Read Plautdietsch (Low German) – De Bibel Amos 2 Bible Online

Amos 2 - Plautdietsch (Low German) – De Bibel bible

Amos 2

¹De HAR sajcht: Dree Dinja haft Moab veschulcht, nä, vea, un ekj woa de Strof nich trigjhoolen. See haben däm Kjennich von Edom siene Knoakes to fiene Ausch vebrent.

²Ekj woa een Fia opp Moab brinjen un de vesechade Städen en Kerijot vebrennen; äare Menschen woaren em Wirwoa omkomen, wan de Fient schrieen un blosen woat.

³Ekj woa äaren Leida raufsaten, un äare aunjestalde ombrinjen. Dit lot junt vom HARN jesajcht sennen.

⁴De HAR sajcht: Dree Dinja haft Juda veschulcht, nä, vea, un ekj woa de Strof nich trigjhoolen. See haben däm HARN siene Lia veacht, un de Jesazen nich jehoolen; see haben sikj veleiden loten met de selwje Läajes, dee äare Vodasch aul nojinjen.

⁵Ekj woa een Fia opp Juda aunstekjen, un de Paulausten en Jerusalem vebrennen.

⁶De HAR sajcht: Dree Dinja haft Israel veschulcht, nä, vea, un ekj woa de Strof nich trigjhoolen. See vekjeepen dee, dee daut rajchte doonen, fa Jelt; un de oame fa waut eefache Footich.

⁷See veklunjen däm oamen sien Kopp enne Ieed; un schuwen dee, dee Help fält, ut däm Stich. De Voda un sien Sän gonen no de selwje Mejal, un beschämen mienen heiljen Nomen doaderch.

⁸Opp Dakjen, dee see aus Birj jenomen haben, lajen see sikj bie jieda Aultoa dol. See drinkjen en Gott sien Hus Wien, waut see met aundre äa Schultjelt jekoft haben.

⁹Ekj haud doch de Amorita ver an utjerot, dee soo groot aus Zeeda, un stoakj aus Ieekjen wieren. Ekj ast an ieescht ut un rod uk noch de Wartlen ut.

¹⁰Ekj brocht junt ut Ägipten rut, un leid junt 40 Joa enne Wiltnis, soo daut jie de Amorita äa Launt kjrieejen.

¹¹Ekj hab von june Säns Profeeten jemoakt; un von june Junges soone waut Nazara worden. Saj ekj too väl, jie Israeliten? Dit lot junt vom HARN jesajcht sennen.

¹²Oba jie jeewen dee Wien to drinkjen, waut sikj Gott jeweit hauden. Jie vebooden de Profeeten, daut see nuscht sajen kunnen.

¹³Nu kjikjt Ekj woa junt schwäakjen moaken, soo aus een Woagen schwäakjt, dee voll Goawen es,

¹⁴soo daut de bosje nich ut däm Stich komen, un de stoakje sikj nich wäaren kjennen. Soo daut de stoakje Soldoten nich met daut Läwen doavon komen.

¹⁵Dee, dee goot met däm Boagen scheeten kjennen, woaren äare Städ oppjäwen; dee waut sea ranen kjennen woaren nich wajchkomen; un dee, dee opp Pieed sent, woaren omkomen.

¹⁶De brofste un stoakjste woaren haulf noaktich wajchranen. Dit lot junt vom HARN jesajcht sennen.