Read Plautdietsch (Low German) – De Bibel Amos 1 Bible Online

Amos 1 - Plautdietsch (Low German) – De Bibel bible

Amos 1

¹Dit sent de Norechten, dee Amos, een Schopfoarma von Tekoa, von Gott kjrieech. Dee räden von Israel un komen von de Tiet aus Usija Kjennich en Juda wia, un Jerobeam, Joasch sien Sän, Kjennich en Israel wia. Daut wia twee Joa ver daut Ieedbäben.

²Amos säd: De HAR schricht von Zion, un hee rät to junt von Jerusalem; soo daut de Schophoads äare Weid vedrieecht, un de Spetz vom Karmel Boajch veschrieecht.

³De HAR sajcht: Dree Dinja haft Damaskus veschulcht, nä, vea, un ekj woa de Strof nich trigjhoolen. See haben Gilead utjedrascht un met Iesa fien jemolt.

⁴Ekj woa Kjennich Hasael sienen Paulaust aunstekjen, un Kjennich Ben Hadad siene Paulausten vebrennen.

⁵Ekj woa daut Stautspuat von Damaskus tweibräakjen, un de Enwona em Awen Tol ombrinjen, un uk däm dee en Bet Eden rejieet. Un de Lied von Aram woaren no Kir veschlapt woaren. Dit lot junt vom HARN jesajcht sennen.

⁶De HAR sajcht: Dree Dinja haft Gaza veschulcht, nä, vea, un ekj woa de Strof nich trigjhoolen. See haben daut gaunze Volkj veschlapt un dee aun Edom vekoft.

⁷Ekj woa een Fia oppe Mieren en Gaza aunstekjen, un äare Paulausten vebrennen.

⁸Ekj woa de Lied en Aschdod ombrinjen, un däm, dee en Aschkelon rejieet, raufsaten. Ekj woa miene Macht jäajen Ekron uteewen, un dee, dee von de Filista äwajebläwen sent, ombrinjen. Dit lot junt von Gott däm HARN jesajcht sennen.

⁹De HAR sajcht: Dree Dinja haft Tierus veschulcht, nä, vea, un ekj woa de Strof nich trigjhoolen. See haben Edom aul de faustjenomne jejäft, un nich äa Wuat met ons jehoolen.

¹⁰Ekj woa een Fia oppe Mieren von Tierus aunstekjen un äare Paulausten vebrennen.

¹¹De HAR sajcht: Dree Dinja haft Edom veschulcht, nä, vea, un ekj woa de Strof nich trigjhoolen. Hee juach sienen Brooda met daut Schwieet un haud kjeen Metlieden met am. Hee hieed nich opp sikj to oajren, un bleef bloos doll opp am.

¹²Ekj woa Teman aunstekjen, un de Paulausten von Bozra vebrennen.

¹³De HAR sajcht: Dree Dinja haben de Amonita veschulcht, nä, vea, un ekj woa de Strof nich trigjhoolen. See dreewen daut soo groff en äaren Iewa äa Launt jrata to moaken, daut see de Frulied von Gilead, dee schwanga wieren, opschneeden.

¹⁴Ekj woa de Mieren von Raba aunstekjen, un äare groote Städa vebrennen. Dän Dach woaren de Soldoten lud schrieen un de Storm woat sea schlemm sennen.

¹⁵Äa Kjennich woat wajchjefieet woaren met siene aunjestalde toop. Dit lot junt vom HARN jesajcht sennen.