Read Plautdietsch (Low German) – De Bibel Hosea 7 Bible Online

Hosea 7 - Plautdietsch (Low German) – De Bibel bible

Hosea 7

¹Wan ekj Israel wada stoakj moaken well, dan wiest sikj fuaz Efraim siene Schult, un de Sinden von Samaria stäakjen mie em Hauls. Dee haben nich rajcht jehaundelt. De Reibasch bräakjen nenn, un de Baunden stälen buten.

²See denkjen doa nich aun, daut ekj äare Sind behool. Äare Sinden sent aulawäajen, un kloa ver mie to seenen.

³De Kjennich un siene aunjestalde joaklen äwa de Lied äare Läajes un Sinden.

⁴Kjeena helt sien Wuat. See sent soo reesch aus een Bakowen, dee nich aunjelajcht brukt tweschen kjnäden un nensaten.

⁵Aun dän Dach wua de Kjennich jekjreent woat, bedrinkjen hee un siene Mana sikj, un hee woat soo schoslich aus see.

⁶See sent soo hetzich aus een Bakowen, un schmeichlen am waut väa. De Nacht derch hoolen see äaren Oaja trigj, oba zemorjes flaumen see opp.

⁷Een jiedra woat heet aus een Owen un lat däm Rechta nich sien Wuat; een Kjennich felt nom aundren un kjeena frajcht waut von mie.

⁸Efraim veschmitt sikj mank de Velkja; hee es aus eene haulfjebakte Pankuak.

⁹Aundre Velkja nämen siene Krauft opp, onen daut hee daut enwoat. Siene Hoa woaren aul greiw, oba hee sitt daut nich.

¹⁰Israel äa huachnäsjet Väahaben wiest, daut see schuldich es; oba see komen nich trigj no däm HARN äaren Gott. Trotz aul dit, froagen see am doch no nuscht.

¹¹Efraim es schoslich aus eene Duw, dee aules auntakst. Eemol roopen see Ägipten, daut näakjste mol ranen see no Assur.

¹²Opp eemol woa ekj mien Nat äwa an schmieten un an jriepen aus een Voagel enne Loft. Ekj woa an bestrofen, soo aus de Vesaumlunk es jesajcht worden.

¹³Woo woat an daut doch gonen, daut see von mie jegonen sent! Lot an gaunz vedorwen sennen, wiels see jäajenaun jewast sent. Ekj sie dee, dee an raden kunn, oba see räden Läajes von mie.

¹⁴See bäden mie nich von Hoaten aun; see schrieen bloos von oppem Bad. See riewen sikj Wund met aunbäden, daut see Jeträajd un Wien kjrieen, oba see jehorchen mie nich.

¹⁵Ekj wia dee, dee an dän Wajch wees, un ekj moak an een stoakjet Launt, oba see plonen beeset jäajen mie.

¹⁶See jäwen dän schien daut see no mie komen, oba see doonen soo väl aus een schlaupa Boagen. Äare Leidasch woaren jenomen woaren, wiels see soo frajch jerät haben; un nu woaren see en Ägipten frajch äwa an räden.