Read Plautdietsch (Low German) – De Bibel Hosea 11 Bible Online

Hosea 11 - Plautdietsch (Low German) – De Bibel bible

Hosea 11

¹Aus Israel een Kjint wia, wia ekj am goot, un ekj roopt mienen Sän von Ägipten.

²Oba soo aus jesajcht woat, soo väl dolla ekj am roopt, soo väl dolla dreid hee sikj von mie wajch; see muaken Opfa fa de Baals, un Ruakopfa fa de Jetta.

³Ekj lieed Efraim gonen, un druach am en miene Oarms; see worden daut nich en, daut ekj an jesunt muak.

⁴Ekj trock gaunz natieedlich aun an; ekj wull an derch Leew jewennen. Ekj hoof daut Joch opp von unja äa Hauls, daut see goot äten kunnen.

⁵Oba nu, motten see trigj no Ägipten gonen, un Assur saul äa Kjennich sennen, wiels see nich trigj no mie wellen.

⁶Doawäajen woat daut Schwieet opp äare Städa komen, un äare vesechada Puaten woaren nich hoolen. Daut Schwieet woat an unja nämen, wiels see äare ieejne Plons nogonen.

⁷Mien Volkj haft kjeenen aundren Jedanken, aus von mie wajch to gonen. Un wan see mie aula tojlikj aunroopten, woa ekj an nich halpen.

⁸Woo saul ekj die oppjäwen, Efraim? Woo woa ekj die äwaleewren kjennen, Israel? Woo kaun ekj junt soont aundoonen aus ekj Adma deed? Woo kaun ekj die vedoawen soo aus emol Zebojim? Daut kaun ekj nich von Hoaten doonen; met aules en mie, sie ekj die goot.

⁹Ekj woa nich mienen Oaja loos loten; ekj woa Efraim nich vedoawen, wiels ekj sie Gott un nich Mensch. Ekj sie de Heilja en june Medd, un woa nich en Oaja opp junt komen.

¹⁰De HAR woat brellen aus een Leiw, un dan woaren see am hinjaraun komen; wan hee brellen woat, woaren de sienje vom Wasten flautren un komen.

¹¹See woaren von Ägipten komen aus veschechada Väajel, un von Assur, aus Duwen. Ekj woa an wada en äare Hiesa wonen loten, sajcht de HAR.