Read Plautdietsch (Low German) – De Bibel Hosea 9 Bible Online

Hosea 9 - Plautdietsch (Low German) – De Bibel bible

Hosea 9

¹Israel, frei die nich soo aus aundre Lenda. Du hast dienen Gott veloten derch dien romschwienen; du hast die opp jieda Draschplauz bekjeepen loten.

²Doawäajen woat de Draschplauz un de Wienkjala, nu nich jenuach jäwen toom läwen; de niea Wien woat utbliewen.

³Jie woaren nich en däm HARN sien Launt bliewen, oba Efraim woat wada no Ägipten motten, un en Assierien woa jie äten motten, waut ver däm HARN nich rein talt.

⁴Doa woa jie däm HARN kjeen Wien fa een Drinkjopfa jäwen, un kjeen Brauntopfa woat am jefaulen. En daut Launt, woont nich junt es, woa jie Truabrood äten, wuaderch een jiedra, wäa daut at, orrein woat. Äa Broot woat bloos fa dän Hunga sennen, un woat nich em Tempel jedroacht woaren.

⁵Waut woa jie dan aum Heljedach doonen, ooda met de Fasta, dee fa däm HARN sent.

⁶See motten aula wajch no dän Kjrich; Ägipten woat an oppsaumlen, un Memfis woat an begrowen. Doa wua selwane Sachen stunden, waust nu Krut waut Schlemsen jeft; spekjajet Krut waust wua äare Hiesa wieren.

⁷De Tiet es jekomen, daut du fa diene groote Schult bestroft woascht woaren; ditmol woat Israel daut to feelen kjrieen. Jie sajen, de Profeet es domm un de Maun met dän Jeist es dwautsch, oba daut saj jie wiels jie soo vesindicht un jäajenaun sent.

⁸De Profeet es een Wajchta en Efraim, Gott sien Volkj; doch haben see eene Schlenj opp sienen Stich jelajcht, un see veachten am en Gott sien Hus.

⁹Äare Wäaj sent nu soo schlajcht, aus dan aus see en Gibea wieren; doawäajen woat hee aun äare Schult denkjen, un hee woat äare Sinden bestrofen.

¹⁰Aus ekj Israel funk, freid ekj mie, aus wan eena Wiendruwen oppe wille Stap finjt. Aus ekj june Vodasch funk, wia ekj soo jlekjlich, aus wan eena de ieeschte Fiejen aum Fiejenboom sitt. Oba dan jinjen see no Baal Peor, un doa dreiden see sikj no schaundhaufte Sachen; see worden mie soo äakjlich, aus daut, waut see aunbäden.

¹¹Doawäajen woat daut, waut Efraim harlich muak, wajchflieejen aus een Voagel, soo daut see nich woaren Kjinja haben un nich emol schwanga woaren.

¹²Un uk wan see Kjinja haben woaren, woa ekj an äwa jieda eent von dee truaren loten. Woo woat daut doch sennen, wan ekj von an wajch jegonen sie?

¹³Efraim wia soo enjewartelt un stoakj aus Tierus, oba nu motten see äare Kjinja rutbrinjen un ombrinjen loten.

¹⁴Gott jeff an — . Waut woascht an jäwen? Moak daut, daut see kjeene Kjinja haben woaren, un daut äare Brosten oppdrieejen.

¹⁵Aul äare Sind passieet en Gilgal; dort sie ekj an Fient jeworden. Wäajen daut schlajchte waut see deeden, woa ekj an ut mien Hus rut joagen. Ekj woa an uk nich mea goot sennen, wiels äare Leidasch soo jäajenaun sent.

¹⁶Efraim haft eene schlajchte Wund, äare Wartel es vedrieecht. Dee woat kjeene Frucht mea droagen, un wan waut aunsaten sull, wudd ekj daut doot moaken.

¹⁷Mien Gott woat an wajchschmieten, wiels see nich jehorchen wellen. See woaren mank de Velkja rombeislen.