer daut Mejalkje een bät jrata haud, hauden see noch een Junkje.

⁹Un de HAR säd: Jeff am dän Nomen, Lo Ami. [2]