Read Plautdietsch (Low German) – De Bibel Hosea 12 Bible Online

Hosea 12 - Plautdietsch (Low German) – De Bibel bible

Hosea 12

¹En Efraim sent emma wada Läajes jäajen mie, un de Israeliten heichlen mie väa; Juda jeit wajch von Gott, un von däm Heiljen, dee tru es.

²Efraim recht sikj nom Wint, un jajcht dän dachäwa dän Oostwint hinjaraun; see lieejen aule Dach dolla, un eewen mea Jewault. Eemol moaken see een Bunt met Assur, daut näakjste mol brinjen see Eelj no Ägipten.

³De HAR brinjt Juda ver daut Jerecht, hee woat Jakob siene Nokomen strofen fa daut, waut see jedonen haben, un doafäa, woo hee jewast es.

⁴Em Muttalief zankt hee sikj met sienen Brooda, un aus hee een Maun wia, street hee sikj met Gott.

⁵Hee rauzt sikj met een Enjel, un leet sikj nich dol schmieten, oba hield un prachad. Bie Betel troff hee Gott, un doa hieed hee am uk räden.

⁶De Gott, dee aules rejieet, sien Nomen es, de HAR, säd to am:

⁷Komm trigj no dienen Gott; sie truhoatich leeftolich, un stal diene Sachen trajcht; velot die gaunz opp dienen Gott.

⁸Du best een Hendla met eene faulsche Wichtschol, un schummelst wellich.

⁹Efraim sajcht sikj: Ekj sie rikj un hab nu Macht; en aules waut ekj jedonen hab, woat kjeena met dän Finja wiesen opp soont waut Sind es.

¹⁰Ekj sie de HAR dien Gott, aul von dan aus du en Ägipten wieescht, un woa die wada loten en Zelten wonen, soo aus to jane Tiet.

¹¹Ekj räd to de Profeeten, un hab an foaken jewäsen, woo daut sennen sull; ekj jeef de Profeeten äare Bildasproak.

¹²En Gilead eewen see oppscheiseljet, un doafäa woaren see unjagonen; en Gilgal opfren see Ossen, un doawäajen woaren äare Aultoaren to Steenaklompes oppe Stap woaren.

¹³Jakob must no Aram flichten, Israel deed Vee heeden om sikj siene Fru to vedeenen,

¹⁴un lota, brocht de HAR de Israeliten, derch eenen Profeet ut Ägipten, rut. Hee deed an met een Profeet heeden.

¹⁵Nu es hee äwa Efraim vebettat, un de HAR woat äare Schult loten äwa an trigjkomen; hee woat an doafäa trigjtolen, daut see soo frajch jewast sent.