Read Plautdietsch (Low German) – De Bibel Hosea 13 Bible Online

Hosea 13 - Plautdietsch (Low German) – De Bibel bible

Hosea 13

¹To eene Tiet, wan Efraim waut säd, dan horchten see en Israel; oba see haben sikj aun de Baals vesindicht, un nu motten see stoawen.

²Oba see sindjen noch emma. See moaken sikj jegotne Bilda, soo straum aus see kjennen; Jetta, dee von Menschen jemoakt sent. See sajen: Moakt een Opfa fa dit. Mana kussen Kjalwa.

³Doafäa woaren see veschwinjen aus de Näwel em Morjen, un aus de Deiw, dee boolt wajch es; soo aus Sprie biem draschen veflicht, ooda de Ruak ut däm Fensta holt.

⁴Ekj sie de HAR, jun Gott, noch von en Ägipten; un jie haben werkjlich kjeenen aundren Gott jehaut. Kjeena haft junt jeholpen buta ekj.

⁵Ekj sie dee, wäa sikj om junt kjemmad aus jie enne Wiltnis, en daut drieeje Launt wieren.

⁶Dan eet jie junt voll un worden saut. Aus jie saut wieren, word jie prauzich; un dan vegaut jie von mie.

⁷Doawäajen woa ekj soo aus een Leiw fa junt sennen, un soo aus een Tiega aun de Kaunt vom Wajch.

⁸Met de Wucht von een Boa, von dee de junge jenomen sent, woa ekj junt de Brost oprieten un soo oppfräten aus een Leiw. De wille Tieren woaren jun Fleesch aufrieten.

⁹Jie woaren enne Grunt jebrocht woaren, Israel; ekj sie de eensja, dee junt raden kaun.

¹⁰Wua es jun Kjennich, dee en jieda Staut halpen saul? Wua sent de Leidasch to dee jie emol säden: Jäft ons eenen Kjennich un aunjestalde äwa ons.

¹¹Ekj jeef junt Kjennichs en miene Veläajenheit; un ekj hab dee wajchjenomen en mienen Groll.

¹²Efraim siene Schult es enjeprast; siene Sind es oppbewoat.

¹³De Weedoag sent jekomen oba hee es nich kluak; hee lat sikj nich kroagen un kjemt nich ut de Mutta.

¹⁴Woa ekj an frie moaken von doa wua de Doodes sent? Woa ekj vom Doot bewoaren? Lot däm Doot met siene Ploagen un daut Grauf met siene Krankheit fa mie Rach eewen. Ekj weet nich mea waut Metlieden es.

¹⁵Un wan hee uk stoakj es mank siene Breeda, woat vom HARN een Oostwint komen; von de Wiltnis woat dee aunholen, un daut Gruntwota woat utdrieejen, un de Kjwal woat kjeen Wota haben. Dee woat aul daut wieetvolle, un jieda feinet Dinkj wajchnämen.