Read Plautdietsch (Low German) – De Bibel Jona 1 Bible Online

Jona 1 - Plautdietsch (Low German) – De Bibel bible

Jona 1

¹Doa kjeem emol een Dach, wua de HAR to Jona, Amittai sien Sän, räd. Un de HAR säd:

²Moak die reed, un go no de groote Staut Ninive, un woarn de Lied, daut see woaren jerecht woaren. Dee sent doa sea schlajcht, un ekj woa daut nich lang dulden.

³Oba Jona stunt opp un meend, hee wudd vom HARN wajch ranen un no Tarsis reisen. Hee jinkj no Jafo un funk een Schepp, daut no Tarsis säajlen wull. Hee betold sien Entretsjelt, jinkj opp daut Schepp un fua auf no Tarsis. Soo wull hee vom HARN wajchkomen.

⁴Aus see oppem Wota wieren, schekjt de HAR eenen stoakjen Wint opp daut Mäa. Een groota Storm kjeem opp an, soo daut see dochten, daut äa Schepp kunn tweibräakjen.

⁵De Seemana enjsten sikj, un see bäden aula äare Jetta om Help. See schmeeten de Fracht, dee see fieeden, em Mäa, daut et leichta fa daut Schepp wia. Jona wia rauf jegonen em Schepp, haud sikj doljelajcht un wia faust enjeschlopen.

⁶Dan jinkj de Kapitän rauf un säd to am: Woo kaust du schlopen? Sto opp un bäd dienen Gott aun. Veleicht denkjt dee aun ons, daut wie hia nich aula unjagonen.

⁷De Seemana eenijden sikj, daut see wudden een Loss trakjen om uttofinjen, wäa von an schuldich fa dit wia. Un daut Loss troff Jona.

⁸Dan fruagen see am: Wuarom sent wie en dise Jefoa? Waut es diene Oabeit? Von wua kjemst du? Von woon Launt un von woon Volkj?

⁹Un hee säd: Ekj sie een Hebräa un ekj bäd däm HARN aun, dee em Himmel Gott es. Hee haft daut Launt un daut Mäa jemoakt.

¹⁰Hee säd an uk, daut hee vom HARN wajchrand. Dan enjsten de Seemana sikj ferchtalich un säden: Woo kaust du soont doonen?

¹¹Aus see sagen, daut de Storm bloos oaja wort, fruagen see am: Waut sell wie met die doonen, daut dis Storm emol nojäwen woat?

¹²Un hee säd: Nämt mie un schmiet mie em Mäa nenn. Dan woat daut stell woaren. Ekj weet daut dis Storm wäajen mie opp junt jekomen es.

¹³Oba de Seemana vesochten dan noch to roodlen om nom Launt to komen, doch de Storm wort bloos emma schlemma.

¹⁴Dan bäden see däm HARN aun un säden: HAR, bestrof ons nich, wan wie disen Maun em Mäa schmieten. Lot ons doch nich veauntwuatlich sennen fa een Doot, dän hee nich vedeent haft. Du HAR hast met disen Storm doch uk no dienen Wellen jehaundelt.

¹⁵Dan neemen see Jona un schmeeten am em Mäa nenn. Un daut Mäa wort stell.

¹⁶Dan wieren de Mana met eene groote Forcht fa däm HARN benomen. See schlachten een Tia fa een Opfa un jeewen däm HARN äare Vespräakjen.