Read Plautdietsch (Low German) – De Bibel Amos 4 Bible Online

Amos 4 - Plautdietsch (Low German) – De Bibel bible

Amos 4

¹Horcht emol no waut ekj saj: Jie Frues von opp däm Samaria Boajch, jie sent jefeet un straum aus de Kjieej en Baschan; jie nutzen de oame ut, un bestälen de schwake, un sajen to june Mana: Brinjt ons waut to drinkjen.

²Soo secha aus Gott de HAR heilich es, haft hee vesproaken: Horcht emol, doa woat eene Tiet komen, wua jie met schoape Hoakes woaren veschlapt woaren, un dee waut doa äwabliewen, met Fesch Hoakes.

³Un jie woaren aula bloos verwoats derch irjent een Loch enne Stautswaunt rut no Harmon jeschlapt woaren. Dit lot junt vom HARN jesajcht sennen.

⁴Komt no Betel un vesindicht junt, no Gilgal, un moakt daut noch oaja. Brinjt jun Opfatia aule morjen, un jun tieendel jieda dredda Dach.

⁵Brinjt een Opfa von jesuadet Broot, un moakt june friee Gowen bekaunt. Soont jeit je junt soo scheen, jie Israeliten. Dit lot junt von Gott däm HARN jesajcht sennen.

⁶Ekj leet daut too en june Städa, daut june Tänen rein bleewen, daut doa noanich Broot to äten wia, un doch kjeem jie nich trigj no mie. Dit lot junt vom HARN jesajcht sennen.

⁷Dree Moonat verem arnten hilt ekj dän Räajen opp. Opp eene Staut leet ekj daut räajnen, un oppe aundre hilt ekj dän trigj; opp eene Stap leet ekj daut räajnen, un oppe aundre leet ekj aules vedrieejen.

⁸De Lied von twee un dree Städa jinjen no eene Staut, daut see drinkjen kunnen, un hauden nich jenuach fa äaren darscht; un doch kjeem jie nich trigj no mie. Dit lot junt vom HARN jesajcht sennen.

⁹Ekj jeef junt drieeje Joaren, un leet Braunt oppe Flekja komen. De Rupen freeten aules waut enne Goades un aun de Wienranken, aun de Fiejenbeem un Oliewenbeem woss, un doch kjeem jie nich trigj no mie.

¹⁰Ekj schekjt eene Ploag opp junt, soo aus ekj opp Ägipten deed. Ekj leet june junge Mana em Kjrich to dood komen, un neem junt june Pieed wajch. Ekj leet daut Jestank von jun Soldotenloaga unja june Näsen trakjen, un doch kjeem jie nich trigj no mie. Dit lot junt vom HARN jesajcht sennen.

¹¹Ekj brocht een Schoden mank junt, soonen aus Gott en Sodom un Gomorra deed, un jie wieren aus een Stekj Brenholt, daut eena ut däm Fia ritt, un doch kjeem jie nich trigj no mie. Dit lot junt vom HARN jesajcht sennen.

¹²Un wiels jie Israeliten nich trigj komen, woa ekj junt noch mea von dit jäwen. Un wiels ekj noch mea von dit doonen woa, moakt junt reed junen Gott to bejäajnen, jie Israeliten.

¹³Horcht emol, Gott haft de Boaj jemoakt, un am jehieet de Wint. Hee lat de Menschen weeten waut hee väahaft. Hee vejajcht zemorjes de Nacht, un traumpelt oppe Boaj. Sien Nomen es “HAR, de Gott dee aules rejieet”.