Read Plautdietsch (Low German) – De Bibel Hosea 3 Bible Online

Hosea 3 - Plautdietsch (Low German) – De Bibel bible

Hosea 3

¹Un de HAR säd to mie: Go wada, un wies diene Fru woo goot du ar best, wan see sikj uk aundre hanjejäft haft, un nich es tru jewast. Krakjt soo, es de HAR Israel goot, wan see uk no framde Jetta jegonen es, un haft de Rasienen Kuaken jejäten.

²Un ekj told 15 Selwastekja un een Woagen voll Joascht, daut see wada miene wia.

³Un ekj säd to ar: Du woascht die nu fa een langet stoot met kjeenen Maun aufjäwen, nich emol met mie.

⁴Un krakjt soo woat Israel nu een langet stoot kjeenen Kjennich ooda Volkjsleida haben, un doa woat kjeen toopkomen biem Opfa ooda Steenmol sennen, un doa woat kjeen Wuat jejäft woaren derch dän Efod ooda een Husgott.

⁵No daut woaren de Israeliten sikj omkjieren un see woaren däm HARN äaren Gott un David äaren Kjennich sieekjen. See woaren ut Forcht flautren un no däm HARN, un no sienen grooten gooden Väarot komen, en dee latste Tiet.