Read Plautdietsch (Low German) – De Bibel Hosea 14 Bible Online

Hosea 14 - Plautdietsch (Low German) – De Bibel bible

Hosea 14

¹Samaria woat Strof lieden, wiels see äaren Gott nich jehorcht haft. Dee woat met daut Schwieet omjebrocht woaren, un äare Kjinja woaren grausom aufjeschauft woaren; un Frulied, dee schwanga sent woaren opjeschnäden woaren.

²Komm trigj no däm HARN dienen Gott, Israel; du best wäajen diene Sind jefollen.

³Moakt junt opp, un komt no däm HARN, froacht am aul june Sinden to vejäwen, un froacht am goodet to doonen, un vespräakjt een Opfa to moaken, met de Frucht von june Leppen.

⁴Assur woat ons nich halpen, un wie woaren ons nich opp Pieed veloten. Wie woaren nich mea sajen, daut de Dinja onse Jetta sent, dee wie selfst jemoakt haben. De Weisen finjen Jnod bie die.

⁵Ekj woa äa wadaspanstjet heelen, un woa an von Hoaten goot sennen. Mien Oaja woat sikj von an wajchdreien.

⁶Ekj woa aus een Deiw opp Israel sennen, soo daut see aus eene Lelje blieejen woat. See woat Wartlen schmieten, soo aus de Beem en Libanon.

⁷See woat breede Asta kjrieen, un schmock loten aus een Oliewenboom; see woat scheen rikjen aus de Libanon.

⁸De Israeliten woaren wada unja mienen Schauten setten, un Jeträajd to äten haben. See woaren blieejen aus eene Wienrank, un scheen rikjen aus de Wien von Libanon.

⁹Efraim woat kjeen Jebruck fa Jetta haben. Jie woaren no mie horchen, un ekj woa junt leiden. Ekj woa aus een Taunenboom fa die sennen; du woascht diene Frucht von mie kjrieen.

¹⁰Wäa es soo kluak, daut hee dit vesteit? Wäa haft Vestentnis, daut hee dit ensitt? Däm HARN siene Wäaj sent rajcht, un dee wäa jerajcht es, helt sikj aun dee; oba de Sinda vestaupt sikj aun dee.