Read Plautdietsch (Low German) – De Bibel Amos 8 Bible Online

Amos 8 - Plautdietsch (Low German) – De Bibel bible

Amos 8

¹Un Gott de HAR wees mie wada waut. Dit mol wia daut een Korf voll riepe Frucht.

²Un hee säd: Amos, waut sitst du doa? Un ekj säd: Een Korf voll riepe Frucht. Un de HAR säd: Mien Volkj es gaunz riep jeworden. Ekj woa de Israeliten nich noch eemol vejäwen.

³Aun dän Dach woaren de Sinja em Kjennich sien Hus äare Leeda opphieren, un see woaren hielen, sajcht Gott de HAR. Doa woaren väl Doodes aulawäajen ligjen, un daut woat sea stell sennen.

⁴Horcht emol, aul jie dee jie oppe oame romklunjen, un dee jie de schwake em Launt ut dän Stich riemen.

⁵Jie sajen: Wanea woat daut Niemon Fast äwa sennen, daut wie Jeträajd vekjeepen kjennen? Un wanea woat de Sabat to Enj komen, daut wie Weit vekjeepen kjennen. Wie kjennen aul nich aufluaren bat wie de Mot kjennen kjlanda moaken un dän Vedeenst jrata moaken un de scheewe Jewichta oppe Wichtschol brucken.

⁶Wie woaren dän foossen Weit vekjeepen aus gooden, un wie woaren de oame met Jelt kjeepen un de schwake fa waut Footich vesklowen.

⁷Wiels Jakob soo prauzich es, haft de HAR sikj faust väajenomen: Ekj woa nuscht vejäten, waut dee jedonen haben.

⁸Woat daut Launt nich schedren von dit? Woat nich een jiedra truarich sennen äwa soont? Daut Launt woat sikj opphäwen aus de Niel Riefa. Daut woat äwaranen un wada raufgonen, soo aus de Riefa en Ägipten.

⁹Aun dän Dach, dit sajcht Gott de HAR, woa ekj de Sonn opp Meddach loten unjagonen, un ekj woa daut Launt bie doages Licht loten diesta woaren.

¹⁰Ekj woa junt aun de Heljedoag truarich moaken, un june Leeda aula truarich stemmen; jie woaren daut Sakkjleet aun de Lint droagen, un woaren june Kjap schäaren. Jie woaren truaren aus biem Doot von eenen eensjen Sän; dän Dach woat junt aules betta sennen.

¹¹Horcht emol. Doa kjemt een Dach, dit sajcht Gott de HAR, dan woa jie en dit Launt hungren, nich Hunga no Broot un Darscht no Wota, oba een velangen een Wuat von däm HARN to hieren.

¹²Dee woaren romgonen bat daut Soltmäa un daut Groote Mäa, see woaren nom Nuaden un nom Wasten gonen, un een Wuat von däm HARN sieekjen, oba dee woaren kjeent finjen.

¹³Wan dee Dach kjemt woaren june schmocke Mejales un june junge Junges fa darscht beschwiemen.

¹⁴Nu veloten see sikj noch opp Aschima von Samaria, un sajen: “Soo secha aus dien Gott läft, Dan”, un: “Soo secha aus dien Gott läft, Beerscheba”, oba see woaren hanfaulen, un see woaren nich wada oppstonen.