Read Plautdietsch (Low German) – De Bibel Hosea 5 Bible Online

Hosea 5 - Plautdietsch (Low German) – De Bibel bible

Hosea 5

¹Nu horcht no dit, jie Priestasch, paust opp waut ekj saj, jie Israeliten. Lot däm Kjennich un de sienje sikj de Uaren wauschen. Daut wia opp to junt doano to seenen, daut Sachen opp eenen rajchten Wajch jedonen woaren. Oba jie sent eene Schlenj jewast fa de Menschen en Mizpa; jie sent een breedet Nat äwa Tabor;

²jie sent een jefäadelja Growen en Schittim; un doawäajen mott ekj junt aulatoop strofen.

³Ekj hab no Efraim oppjepaust, un Israel es ver mie nich vestoaken; Efraim es ontru jewast, un Israel haft sikj veschwient.

⁴Waut see sikj aunjewant haben, lat an nich trigj no äaren Gott komen; see sent toom romschwienen jedräwen, un weeten nich mea von äaren HARN.

⁵Israel äa huachnäsjet Väahaben woat an trigj em Jesecht komen, un woat an schuldich bewiesen. Efraim un Juda woaren toop faulen, wäajen daut, waut see veschulcht haben.

⁶See woaren met äare Opfa von Schop un Rinda däm HARN sieekjen un nich finjen, wiels hee sikj von an wajch jedreit haft.

⁷See sent däm HARN nich tru jewast, un de Kjinja haben däm HARN nich kjanen jelieet. Doawäajen woat de Niemon an met daut äaje toop oppfräten.

⁸Blost met de Posaun en Gibea, un met de Trompeet en Rama. Roopt lud en Bet Awen, un enjst junt, en Benjamin.

⁹Efraim woat eene ladje Jäajent woaren aun dän Dach wan ekj an strofen woa. Ekj hab Israel daut kloa jesajcht.

¹⁰De Leidasch en Juda benämen sikj aus dee, dee de Jrensen wieda saten; doawäajen woat mien Oaja opp an komen soo aus vegotnet Wota.

¹¹Efraim mott nu lieden; hee woat unjajeklunjt fa waut hee jedonen haft, un wäajen am nich auftolenkjen jeit, von daut nogonen, waut nuscht es.

¹²Ekj sie aus de Motten fa Efraim, un aus de Moden fa Juda.

¹³Doch aus Efraim sach daut hee krank wia, un Juda feeld woo deep siene Wund wia, jinkj Efraim no Assur, no dän grooten Kjennich. Oba dee kunn junt nich jesunt moaken, un kunn nich june Wund veheelen.

¹⁴Nä, ekj woa aus een Leiw to Efraim sennen, un to Juda aus een dollet Tia. Ekj selfst woa an verieten un doavon gonen; ekj woa an wajch schlapen, un kjeena woat an raden.

¹⁵Ekj woa no miene Städ gonen, bat see äare Schult bekjanen, un mie aunbäden woaren. Wan an daut woat schlajcht gonen, dan woaren see mie sieekjen.