Read Plautdietsch (Low German) – De Bibel Hosea 4 Bible Online

Hosea 4 - Plautdietsch (Low German) – De Bibel bible

Hosea 4

¹Nu horcht no waut de HAR sajcht, to aul junt Israeliten: De HAR haft junt eene Sach väatoschmieten, junt aula, dee jie en dit Launt wonen. Jie sent nich tru jewast, un jie sent junt nich goot, un jie jäwen nich Acht opp Gott, en jun gaunzet Launt.

²Jie wenschen däm näakjsten Ojjlekj, un jie lieejen un brinjen Menschen om; stälen un daut veläwen met aundre Frues kjemt aulawäajen äwadäl. Jewaultmäsje Doodes sent eemol no daut aundre,

³un doawäajen woat daut Launt vedrieejen, un aules waut doa läft woat lieden. De Tieren em Launt, de Väajel enne Loft, un soogoa de Fesch em Mäa woaren doot gonen.

⁴Jie sellen kjeenem waut väaschmieten un kjeenem trajchtwiesen; ekj well bloos däm Priesta dit väaschmieten.

⁵Bie doages Licht vestaupst du die, un de Profeet felt enne Nacht han. Ekj woa dien Muttalaunt stell moaken.

⁶Mien Volkj es to nuscht jeworden, wiels dee nich belieet sent. Du hast de Lieren nich jenuach jeacht; nu woa ekj die uk veachten un du woascht nich mea mien Priesta sennen. Un wiels du dienen Gott siene Jesazen vejäten hast, woa ekj diene Kjinja uk vejäten.

⁷Soo aus see sikj vemieet haben, soo haben äare Sinden sikj uk vemieet. Daut derch waut see aunjeseenen wieren, woa ekj soo moaken, daut see sikj schämen woaren.

⁸See wellen haben, daut mien Volkj sindjen saul, soo daut see sikj aun de Sindopfa masten kjennen.

⁹Dan woat däm Priesta daut gonen, soo aus daut Volkj daut gonen woat. Ekj woa an bestrofen fa daut waut see jedonen haben, un woa an soo behaundlen, aus see aundre behaundelt haben.

¹⁰See äten, oba haben nich saut to äten, see deenen aundre Jetta, oba buaren ut, wiels see däm HARN veloten haben un nich opp am Acht jäwen.

¹¹Äa romschwienen, un äa Bea un Wien, haft äa Denkjen vedreit.

¹²Mien Volkj sieekjt Rot von een Holt, äa Stock saul dän Wajch wiesen. See haben een velangen no waut aundre haben, un sent von äaren Gott wajch jegonen.

¹³Bowen oppe Boaj moaken see Opfa, un unjen aum Boajch, unjare Ieekjen, Papel un Reesta, wua soon scheena Schauten es, moaken see een Ruakopfa. Doawäajen sent june Dajchta nich tru, un opp june Schwieedajchta nich to veloten.

¹⁴Ekj woa june Dajchta nich bestrofen, wan see nich tru sent, un woa june Schwieedajchta nich trigj hoolen, wan opp dee nich to veloten es, wiels jie gonen selfst, wua jie nich sullen, un opfren toop met Huaren, soo daut daut onbelieede Volkj sikj enne Grunt rant.

¹⁵Wan du die uk aul vejeist, Israel, mucht Juda sikj bloos nich veschuldjen. Go nich no Gilgal toom aunbäden, un moak nich de Reis no Bet Awen, un moakt doa nich een Vespräakjen em HARN sien Nomen.

¹⁶Israel es nich bäta to vetruen aus eene stieekopje Koo; doawäajen kaun de HAR ar nich oppe opne Weid gonen loten, ooda soo aus de Lama grosen loten.

¹⁷Efraim haft sikj met Jetta vezaubelt, nu lot am bloos gonen.

¹⁸See drinkjen väl to väl, un sent nich tus wan see sennen sullen; see schwienen rom un jleewen daut schaundhaufte jeit scheen.

¹⁹Wan de Stormwint rom junt kjemt, woa jie seenen daut et nuscht halpt bie dän Aultoa deenen.