Read Plautdietsch (Low German) – De Bibel Amos 5 Bible Online

Amos 5 - Plautdietsch (Low German) – De Bibel bible

Amos 5

¹Nu horcht no dit Trualeet, jie Israeliten, daut ekj wäajen junt sinj.

²De Mejal Israel es jefollen un woat nich wada oppstonen. See es en äa Launt jefollen, un doch es doa kjeena waut ar halpt.

³Un nu sajcht Gott de HAR to daut Volkj Israel: Von de Staut wua 1.000 Soldoten rutjinjen, woaren mau 100 trigjkomen; un dee waut 100 em Kjrich schekjt woat mau 10 trigjkjrieen.

⁴Un nu sajcht de HAR, to daut Volkj Israel: Bemieecht junt, daut jie mie finjen; dan woa jie läwen.

⁵Got nich no Betel ooda Gilgal, un got nich no Beerscheba, wiels Gilgal woat onbedinjt faustjenomen un wajchjefieet woaren, un Betel woat enne Grunt jebrocht woaren.

⁶Bemieecht junt däm HARN to finjen, dan woa jie läwen. Aundasch woat hee äwa Josef siene Nokomen soo äwa rollen aus een Stapfia, waut kjeena hoolen kaun, un Betel woat dolbrennen.

⁷Soo aus jie nom rajcht seenen, moakt eenem betta, un jie schlapen jerajcht sennen em Blott.

⁸De HAR muak daut Säwenstiern un Orion, hee vejajcht zemorjes de Nacht un zeowes dän Dach; hee roopt daut Wota vom Mäa, un jitt daut opp daut Launt. Sien Nomen es HAR.

⁹Wäa brinjt daut vedoawen opp de stoakje, soo daut de dikje Mieren kjeenem waut halpen?

¹⁰See horchen nich no däm Rechta biem Puat, un veachten däm, dee de Woarheit sajcht.

¹¹Wiels jie de oame utnutzen un an moakt een Poat von äare Arnt aufjäwen, woa jie nich en de Hiesa wonen, dee jie von Steen jebut haben; un jie woaren nich dän Wien to drinkjen kjrieen, von de schmocke Wiengoades, dee jie aunjelajcht haben.

¹²Ekj weet woo foaken jie junt veschulcht haben, un woo groff june Sind es. Jie vefoljen opprechtje Menschen, jie nämen Schmäajelt, un jie vedreien de Kloag von däm oamen em Jerecht.

¹³Wäa Ensecht haft, blift en soone Tiet stell, wiels daut es eene beese Tiet.

¹⁴Bemieecht junt met goodet doonen, un hieet met daut schlajchte opp, dan woa jie läwen. Dan woat de HAR, de Gott, dee aules rejieet, met junt sennen, soo aus jie nu meenen.

¹⁵Stalt junt jäajen daut beese, un räakjent daut goode väl. Moakt secha, daut wan jie rechten, daut jie daut rajchte doonen. Veleicht woat de HAR, de Gott, dee aules rejieet, noch jenstich sennen, met dee waut von Josef siene Nokomen äwabliewen.

¹⁶Doawäajen sajcht de HAR, de Gott, dee aules rejieet, jun Har: Opp aule Gaussen woaren see truaren, opp jieda Wajch woaren see, “Oba nä!” sajen. See woaren däm Foarma kroagen toom truaren, un toom hielen, wäa bloos daut Trualeet kaun.

¹⁷En aule Wiengoades woaren see hielen, wan ekj mank junt komen woa. Dit lot junt vom HARN jesajcht sennen.

¹⁸Woo woat junt daut gonen, dee jie junt däm HARN sienen Dach wenschen? Wuarom wensch jie junt däm HARN sienen Dach? Dee Dach woat diesta sennen, nich dach.

¹⁹Daut woat sennen, aus wan eena vom Leiw rant un eenen Boa bejäajent; aus wan eena en een Hus nenn jeit un sikj doa aun eene Waunt länt, un dan woat von eene Schlang jebäten.

²⁰Gaunz secha, woat däm HARN sien Dach diesta sennen, un nich dach, stock diesta onen irjent eenen schien.

²¹De HAR sajcht: Mie äakjlen june Fasta. Mie freien june iernste Vesaumlungen nich.

²²Wan jie mie uk Brauntopfa brinjen ooda jun Jeträajdopfa stalen, woa ekj dee nich aunnämen. Ekj well daut Opfa von jemaste Kjalwa nich mea seenen.

²³Hieet opp met june lude Leeda; ekj well june Hoap nich mea aunhieren.

²⁴Lot jun nom rajcht seenen soo rollen aus Wota, un jun jerajcht sennen aus een Riefa, dee nienich utdrieecht.

²⁵Brocht jie Israeliten Opfa en dee 40 Joa enne Wiltnis?

²⁶Druag jie doa Jetta, dee jie selfst jemoakt hauden? Haud jie doa Sakut, jun Kjennich, un Kewan, dän Stiern Gott?

²⁷Doawäajen woa ekj junt bat hinja Damaskus aus faustjenomne wajchleiden. Dit lot junt vom HARN jesajcht sennen. Sien Nomen es, de Gott, dee aules rejieet.