Read Plautdietsch (Low German) – De Bibel Hosea 8 Bible Online

Hosea 8 - Plautdietsch (Low German) – De Bibel bible

Hosea 8

¹Häw de Posaun bat aum Mul un woarn daut Volkj, daut de Oshaka äwa mien Hus es, wiels däm HARN sien Volkj mienen Bunt vestat haft, un miene Jebooten nich jehoolen haft.

²Israel roopt mie aun: Wie jehieren die, ons Gott.

³Oba Israel veschmitt daut goode, doawäajen woat de Fient an nostonen.

⁴See moaken wäm toom Kjennich, oba onen mie; see stalen Mana äwa sikj, oba ekj saul daut nich weeten. See moaken sikj Jetta von Selwa un Golt un brinjen doaderch äaren ieejnen Schoden opp sikj.

⁵Ekj hool nuscht von dien Kaulf, Samaria; ekj sie sea vestalt äwa junt. Woo lang saul ekj noch wachten, bat de Israeliten äare Schult oppriemen?

⁶Een Schmett haft daut goldne Kaulf jemoakt, un daut es kjeen Gott. Un doawäajen saul daut Kaulf to Pulwa jeschloagen woaren.

⁷See haben eenen Wint jeseit, un woaren eenen Storm arnten. Daut steile Jeträajd haft kjeene Oa, un woat kjeen Mäl jäwen; un wan daut waut jäwen sull, dan woaren framde daut oppäten.

⁸Israel es oppjeschlukt. See es nu mank de Velkja, aus een Jefäs daut kjeena haben well.

⁹Aus een eensoma willa Äsel, es see no Assur jerant. Efraim tolt een framdet Launt, daut see am halpen sellen.

¹⁰Oba wan see sikj mank de Velkja vestreien, woa ekj an von doa holen. See woaren doa veschiednet lieden, von de Kjennichs un aunjestalde.

¹¹Efraim haft sikj väl Aultoaren jemoakt, toom de Sinden bedakjen, oba werkjlich haben see doa Sind jedräwen.

¹²Wan ekj am miene Jebooten uk krakjt oppschreef, haben see dee fa eene framde Lia jehoolen.

¹³Wan see uk wellich väl Opfa brinjen, doonen see daut, daut see kjennen Fleesch äten; daut kaun däm HARN nich jefaulen. Hee woat aun äare Schult denkjen, un hee woat äare Sind bestrofen. See woaren wada no Ägipten jeschekjt woaren.

¹⁴Israel vejat däm, dee an jemoakt haft, un but sikj groosoatje Hiesa; un Juda but groote Mieren om äare Städa. Oba ekj woa een Fia opp de Städa schmieten, un aul äare Paulausten vebrennen.