Read Plautdietsch (Low German) – De Bibel Amos 6 Bible Online

Amos 6 - Plautdietsch (Low German) – De Bibel bible

Amos 6

¹Woo woat dee daut gonen, dee soo jemietlich en Zion sent, un dee waut soo jetroost en Samaria läwen; dee waut daut jewälde Volkj leiden, un opp wäm aule Israeliten sikj veloten.

²Got emol no Kalne un beseet daut, un dan got no de groote Staut, Hamat; dan got rauf no Gat, de Filista Staut. Sent dee nich bäta auf aus jie? Es dee äa Launt nich jrata aus junt?

³Un jie läwen aus wan de Dach, wan de Strof kjemt, wiet auf es. Soo aus jie läwen, woat däm Dach noda brinjen, wan see met Jewault äwa junt rejieren woaren.

⁴Jie lajen junt opp Baden, dee met Aulfenbeen utjestraumt sent; un strakjen junt delenjd june Ru Benkjen. Jie äten de Lama von de Häad, un jemaste Kjalwa,

⁵un soo aus David, kjlimpa jie oppe Hoap un moak jie junt Leeda.

⁶Jie drinkjen Kommen voll Wien un riewen junt met de baste Eelj en; oba junt es daut nich schod, daut Josef siene Nokomen nich bestonen woaren.

⁷Jie woaren nu ieeschtens rutjeleit woaren, jun jemieteljet Fast woat ut sennen.

⁸Gott de HAR vesprakjt met een Eit opp sikj selfst: Ekj woa dise Staut met aules äwaleewren un venichten, wiels Jakob siene Nokomen soo stolt sent, un ekj äare Paulausten nich vedroagen kaun. Dit lot junt vom HARN jesajcht sennen, von däm Gott, dee aules rejieet.

⁹Wan tieen Mana en een Hus äwabliewen, woaren dee doch stoawen.

¹⁰Un wan dan vom Frintschoft eena kjemt toom de Doodes besorjen un frajcht: Sent doa noch aundre? dan woat noch eena bennen sajen: Nä. Un jana woat sajen: Schsch, soo daut kjeena däm HARN sien Nomen sajen woat.

¹¹Nu horcht, de HAR velangt, daut de groote Hiesa sellen en Wrak veschloagen, un de kjliene Hiesa sellen en Spellasch jebroaken.

¹²Kjennen Pieed mank de Steena ranen? Kjennen Ossen daut Mäa plieejen? Oba jie haben daut rajchte doonen vejeft, un daut jerajcht sennen betta jemoakt.

¹³Jie freien junt daut jie Lo Dabar trigj haben, un meenen jie haben Karnajim met june Krauft enjenomen.

¹⁴Oba ekj woa junt Israeliten eenen Fient brinjen, dee junt, von doa wua eena no Hamat jeit bat aun däm Riefa em Jordan Tol, kjwälen woat. Dit lot junt vom HARN jesajcht sennen, von däm Gott, dee aules rejieet.