Read Plautdietsch (Low German) – De Bibel Hosea 10 Bible Online

Hosea 10 - Plautdietsch (Low German) – De Bibel bible

Hosea 10

¹Israel wia soo aus eene jesunde Wienrank, dee väl Frucht druach. Doano aus see bäta auf worden, doano buden de Lied mea Aultoaren; doano aus see rikja worden, rechten see emma schmokre Steenmols opp.

²Em Hoat sent see hinjarigjsch, un nu motten see doafäa lieden. De HAR woat äare Aultoaren dolbräakjen, un aul äare Steenmols vestieren.

³Nu motten see toostonen, see haben kjeenen rechtjen Kjennich, wiels see kjeene Forcht fa däm HARN hauden; waut kaun een Kjennich noch fa an doonen?

⁴Waut see vespräakjen, helt nuscht en; dän Bunt dän see muaken, hoolen see nich. Daut Jerecht blieecht aus jeftjet Onkrut, waut en jieda Ran oppe Stapen waust.

⁵De Lied en Samaria sent beduat om daut Kaulf en Bet Awen. De Menschen woaren doaräwa truaren, un de Priestasch fa de Jetta hielen. Daut waut an ieescht Iea jeef, woat aula wajchjenomen woaren.

⁶Jo, daut Kaulf woat no Assierien jenomen, aus een Jeschenkj fa däm grooten Kjennich. Efraim woat Schaund lieden, wäajen dän Rot dän see neemen.

⁷De Troon en Samaria woat veschwinjen, aus de Schum oppem Wota.

⁸De huage Opfastäden en Awen, wua Israel sikj vesindjen deed, woaren to nuscht jemoakt woaren. Distlen un Spekjakrut woaren opp de Aultoaren waussen. See woaren to de Boaj roopen: Veschett ons, un to de Humpels: Fault opp ons.

⁹Von dan aus jie en Gibea sindijden, bat dän vondoagschen Dach, hab jie nich oppjehieet met sindjen. Brochten äare Sinden en Gibea an nich eenen Kjrich, dee an dolschluach?

¹⁰Wan mie daut ieescht jenuach es, dan woa ekj de Lenda jäajen an vesaumlen, wiels see sikj dobbelt vesindicht haben.

¹¹Efraim haud jelieet em Jespaun trakjen, oba an jefoll daut draschen bäta; dan schoond ekj sien schmocket Jenekj vom Joch. Oba nu woat hee motten een Jespaun dulden; Juda woat plieejen un Jakob woat äajden.

¹²Seit jerajcht sennen, un arnt, waut de truhoatje Leew drajcht. Plieecht de Broak noch eemol un sieekjt däm HARN, daut hee kjemt un junt halpt jerajcht sennen, soo aus een erfreschenda Räajen.

¹³Oba jie haben Schult enne Ieed jeplaunt, un woaren beeset arnten, un woaren de Frucht von Läajes äten. Wiels du die opp diene Macht veleetst, un opp eene groote stoakje Armee,

¹⁴woat nu Kjrichsjeschrech mank june Menschen komen, un june sechre Städen woaren vestieet woaren. Daut woat krakjt soo sennen aus dan, aus Kjennich Schalman de Staut Bet Arbeel em Kjrich neem, un de Mitta un Kjinja grausom aufschauft.

¹⁵Nu woat junt daut soo en Betel gonen wäajen june growe Sinden. Wan dee Dach väabrakjt, woat de Kjennich en Israel sikj nich wäaren kjennen.